Dhilebiwe ni Matewuji
15 Vano Afarizewu ni anamaleba amodha yakuma oJeruzale, omwaddamela Yesu ni owoga yegihina: 2 “Mwahaya bwaddi anamahara awo egaalupa malamulo a makolo? Motajhiha, yaafunaga ojha kinaanawa* mada.”
3 Yesu wawakula egihina: “Ki nyu mwahaya bwaddi mugaalupa malamulo a Mulugu mwaha ohara mweeddelo weenyu? 4 Motajhiha, Mulugu ohuwoga egihina: ‘Waarihe ababo ni amawo’ ‘Ole anaawulumele* ababe obe amaye, apiwe.’ 5 Mbwenye nyu munawoga mwegihina: ‘Muthu yoole anaawoge naababe obe naamaye egihina: “Dhaatedhene ginnimina dhafuna wukaviherani, nvaho wa Mulugu.” 6 Muthu yoyo kanahowela waariha Ababe.’ Bumwahaya madhu a Mulugu kinarihiwa mwaha wohara mweeddelo weenyu. 7 Anamaleketha nyu! Izayiya ohuvuhulela pamadhene wodhela nyu nuwoga egihina: 8 ‘Nlogo nna nnagithithimiha ni mulomo baahi, wula murimadhiwadha dhigaali wolapelawene ni miyo. 9 Nnagebedhela ebewene, mwaha nnahudhiha malamulo aathu ninga dhohudhiha dha Mulugu.’” 10 Nuwindo, withana muthithi ole waathu wihina omwaddamele ni owoga naaliwa egihina: “Nvuruwane ni mwawonelemo madhu ala ginaawogimi: 11 Enamutakaliha muthu kahi ele enavolowa muwano, mbwenye enakuma muwano sinamutakaliha muthu.”
12 Nuwindo anamaharaye omwaddamela ni owoga yegihina: “Mwahinona wi afarizewu ehikwakwathuwa mwaha madhu mwasorihinyu?” 13 Oliye wawakula egihina: “Muthanko waatene ohaliwe ni Ababa oodhulu onere odduliwa. 14 Kamwapwathege. Aliwa kinoona teto enaweddiha aliba oohoona akwiwa. Akala muliba oohoona, onomweddiha muliba oohoona mukwaye, aatene enomorela mmuliddini.” 15 Peduru omuloba Yesu egihina: “Munonelihemo yoladdaniha ela.” 16 Vano Yesu owoga egihina: “Ni nyunwa kamonelemo ethu? 17 Kamunonne wihina dhithu dhaatedhene dhinavolowa muwano dhinavira mbani vano okumelela ode? 18 Mowindala, dhaatedhene dhinakuma muwano dhinadhela mmurimani, sidhendha dhinamuthukulela muthu okala ootakala. 19 Motajhiha, mmurimani munokuma mubuwelo wabure ninga: opanana, okuma mba, oraruwa,* wiiya, onamoona wowoota ni oruwana dhithu dhotaleleya. 20 Ndha sidhithu dhinamutakaliha muthu; mbwenye ojha ohunawile* mada kawinamutakaliha muthu.”
21 Numaruwa vevale, Yesu odhowa murudda woTiru ni woSidoni. 22 Vano, muhiyana dhaala nFinisiya akala murudda yoole omwaddamela ni okuwa egihina: “Geddeleni thagaraga Nabwiyani mwaana Davidi. Demoniyu anna omoniha goyi vanlubale mwanaga mwanamuhiyana.” 23 Mbwenye oliye kamwakunle ethu. Nuwindo anamaharaye odha ni omuloba yegihina: “Kamwaddeleni adhowege, mwaha anna okuwave mundduli mwehu.” 24 Oliye wawakula egihina: “Mulugu ogirumile wa nlogo naamwaana Ezarayeli, yayo enakala ninga mambila oorimela.” 25 Mbwenye muhiyana ole odha okokora* vamentoni vaye egihina: “Nabwiyani gikavihereni!” 26 Yesu omwakula egihina: “Kahiyo yapama wawaka anamwani pawiwa ni wavokedha anaanabwa.” 27 Oliye wakula egihina: “Hee Nabwiyani, mbwenye mwebaribarene anaanabwa enajha ndhe dhinamorihiwa ni anabwiyiwa vameza.” 28 Yesu omwakula egihina: “Muhiyanawe ohukanna nroromelo ninlubale! Yereye mowiwanana ni efunelo yawo.” Obajha mudhidhi yoole odhowa osogolo mwanaye ovulumuwa.
29 Yesu numaruwa mburo yoole odhowa waddamela niya yoGalileya. Nuwindo ogwela vamwangoni okarati venvo. 30 Vano muthithi waathu omwaddamela, yaadhagana athu ookwethenkwa, ooragala, oohoona, oohuwoga ni aredda amodha, wapweha valiye, oliye wavulumusa. 31 Nuwindo, muthithi ole waathu otikina nuwawoona athu oohuwoga ewogaga, ookwethenkwa yeeddaga pama, ooragala evulumusiwaga, oohoona yonaga, ni yomuthithimiha Mulugu oWizarayeli.
32 Mbwenye Yesu wawithana anamaharaye ni owoga egihina: “Ginoweddela thagaraga muthithi ola waathu, mwaha eli ni miyo malabo ala mararu teto kinna ethu yoojha. Miyo kaginafuna waruma ehijhile ethu,* ginoova enadha ekwe mudila.” 33 Nuwindo anamaharaye omukoha yegihina: “Mburo yola wahinakaliwa nnaafwanye waani pawu dhowakwana muthithi ola waathu?” 34 Vano Yesu wakoha egihina: “Munna pawu ngaasi?” Aliwa wakula: “Ninna tanu nabiili ni mwanahoba vang’ono.” 35 Vano nuuruma muthithi ole waathu okarati vati, 36 othukula pawu tanu nabiili ni mwanahobadha, nuumala olobela ogwaddanya ni wavaha anamaharaye vano anamaharaye ogawela muthithi waatene waali vevale. 37 Muthithi waatene ojha ni orubala, nuddoddela pawu dhahanle odhaala muddanga* mitanu na biili dhinlubale. 38 Yajhile yaali alobwana owakwana 4000, wahiya ahiyana naanamwani. 39 Nuumala opaganya muthithi ole waathu, ogwela mmwanddeyani ni ofiya murudda onithaniwa Magada.