Dhilebiwe ni Lukaji
12 Labo dhaala, muthithi ni muthithi waathu nutugumana ofiyedha onyingalanaga mmodha ni mukwaye, Yesu wambela owoga, voobajha owoga ni anamaharaye egihina: “Pole-pole ni emela yaafarizewu wili oleketha. 2 Mbwenye kayiwo ethu yowipiteya ehinooneye, newene kayiwo ethu yoviteya ehinadha enoniwa. 3 Mowindo dhithu dhaatedhene munawoginyu oyiihini dhinere wiweya vowara, teto dhithu munanong’oninyu mugaali okwartu weenyu dhinere olaleyiwa vadhulu va nyumba. 4 Ohiya eyo, akwaaga miyo ginowuwaddelani gegihina: Kamwawove athu enapa mwiili baahi, yindo kinanda werana ethu emodha. 5 Mbwenye miyo ginere wuwaddelani muthu munafuninyu omoova, mmoovege ole ani upani anna owedha wowuvokedhani ojhehena.* Hee miyo ginowuwaddelani gegihina: Mmoovege yoyo. 6 Kadhinagulihiwa pera tanu ni korowa* biili dha muthengo vang’ono? Naarive dhigaali ndo newene modha kinaddiwaliwa ni Mulugu. 7 Teto mathithi ammuruni mweenyu ehimala okontariwa. Bumwahaya kamoove; nyu muhukanna thima okwaranya pera dhowinjhiva.
8 “Miyo ginowuwaddelani gegihina: Muthu yoole anaarumedhe vaari vaathu wihina ali mwimodhani ni miyo, Mwaana Muthu aneere omurumedha vamentoni vangero a Mulugu wihina ali mwimodhani nuliye. 9 Mbwenye muthu yoole anagikodde vamentoni vaathu aneere okoddiwa vamentoni vangero a Mulugu. 10 Teto ole anaamuwoge obure mwana muthu aneere oleveleliwa mbwenye ole anaruwane muzimu wotxena kanaaleveleliwe. 11 Yuthukulelani mburo vinatugumana athu owinjhiva,* mmadani mwa guvernu obe mwa anamathonga kamuthuwathuwe ni ethu munafuninyu owoga wihina mwiwakihedhena newene makalelo munafuninyu owoga. 12 Mwaha mudhidhi yoyo muzimu wotxena onere wuhudhihani ethu munafuninyu owoga.”
13 Vano Muthu mmodha a muthithi yoole omuloba Yesu egihina: “Namahudhiha, kamwaddeleni ddibilaga wihina nigawane dhithu enihiyendhe makolwihu.” 14 Oliye omwakula egihina: “Mulobwana, baani agithomile okala namatoriha obe agivahile ofuru wowugawelani nyu aabilene dhithu yuhiyedheni makolwinyu?” 15 Nuwindo oliye owoga egihina: “Mwafugule mento ni murabele makalelo aamatene anrima mwaha naarive muthu akanne dhithu dhowinjhiva, dhithu ndho kadhinavaha egumi.” 16 Numala, oliye wawaddela yoladdaniha emodha egihina: “Mulobwana dhaala ooreela, munddaye okumiha dhoojha dhowinjhiva. 17 Mwaha wa yeyo oliye wambela wubuwela mmurimani mwaaye egihina: ‘Kivano ginere ddi woona wihina kaginna mburo wowugelavo dhoojha dhaaga?’ 18 Oliye owoga egihina: Eyaa vano gihubuwela: ‘Ginafuna gigujhule dhiringwi dhaaga ni gimage dhinlubale, mwemmo ginere wugelamo dhoojha dhaaga dhaatedhene ni dhoreela dhaaga; 19 ni ginere* owoga gegihina: “Ohuthabwa* wugela dhithu dhowinjhiva dhapama dhinaamale yakadhene, kithuwa, ojhe, ong’we ni waaredhe.’” 20 Mbwenye Mulugu omwaddela egihina: ‘Taduwawe mahiyu apeeno onere oyelela egumawo,* ki dhithu wugenliwe dhinaahale nnani?’ 21 Siyeyo enapadduwa ni muthu aniwugelela dhoreela, mbwenye vamentoni va Mulugu kahi muthu ooreela.”
22 Oliye wawaddela anamaharaye egihina: “Bumwahaya nguwaddelani gegi: Kamuthabwege othuwathuwela egumi* yenyu mubuwelaga ethu munafuninyu ojha, ni ethu munafuninyu owara 23 mwaha egumi* sathima okwaranya yoojha, teto mwiili bwathima okwaranya yowara. 24 Kaasugweni anaakungu, kinaala, kinahadda newene kinalogolela dhoojha vasasarani mbwenye Mulugu onowajhiha. Nyu ni balame anna thima baani, kahiyo nyu? 25 Baani wa nyu athabwa othuwathuwa ananda wenjhedhedha egumaye labo nimodha* nokalawo? 26 Mowindala akala nyu kamunanda werana ethu eng’ono, mwahaya bwaddi mugathuwathuwela dhithu dhimodha? 27 Kasugwani folori dha mukokolani makalelo dhinunnuwiwa kadhinalaba newene kadhinisonela dhowara; mbwenye miyo ginowuwaddelani wihina Salomawu mumweneni mwaaye kanawarege guwo dhowoma akwaranya folori. 28 Kito akala Mulugu anowanda owariha folori dha mukokolani dhinakalawo labo nimodha mangwaana opahiwa, kanuwariheni nyu athu ooyeva nroromelo? 29 Muhiye othuwathuwela dhithu munafuninyu ojha ong’wa ni kamuthabwege othuwathuwa; 30 mwaha enathuwathuwela dhithu dhaatedhene ndha baathu amwilaboni, mbwenye Baabinyu oodhulu ohunona wi munohowela dhithu ndha. 31 Ohiya eyo, mudidele waaja Omwene waye, vano dhithu ndha munere wenjhedhedhiwa.
