Karta Nanabili na Peduru
3 Addibila oofuneya, nna karta nanabiili ginuulebelimini teto ninga karta nne noobajha guulebelimini, ginowuvenyihani wodhela wuwubusedhani wihina mubuwelege mwamakalelo apama, 2 ni mwawubuwelege madhu ewogiwe kale nanamavuhulela oweela ni Malamulo a Nabwiya ali Nvulusi ehu yawogiwe ni arumiwi enyu. 3 Voobajha munone wihina malabo ookuthula eneere okumelela athu oonyemula ni makalelo ewa oonyemula yeragana dhithudha mowiwanana ni efunelo yewa; 4 aliwa enerege owoga yegihina: “Ole aawogile wihina aneere ohogolowa ali waani? Okuma mudhidhi yoole ekwile makolwihu ofiyedha peeno, dhithudha kadhisadduwile dhili ninga dhaliwa okuma omambelelo.”
5 Mwaha aliwa ehipwaza yapudhave ebaribari ela yowihina: kale, yahikalawo elabo yodhulu ni yavati vano wodhela madhu a Mulugu elabo yavati ohiyanihiwa ni manjhe nuwindo okala vaari va manjhe; 6 wodhela dhithu dhendha elabo ya mudhidhi yoole yahifiyedha onongiwa manjhe nukunela elabo yaatene yavati. 7 Mbwenye wodhela madhu yaala mamodhave, elabo yodhulu ni elabo yavati eliwo peeno ekoyiwe wihina epahiwe ni mootho ni enna ojhehiwa ofiyedha labo nootoriha nnafuna otolosiwa athu abure.
8 Mowindala addibila oofuneya, kamuddiwale wihina: Vamentoni va Yehova* nlabo nimodha nili ninga yaka 1000 teto yaka 1000 dhili ninga labo nimodha. 9 Yehova* kanolegela* wakwaneliha mpaganyo waye, ninga athu amodha enubuweliwa, mbwenye oliye onovilela ni nyu, mwaha kanafuna wi muthu di muthu atolosiwe mbwenye anafuna wihina athu aatene ethwaruwe. 10 Labo na Yehova* nnadhe ninga mbava, labo nenno, odhulu winere ovira ninga ethu yoruma enavira mowaguva vano dhithu dhaatedhene dhigamanle oviha vanlubale dhineere onyunguluwa, mowindo dhithu dhaatedhene dhili elabo yavati dhinaakale vaddedderenivene.*
11 Woona wi dhithu dhaatedhene dhinere onyunguluwa, mubuwele emuthu baani munafuninyu okanna. Mukanne mweeddelo wapama ni mweregena dhithu dhinoniha wihina munomuroromela Mulugu, 12 wula mujhehaga ni mubuwelaga pamadhene nlabo na Yehova.* Labo nno odhulu winere ogujhuliwa ni mootho teto dhithu dhaatedhene dhoodhulu ni dha elabo yavati dhinere onyunguluwa mwaha oviha winlubale. 13 Mbwenye ehikalawo elabo yodhulu exa ni elabo yavati exa nnajhehihu ninga Oliye apaganyiliye, mwemmo munere okala wogowa.
14 Bumwahaya addibila oofuneya, woona wi munojheha dhithu ndha, mwilibihedhe wihina oliye ufwanyeni mwahinna malemba newene nihonya mbwenye muganna murenddele. 15 Ohiya eyo, moonege ovilela wa Nabwiya ninga ovulusa, ndala ninga ddibilihu oofuneya Pawulo uulebeliyeni mowiwanana ni thotho aavahiwiye, 16 awogaga dhithu ndha, ninga aneriyena mmakartani maatene analebiye. Mowindala, dhithu dhimodha dhilebiliye dhinorusa woonelamo teto dhithu dhendha athu ehisuzile ni ehinna nroromelo nooliba enna oviriganiha ninga eneriwana ni Dholebela dhimodha, yitotelaga otolosiwa wewa.
17 Bumwahaya addibila oofuneya, woona wi nihinona dhithu ndha mutaneene, mukale pasope wihina dhowera dhaathu enaalupa malamulo dhinuholoseni ni dhinumothiheni. 18 Ohiya eyo, mudidele wunnuwa ni opama wohinifwanelela ni enonelo ya Nabwiya ehu ni Nvulusi Yesu Kiristu. Nthithimiho naatenene avahiwe oliye ovanene ni mukalakala. Amem.