Dhilebiwe ni Matewuji
24 Yesu akumaga mutempulu anamaharaye omwaddamela wihina emoonihe tempulu yaatene. 2 Nuwindo oliye owoga naaliwa egihina: “Munowona dhaatedhene ndha? Ginowuwaddelani ebaribari: “Kawindha wikala nibwe nnakale vadhulu vanibwe nikwaye nihindha nigujhuliwa.”
3 Agakaratile vamwangoni wa Olivera, anamahara aye omwaddamela okwibi ni omukoha yegihina: “Kanaddeleni, dhithu ndha dhinereye alini, yintelelo ya othonga weenyu* ni omakuthulo wa dhithu dhaatedhene* siivi?”
4 Yesu wawakula egihina: “Pole-pole, ahikalewo muthu anuleketheni, 5 mwaha owinjhiva enerege odha ni ndina naaga yegihina: ‘Miyo gili Kiristu,’ ni enerege waleketha athu owinjhiva. 6 Munerege wiiwa dhiwogiwaga wodhela koddo mburo dhohiyana-iyana, mbwenye pole-pole wihina munoove, mwaha dhithu ndha dhinere opadduwa mbwenye omakuthulo kunafiye.
7 “Mwaha nlogo nnerege ovenyedhana nlogove, omwene omweneve, winere orameya dhoojha ni winere okalawo oddiginyeya weelabo mburo dhohiyana-iyana. 8 Mbwenye dhithundha dhaatedhene omambelelo wa makathamiho manlubale.
9 “Mowindo athu enere wuwonihani goyi ni enere wupani, nyu munere widdiwa ni malogo aamatene mwaha wa ndina naaga. 10 Teto owinjhiva enere okwakwathuwa, enerege ogulihana ni wiiddana mmodha ni mukwaye. 11 Enere okumelela anamavuhulela owinjhiva owoota, enaalekethe athu owinjhiva; 12 Mwaha wowenjhedhedheya obure, odhivela waathu owinjhiva winere oridha. 13 Mbwenye anaavilele* ofiyedha omakuthulo dinavulusiwe. 14 Muthenga ola wapama wa Omwene onere olaleyiwa elabo yaatene yavati wihina athu aatene yiiwe,* windo omakuthulo wifiye.
15 “Mowindala, moona ethu yonyakavala enaatota makathamiho, yeyo ewogiwe nnamavuhulela Daniyeli, egaali mburo woweela (namileriya asayele wonelamo), 16 vano ale enaakale oJudeya ethawele omwangoni. 17 Muthu anaakale vadhulu va nyumba ahikitele vati wihina athukule dhoreela dhaye, 18 muthu anaakale omundda kahogolowele vaade wihina aathukule malayaaye oode. 19 Ginowakubanyedha ahiyana enaakanne wari ni enamwihege malabo yayo! 20 Mudidele olobela wihina othawa weenyu wihiliganyedhe mudhidhi woridha newene labo na Sabadu; 21 mowindo enere okalawo mahoso manlubale ehinakalegewo wambela vipaddusiwe elabo ofiyedha peeno, newene kidha ekalagawo dila biili. 22 Mwebaribarene malabo yaayo yahere yahivuguliwa kaavo aavuluwe, mbwenye mwaha waathu oosakuliwa malabo ayo enere ovuguliwa.
23 “Muthu uwaaddelani egihina: ‘Kasugwani! Kiristu ola ali vala!’ Obe: ‘Ali wule!’ Kamurumedhe. 24 Enere okumelela akiristu ni anamavuhulela owoota, enerege werana dhintelelo dhinlubale ni matikiniho wihina yalekethe athu, dhenyeya naaleya oosakuliwaya. 25 Mukale pasope! Miyo guhuwaddelani dhihinathi wereya dhithu ndha. 26 Mowindala, yuwaaddelani yegihina: ‘Kasugwani! Ole ali mwiddeddereni!’ Kamudhowewo; obe: ‘Kasugwani! Ole ali mba,’ kamurumedhe. 27 Ndo ninga ojerima wa dari onakumiiwa omadhelo nduwa odhowaga omadhowelo nduwa, odha* wa Mwaana Muthu winereye ndo. 28 Wengo winakale muruthu, fivenvo vinaatugumane apangwe.
