Karta Nanabiili Naakudda Korintiyu

9 Wodhela mabasa nnaaparelihu oweela, kaginahowela wulebelani, 2 mwaha gihinona wihina munoofuna okavihera, bumwahaya gawaaddelaga aMasedoniyu ginowithukulana gegi akudda Akaya vano ehakwaniha yaka yantero egaali owiwegeredhene teto oviheya weenyu wihathukulela owinjhiva wa aliwa okala ooviheya. 3 Mbwenye ginna waaruma addibila wi edhe wengo, wihina withukula wehu wodhela efunelo munninyuna yokavihera ohukale weebewene, teto wihina nyu mukale owiwegeredhene mowindala ninga miyo gawogilimi. 4 Amasedoniyu yahadhe wengo ni miyo yufwanyani muhiniwegeredhe, neere wathukula manyazo mwaha iyo wuroromelani teto ni nyunwa mweere wathukula manyazo. 5 Bumwahaya iyo nihinafiye, gihoona wi sapama wakongomedha addibila wihina erajhihe odha wuwaredhelani wihina mwegeredhe vihinase dhovelela dhenyu mpaganyilinyu wi dhikale dhomaladhene ninga ethu munavahinyu ni murima weenyu waatene, ohiya mowaddihedhiwa.

6 Mbwenye wodhela muselu ola, muthu yoole anaala* bewu vang’ono anaahadde vang’ono mbwenye ole anaala bewu dhowinjhiva aneere oohadda dhowinjhiva. 7 Kadda muthu erena yeele ubuweliye mmurimani mwaaye, kavahe wula ahifunaga newene mowaddihedhiwa. Mwaha Mulugu anamudhivela ole anavaha nuuhagalala.

8 Ohiya eyo, Mulugu podi wuvahani opama wohinifwanelela winlubale wihina nyu muhurabulelege dhithu munahowelinyu wihina mwaaparege mabasa aatene apama. 9 (Mowindala ninga dhoolebela dhinawogiwa: “Oliye onowavaha ni murima waatene athu oohaawa. Wogowa waye fwamukalakala.” 10 Ole ananvaha bewu* dhowinjhiva muliba waala* ni pawu ninga yoojha, ni nyuwa aneere wuvahani ni aneere wuwenjhedhedhani bewu wihina mwaale teto aneere wukaviherani wihina muhadde vanlubale mmabasani mweenyu owogowa.) 11 Mwa dhaatedhene nyu munna oreelihiwa, wihina mukale athu oovaha mwamakalelo aatene, eyo enowathukulela athu omutamalela Mulugu mwaha wehu; 12 mwaha mabasa ala munaaparinyu, kinaakavihera oweelave baahi dhithu enahoweliwa, mbwenye enere okala ntxela ninlubale nnaathukulele athu omutamalela Mulugu. 13 Mwaha onamoona nvahilinyu wodhela mabasa ala ookavihera, aliwa enomuthithimiha Mulugu wodhela wiwelela weenyu muthenga dhapama dha Kiristu munalaleyinyu vaanamwinjhi teto mwaha wi muhuvaha dhovelela dhenyu ni murima waatene wihina ekaviheriwena oweela ni athu aatene. 14 Teto aliwa enowooniha wihina enowudhivelani mwaha wi enowulobelelani dila dhowinjhivadhene wodhela opama winlubale ni wohinifwanelela wa Mulugu anuwoonihiyeni.

15 Ootamaleliwa di Mulugu, mwaha wa mahala aye oohisoriheya.