Karta Noobajha Naakudda Tesalonisense
4 Gikuthulaga addibila, mowindala ninga mwakenlinyu dhoholela wodhela makalelo munafwanelelinyu weeddaga wihina mmuhagalase Mulugu ndala ninga munerinyuna, nnowulobelelani ni nnowukongomedhani mwa ndina na Nabwiya Yesu wihina mudhowegeve mwenjhedhedhaga dhithu munerinyuna. 2 Mwaha nyu muhunona dhoholela nuvahilihuni dhinadhela wa Nabwiya Yesu.
3 Mulugu anafuna wihina mukale oweela ni mwaathawe mararuwo.* 4 Kadda muthu wa nyu anone osugwera mwiili waye mwamakalelo oweela ni oothithimiha. 5 Kamukale ninga athu a mwilaboni ehimunonne Mulugu, mwaha munigwa wewa wogonihana kunakoleya. 6 Kumwerele ethu yabure ddibilo obe ovolowela ofuru waye anniyena, mwaha Yehova* aneere watoriha aatene yaale enerana dhithu dhendha, ninga nuwaddelihuni kale nivanove ninna wukongomedhani mohihiyedhedha. 7 Mwaha Mulugu kaniithanile wihina nikale oonyakavala, mbwenye nikale oweela. 8 Mowindala, ole anapwaza muselu ola kanampwaza muthu, mbwenye anampwaza Mulugu, ole anuuvahani muzimu wotxena.
9 Wodhela muselu wowadhivela addibila, kinahoweleya wulebelani mwaha munohudhera* ni mwinnyene Mulugu makalelo oodhivelana mmodha ni mukwaye. 10 Mwebaribarene, siyeyo munawerelinyu addibila aatene ooMasedoniya. Mbwenye addibila, iyo nnowukongomedhani wihina mudidele wenjhedhedha odhivela weenyu. 11 Yoluba yeenyu ekale weedda mwamurenddele, ohivolowela muselu dhaathu amodha, olaba ni mada enyu, ninga muhudherinyu ni iyo, 12 wihina athu oode yoonege mweeddelo weenyu wapama muhunna ethu enuuhalelani.
13 Ohiya eyo, addibilaga kannafuna wihina mukalege ninga kamunonne ele enaapadduwele ale enagona muukwani, wihina muhuthabwege wukuuwa ninga athu amodha ehinna ejhehedhelo. 14 Akala nihikanna nroromelo wihina Yesu ohukwa ni ohuvenyihiwa, nihikanna nroromelo wihina Mulugu aneere wavenyiha ale ekwile egaali mwimodhani ni Yesu wihina ekale vamodha nuliye. 15 Iyo nnafuna nuwaddeleni mowiwanana ni madhu a Yehova* neegi: iyo ninna egumi ni nnaakale mento ofiyedha odha wa Nabwiya, kanindha nikala vasogolo* wakwaranya ale ekwile kale; 16 mwaha mwinnyene Nabwiya aneere okita odhulu ni ndhu noolamula na Arkanju* agaaparele palaza ya Mulugu, vano anookwa eli mwimodhani ni Kiristu binakale oobajha ovenyihiwa. 17 Voharela, iyo nili mento navuluwa, nnere othukuleliwa mmuraboni wihina nagumane nNabwiya mulengalenga, namala nnakalege nNabwiya malabo aamatene. 18 Mowindala, mulibihanege mmodha ni mukwaye ni madhu yaala.