29 “Vohilegela mahoso manlubale a malabo yaayo yavira, nduwa nnere othima, mweri kunaarege, thendderi dhinere omora odhulu, vano kopolo dhodhulu dhinere oddiginyeya. 30 Vano odhulu winere woneya yintelelo ya Mwaana Muthu, mahimo aamatene a elabo yavati enerege ovada vathimarimani mwaha wokubanya, ni enere omoona Mwaana Muthu adhaaga mmuraboni ni kopolo ni nthithimiho ninlubale. 31 Oliye aneere waruma angero aye yobaga palaza ni ndhu na kopolo, vano aliwa enere watugumanya oosakuliwa aye dhipaddi dhaatedhene dha elabo, okuma wambele elabo ofiyedha winagomeliwa.
32 “Muhudhere ni yoladdaniha ya nfigera: Matadu yambela opweta matakuru maxa, nyu muhunona wi elimwe enna waddamela. 33 Nimakalelo mamodhave, moonaga dhithu dhendha munone wi oliye ohaddamela vamulago. 34 Miyo ginowuroromelihani wihina nlogo nna kannafiyedhe otolowa dhithu dhaatedhene dhihipaddunwe. 35 Elabo yodhulu ni elabo yavati enere omala, mbwenye madhu aaga kinadha emala.
36 “Wodhela labo nno ni maworaya kaavo aanonile, newene angero oodhulu newene Mwaana, mbwenye anonile bi Ababa baahi. 37 Mowindala, ninga dhereya malabo a Nowe, odha* wa Mwaana Muthu winereye ndo. 38 Mwaha wihina malabo yaale mutokora ohunathi ofiya, athu yoojha, yong’wa, alobwana yootela ahiyana yooteliwa, ofiyedha labo Nowe ovolowa mmwanddeyani, 39 aliwa kiyapwathile ethu ofiyedha mutokora odha ni watolosa aatene, odha wa Mwaana Muthu winereye ndo. 40 Alobwana abiili enakale omundda; mmodha aneere othukuliwa mmodha aneere ohiyiiwa. 41 Ahiyana abiili enere ofwanyiwa vansiloni esilaga; mmodha aneere othukuliwa mmodha aneere ohiyiwa. 42 Vano mukale mento mwaha labo anafuna odha Nabwiya enyu kamunonne.
43 “Mbwenye munone wihina: ahere mwanamurala anona mawora mbava anadhiye,* kaagonelevo ni kahiye nyumbaye okupuliwa. 44 Mwaha wa yeela ni nyunwa kamugonelevo, mwaha Mwaana Muthu anadha morurumusa.
45 “Mwebaribarene baani ali mudhaari oororomeleya ni athotho,* nabwiye amuthommiye wihina aakabelelege ale enamulaba ni aavahege yoojha mudhidhi wofwanelela? 46 Oohagalala di mudhaari yoyo nabwiye adha anaanfwanyiye aaparaga mabasa yayo! 47 Ginowuwaddelani ebaribari oliye aneere omuhiyedha dhoreela dhaye dhaatedhene.
48 “Mbwenye mudhaari oyo abure awoga mmurimani egihina: ‘Nabwiyaaga anoolegela,’ 49 ni ambela wawukutha adhaari akwaye, ojhaga, ang’waga ni anamang’wa, 50 nabwiya a mudhaari oyo anaadhe labo ahajhehedhiye ni mudhidhi ahinonniye; 51 oliye aneere omusinyusa ni makalelo abure ni aneere onvokedha mburo waanamaleketha. Wengo funakale wunla ni waatakuna meeno.