32 “Nyu nikuru ning’ono, kamoove mwaha Baabinyu ohuhagalala wuvahani Omwene. 33 Mugulihe dhithu dhenyu korowadha mwavahe* aliba oohawa. Mwasasanye mathumba akorowa ehinataala, muugele dhoreela dhenyu odhulu wengo wihinafiya ambava newene wihili mukwita. 34 Mwaha vinakala dhoreela dhawo murimawo onakala venvo.
35 “Mukale owarene* ni owiwegeredhene, teto malampadinyu ekale ohiddeene, 36 mukale ninga athu enamujheha nabwiyiwa anadha omateloni, wihina oliye afiya ni avada musiwo munfugulele mowaguva. 37 Oohagalala baadhaari ale eni nabwiyiwa afiya anaafwanya esugweraga! Ginowuwaddelani ebaribari gegihina: Oliye aneere owara dhowara dhaye, akarati vameza ni amugawelege dhoojha. 38 Oohagalala bi adhaari yayo, enafwanyiwe erulo yanabiili* ni yanatharu* egaali owiwegeredhene! 39 Mbwenye munone wihina muliba vaade ahanone mawora anaadhe mbava, kahiye nyumbaye okupuliwa. 40 Ni nyunwa kamugonelevo, mwaha Mwaana Muthu anadha mawora mwahijhehedhinyu.”
41 Peduru omukoha egihina: “Nabwiya, nladdaniho nna munaniwogela iyo, obe thaathu aatene?” 42 Vano, Nabwiya owoga egihina: “Mudhaari oororomeleya ni athotho, nabwiye anaamuthomiye wihina aakabelelege ale enamulaba ni aavahege yoojha mudhidhi wofwanelela baani? 43 Oohagalala di mudhaari yoyo nabwiye aadhaaga ananfwanyiye aaparaga mabasa yayo! 44 Ginowuwaddelani ebaribari: Oliye aneere omuhiyedha dhoreela dhaye dhaatedhene. 45 Mbwenye mudhaari oyo awoga mmurimani mwaaye egihina: ‘Nabwiyaaga onolegela odha’ ni ambela wawukutha adhaari akwaye aalobwana ni aahiyana, ajhaga, ang’waga ni alezelaga, 46 nabwiya a mudhaari ole anaadhe labo ahajhehedhiye ni mudhidhi ahinonniye, vano oliye aneere omusinyusa nimakalelo abure ni aneere onvokedha mburo waathu oohuroromeleya. 47 Mowindala, mudhaari ole aanonne efunelo ya nabwiye, mbwenye kiiwegeredhe newene kenrena ethu aamulombiye,* aneere wawakela mapi owinjhiva. 48 Mbwenye ole ahonelemo efunelo ya nabwiye ni afwanelela osinyusiwa, kanawakele mapi owinjhiva. Ohiya eyo, ole anaavahiwe dhithu dhowinjhiva aneere okukusiwa vanlubale, teto ole anahiyedhiwe dhithu dhowinjhiva aneere okukusiwa okunamo.
49 “Miyo gaadhele ohiddiha mootho* mwilaboni yavati, akala ohumala ohidda ki ethu baani emodha ginafunimi wera? 50 Mwebaribarene, gihikanna batijimu ginafunimi obaddiziwana, teto gihisimwela ofiyedha wakwanela! 51 Nyu munubuwela wihina gadhana murenddele elabo yavati? Miyo ginowuwaddelani gegi, naari! Miyo gadhela omwalaniha. 52 Mowindo, obajha peeno odhowa osogolo, nyumba emodha vinerege widdana athu atanu, amodha enerege wawidda akwiwa: Araru yawiddege abiili, abiili yawiddege araru. 53 Enere ogawanyeya, baabi amwiddege mwanaye a mwana mulobwana, mwaanaya awiddege ababe, mayi aneere omwidda mwanaye a mwanamuhiyana, mwaanaya awiddege amaye, nzaliye anerege omwidda nzaliyaye.”
54 Nuwindo, Yesu owoga ni muthithi ole waathu egihina: “Nyu moona murabo dhikumaga omadhelo nduwa munowoga mwegihina: ‘Aneere okalawo muzongwe a nipevo’ yindo enopadduwa. 55 Teto, nyu moona nipevo ndhelaga omayelo nduwa munowoga mwegihina: ‘Winere okala oviha’ yindo enopadduwa. 56 Anamaleketha nyu! Nyu muhunona opendda pamadhene makalelo enakala elabo yavati ni yodhulu, mbwenye kamunawedha opendda mudhidhi ola nilihu? 57 Mwahaya bwaddi kamunitoriha mwaannya wodhela ele eli yowogowa? 58 Motajhiha, wakala ni mwiddani awo mugaali mudila mudhowaga otiribunale, mutxokotxele muladdu munninyuna, wihina oliye ahupeleke mmadani mwanamatoriha, vano anamatoriha yupeleke mmadani mwasupayi yindo asupayi yuvokedhe mukambura. 59 Ginowuwaddela ebaribari: Kunaatapuliwe ohulinve korowa* yaatene onniwena.”