Karta Naakudda Kolosense

3 Mowindala, akala nyu muhuvenyihiwa vamodha ni Kiristu, mudidele waaja dhithu dhodhulu, wengo wili Kiristu ookaratene moono woojha wa Mulugu. 2 Mubuwelege dhithu dhodhulu, ohiya dha veelaboni yavati. 3 Mwaha nyu muhumala okwa teto eguminyu ehivitiwa vamodha ni Kiristu mowiwanana ni Mulugu. 4 Vano Kiristu anavaha egumi* ooneyihiwa ni nyunwa muneere woneyihiwa vamodha nuliye munthithimihoni naye.

5 Mpe yaano dha mwiili weenyu wihina munaamorele mmararuwoni,* dhithu dhonyakavala, nthakwithakwi noohivanya, munigwa wabure, ni nrima wili webedha dhikwamuthu dhosema. 6 Owali wa Mulugu onadha mwaha wa dhithu dhendha. 7 Ni nyunwa mweeddelo weenyu wa kale waali ndo. 8 Mbwenye vano muhiye dhaatedhene ndha: owali, onyanyuwa, obure, madhu oovereyiha murima; ni muhiye owoga dhithu dhamanyazo dhinadhela vamulomoni veenyu. 9 Kamotedhanege mmodha ni mukwaye. Murule emuthu yakale ni dhoweradhiwa 10 ni muware emuthu exa yeyo enatxenihiwa wodhela enonelo yowakwanela wihina eligane ni Yoole apaddusile, 11 wodhela muselu oyo, vano kaawo muGerego newene muJudewu, newene muthu owineliwa obe oohineliwa, newene munyawedda, munyathemba,* mudhaari newene muthu ootapuwa; mbwenye Kiristu dili dhaatedhene mwa dhaatedhene.

12 Mowindala, ninga athu esakuliwe ni Mulugu, oweela ni oofuneya, moonihege* thagaraga, opama, wiyeviha, opwaseya ni ovilela. 13 Mudhowegeve nvilelanaga mmodha ni mukwaye mulevelelanaga mmodha ni mukwaye mohihiyedhedha, naarive akala muthuya ohukanna mwaha wi amusumele mukwaye. Ni makalelo mamodhave Yehova* uleveleliyeni mohihiyedhedha, ni nyuwa mweregena emodhave. 14 Ohiya dhithu dhaatedhene ndha, moonihege odhivela, mwaha odhivela nipara nnadhana wiwanana.

15 Ohiya eyo, murenddele wa Kiristu okale mmurimani mweenyu, mwaha nyu muhithaneliwa murenddele oyo wihina mukale yaano dha mwiili mmodhave. Teto mukale athu ootamalela. 16 Madhu a Kiristu ekale ni nyu teto yuvaheni thotho dhaatedhene. Mudidele ohudhihana ni olibihana mmodha ni mukwaye ni masalmu, mmuthithimihaga ni mmutamalelaga Mulugu ni jhibo dhoomuzimuni. Mudidele omwibela Yehova* ni murima weenyu wamutene. 17 Ethu-siithu munawoginyu obe munerinyu mweregena mwa ndina na Nabwiya Yesu mmutamalelaga Mulugu, Baabi wodhela oliye.

18 Muhiyana ooteliwa omwiwelele mamuno ninga enafwaneleliwa mwa Nabwiya. 19 Mulobwana ootela, kuhiye omudhivela mwariyo teto kuthabwege omunyanyuwela bure-bure. 20 Ahimanyu, mwawiwelelege makolwinyu mwa dhaatedhene mwaha eyo enomuhagalasa Nabwiya. 21 Abaabi, kamwanyanyuwihege aninyu wihina aliwa enuukuuwe. 22 Adhaari, mwawiwelelege anabwiyinyu* mwa dhaatedhene, kahiyo weragana mwasugweriwaga baahi wihina mwahagalase athu, mbwenye ni murima waatene mmoovaga Yehova.* 23 Dhithu dhaatedhene munerinyuna, mweregena ni murima weenyu waatene,* mwaha munamwerela Yehova* ohiya athu, 24 mwaha muhunona wi munere wawakela mareeliho enadhela wa Yehova* ninga nvaho. Mulabege ninga adhaari a Nabwiya, Kiristu. 25 Mwebaribarene, muthu yoole anerana dhithu dhabure aneere ohogoloseliwa obure eriliyena, mwaha Mulugu kanna nsakulo.