Alebeliye Akudda Romanu
11 Vano ginokoha gegihina: Mulugu ohunyanyala nlogo naye? Naari! Mwaha ni miyoya gili mwaana Ezarayeli a odhuulu* wa Abaraawu nihimo na Benjami. 2 Mulugu kanyanyale nlogo naye, nenno asakuliye vobajhavene. Nyu kamunubuwela epaddi ele ya Dholebela enihina Eliyaji, ahisuma wa Mulugu mwaha wa Ezarayeli? 3 “Yehova, anamavuhulelinyu ehimala waapa, aaltare enyu ehimala waapwesa, ahanle di miyo meeka teto nimiyoya enna ogisayela wihina egipe.” 4 Mudhidhi yoole Mulugu amwakunle ddi? Oliye ahiwoga egihina: “Gihikannave athu owakwana 7000 ehinamukokorele Bahale.” 5 Ni makalelo mamodhave, mudhidhi yoola ehihala athu amodha esakuliwe wodhela opama wohinifwanelela. 6 Eyo enatapulela wihina aliwa esakuliwe mwaha wa opama wohinifwanelela, ohiya mwaha wa mabasa yapanriwa; yahere ninga aliwa yapara mabasa wihina esakuliwe, kanerege wihina opama wohinifwanelela.
7 Kivano nnaawoge ddi? Ethu Ezarayeli asayeliye vanlubale kafwannye, mbwenye athu esakuliwe bifwannye. Athu amodhaya wummiha murima dhewa, 8 mowindala ninga dhinawoga Dholebela dhegihina: “Mulugu ohavaha muzimu wogonelavo, mento yahinoona ni mabaru yahiniiwa, ofiyedha peeno.” 9 Ohiya eyo Davidi anihina: “Meza ewa okale murako, nibwe nookwakwathusa, yamala esinyusiwe. 10 Wihina mento ewa ehonege teto mutana dhewa dhikoromanihiwege mudhidhi waatene.”
11 Vano Ginokoha gegi: Gerege aliwa yeere okwakwathuwa omora, ofiyedha ohandaga ovenya? Mwebaribarene naari! Mbwenye mwaha ohiwelela wewa wihavaha athu a malogo ofuru wovulusiwa mwaha wa yeyo watatamula nrima. 12 Akala ohiwelela wewa ohathukulela athu a mwilaboni oreela, ovuguwa wewa winatapulela oreela wa athu a malogo, mwaha athu yathabwaga winjhiva mareelihoya enerege wenjhedhedheya!
13 Vano ginawoga ni nyu muli athu a malogo. Woona wi gili murumiwi aathu a malogo, ginowathithimiha mabasa ginaaparimi 14 wihina goone akala ginere otatamula nlogo naaga okanna nrima ni gaavuluse amodha waaliwa. 15 Mwaha okoddiwa wewa wihakavihera athu amodha a mwilaboni okanna wandana ni Mulugu, teto akala Mulugu oharumedha, kamunoonelamo wihina aneere wavaha egumi ale ekwile? 16 Akala epaddi modha ya pawu soweela, enatapulela wihina pawu yaatene soweela; teto akala musisi wa muthanko boweela ni murasidha dha muthanko oyo dhinakala dhoweela.
17 Mowindo, akala murasi* dhimodha dhihikaseliwa teto we naarive ogaali muthanko wa olivera wa mukokolani ohubandihedhiwa mwaha wa yeyo onere wawakela mareeliho enadha ni musisi wa olivera, 18 kuwithukulege vaari va murasi ndho. Akala we onowithukula vaari va murasi ndho kuddiwale wihina kahiyo we anahiddeela* musisi mbwenye musisi suhiddeele.* 19 We onere owoga wegi: “Murasi dhimodha dhihigwaddiwawo wihina miyo gibandihedhiwewo.” 20 Eyo ebaribari! Dhihigwaddiwa mwaha kadhanna nroromelo, mbwenye we oli owimelene mwaha wa nroromelo naawo. Kuwithukulege mbwenye okale owoova. 21 Mwaha akala Mulugu ohukasela murasi dhoobajha ni weya werana emodhave, onere okaseliwa. 22 Nyu muhunona wihina Mulugu dapama teto onotakaleliwa. Mbwenye wadidela werana dhithu dhapama vamentoni vaye, Oliye aneere wuwoniha opama waye. Mbwenye waherena ndo, niweya onere okaseliwa. 23 Teto naaliwaya yahogolowela nroromelo newa, enere obandihedhiwave mwaha Mulugu kinamurusa werana eyo dila biili. 24 Mbwenye akala we ohukaseliwa mmuthankoni wa olivera omenle yekiwa mukokolani vano onodhowa wabandihedhiwa muthanko wa olivera odhaliwe, naarive eyo yahipadduwaga, enere okala yokweya murasi ndhe aakaseliye obandihedhave dila biili mmuthankoni mwewa!
25 Mowindo, addibila, ginafuna munone dhoviteya ndha dhootaleleya wihina mwahubuwelege wi muhunona dhaatedhene. Amwaana Ezarayeli amodha kiyafuna ovuruwana, teto enere wereya emodhave ofiyedha athu amodha ehili maJudewu esakuliwe ni Mulugu etugumaniwe, 26 ni makalelo yaala amwaana Ezarayeli aatene enere ovulusiwa. Ninga dholebela dhinawogiwa dheegi: “Namavulusa* aneere okuma oSiyawu ni aneere weeriha wihina odhuulu wa Jako ohiye werana dhithu dhabure. 27 Nna thi nipangano ginerimina naaliwa gathimiha dhoothega dhewa.” 28 Ebaribari wihina aliwa amwiddani a muthenga dhapama dhinna mpurelo wa nyu, mbwenye Mulugu ohasakula ni onowadhivela mwaha wa makolwiwa. 29 Wodhela nvaho ni withana, Mulugu kanadha asaddula mubuwelo waye. 30 Mowindala, kale nyu kamwamwiwelela Mulugu mbwenye vano nyu muheddeliwa thagaraga mwaha ohiwelela wewa, 31 teto ofiyedha peeno aliwa athu oohiwelela yerihaga wihina mweddeliwe thagaraga, naaliwaya yeddeliwaga thagaraga. 32 Mwaha wa yeyo, Mulugu ohaweriha aatene okala anyakambura mwaha ohiwelela wihina aatene aweddele thagaraga.
33 Thotho, enonelo ni dhoreela dha Mulugu dhithu dhiddihale vanlubale! Makalelo aye ootoriha bootikiniha teto iyo kannanda wonelamo dila dhaye dhaatedhene! 34 Ki “baani anonne mubuwelo wa Yehova* obe baani anamulaga?” 35 Obe, “baani abanjhe onvaha ethu wihina Oliye amuhogolosele?” 36 Mwaha dhithu dhaatedhene saye, dhinakalawo mwaha waye teto dhinamukalelawo Oliye. Athithimihiwe Oliye ni mukalakala. Amem.