Dhilibiwe ni Marku
1 Omambelelo wa muthenga dhapama dhinawoga wodhela Yesu Kiristu Mwaana a Mulugu: 2 Ninga dhilebiwe nnamavuhulela Izayiya egihina: “(Kasugwani! Ginere omuruma muthu osogolo weenyu,* wihina uwegeredheleni dila.) 3 Nihikala ndhu nnithana mwiddeddereni negihina: ‘Mmwegeredhele Yehova* dila! Moogolele dila yaye.’” 4 Juwawu namabaddiza aali mwiddeddereni, alaleyaga obaddiziwa watonyihedha othwaruwa ni oleveleliwa dhoothega. 5 Athu a murudda waatene woJudeya ni oJeruzale, yodhowa ogumana nuliye wihina ebaddiziwe* mwihinjhe woJordawu ewogaga dhoothega dhewa vaari vaathu. 6 Juwawu dhowara dhaye dhaali dha mooya a kamelu ni sintu na thebe noovadda, yoojha yaye dhaali kwaakwa* ni enwi yamukokolani. 7 Oliye alaleya egihina: “Ohukala muthu akopolo anadha osogolo waaga ogikwaranya miyo, teto miyo kaginafwanelela oworoma wihina gitapule sandaliya dhaye. 8 Miyo guubaddizani ni manjhe, mbwenye oliye aneere wubaddizani ni muzimu wotxena.”
9 Malabo yaale, Yesu okuma oNazare odhowa oGalileya, obaddiziwa ni Juwawu muhinjhe woJordawu. 10 Atavuwagawene mmanjheni odhulu wahifuguwa, vano oliye woona muzimu omukitelaga ninga kangayiwa. 11 Voharela nahikuma ndhu negihina: “Oyo di Mwanaga, ginamudhivelimi; ni ginamurumedhimi.”
12 Mohilegela muzimu omuthukulela mwiddeddereni. 13 Vano numala malabo 40 agaali mwiddeddereni, Ddiyabo omweha. Mwiddeddereni mmo mwahikala anenyama amukokolani, mbwenye angero yomukavihera.
14 Vano Juwawu nufugeliwa mukambura, Yesu odhowa oGalileya alaleyaga muthenga dhapama dha Mulugu 15 ni egihina: “Mudhidhi wajhehiwa ohufiya, Omwene wa Mulugu ohaddamela. Muthwaruwe, ni mukanne nroromelo ni muthenga dhapama.”
16 Eeddaga sere-sere ya niya yoGalileya, oliye omoona Simawu ni Andere ddibile Simawu yaareyaga mathaviwa muniya mwaha yaali anamatota* oba. 17 Nuwindo, Yesu wawaddela egihina: “Mugiharege, mwaha ginafuna mukale anamameza aathu.” 18 Mohilegela, aliwa wahiya mathaviwa omuharaga. 19 Vasogolova, oliye omoona Tiyago mwaana Zebedewu vamodha ni ddibile Juwawu egaali mmwanddeyani yasonaga mathaviwa, 20 mohilegela oliye wawithana. Nuwindo, aliwa omwihiya baabiwa Zebedewu mmwanddeyani vamodha nanamalaba ni omuharaga. 21 Aliwa odhowa oKafarnawu vamodha nuliye.
Vano nufiya nlabo na Sabadu, oliye ovolowa musinagoga ni wambela ohudhiha. 22 Muthithi waathu walivo otikina vanlubale mwaha makalelo aye oohudhiha, mwaha oliye ahudhiha oonihaga wi arumiwe ni Mulugu, mohiyana ni anamaleba. 23 Mudhidhi yoole musinagoga mwewa ahikalamo mulobwana dhaala oonihiwa goyi ni muzimu wabure, oliye okuwa egihina: 24 “Yesu Munazarenu onafuna ddi ni iyo? Wadhela onitolosa? Miyo gihunona pamadhene wihina oli oweela a Mulugu!” 25 Mbwenye Yesu omusumulula egihina: “Kamaalawo, kakumamo mmwiilini mwaaye!” 26 Vano muzimu ole wabure, ommothiha mulobwana ole ni okuwa vanlubale, nuwindo okumamo mmwiilini mwaaye. 27 Mowindala athu aatene otikina niile yapadduwe ni wambela wikoha vikaleliwa yegihina: “Elaya ddi? Makalelo maxa oohudhiha edhiile ovanene! Oliye ohukanna kopolo dhowigara muzimu dhabure teto aliwaya enomwiwelela.” 28 Nuwindo, dhithu dheriyena ovuwa mowaguva murudda dhaatedhene dhoGalileya.
29 Nukuma musinagoga aliwa odhowa vaade va Simawu, Andere, Tiyago vamodha ni Juwawu. 30 Mbogohaye Simawu aakinantile vakamani mwaha aanna nipanddawe,* aliwa omwaddela Yesu. 31 Oliye odhowa valiye ni omwihiddela nlada onvenyiha. Oliye ovulumuwa, nuumala odhowa wapiyela yoojha.
32 Vati vaajaga oriba, athu waadhowana areddiwa ni amodha yonihiwa goyi naademoniyu; 33 athu aatene a sidadi* yeele otugumana vamulago. 34 Nuwindo, oliye wavulumusa athu owinjhiva yanna dhiredda dhohiyana-iyana ni wawigara ademoniyu owinjhiva, mbwenye kaawenya wihina ewoge ethu mwaha yahinona wihina oliye di Kiristu.*
35 Mambesi nduwa nihinakume, oliye ovenya ni odhowa mburo wahaali athu, wambela olobela. 36 Simawu naathu amodha yaali nuliye odhowa onvedaga 37 aliwa nunfwanya, owoga yegihina: “Nabwiyani, athu aatene enna wuvedani.” 38 Mbwenye oliye wawakula egihina: “Ndoweni mburo mmodha, sidadi dhowaddamela wihina miyo galaleye, mwaha siyeyo gidhelimi.” 39 Oliye odhowa aalaleyaga musinagoga mwewa ni murudda dhaatedhene dhoGalileya awigaraga ademoniyu.
40 Agaali wengo, muliba maranya dhaala omwaddamela, omukokorela ni omuloba egihina: “Akala munoofuna, givulumuseni.” 41 Nuwindo, oliye omweddela thagaraga ni omutapulela nlada mulobwana ole, omudahinya ni owoga egihina: “Miyo ginofuna! Vulumuwa.” 42 Vohilegela maranya ale orimela, oliye ovulumuwa. 43 Nuumala, Yesu omuruma wihina adhowege 44 ni omwaddela egihina: “Pole-pole onaamwaddele muthu, mbwenye odhowe wagumane nnamakutha, ovelele nvaho wawo mowiwanana ni Malamulo a Moyizeji wihina aliwa ekanne onamoona.” 45 Mbwenye ahinasuse, mulobwana ole wambela ovuwiha ni wawaddela athu ele yampadduwele, ofiyedha Yesu ohukanna makalelo oovolowa musidadi, mbwenye akalesa ode mburo wahathabwesa ovira athu owinjhiva. Naarive dhigaali ndo, athu amurudda dhaatedhene yoodha mburo valiye.