Akudda Filipense
4 Mowindala, addibilaga ginathabwimi wudhivelani ni ginnimina munukwela, ohagalala waaga ni mareeliho a mabasaaga* di nyu, mwilibihedhe weedda mwa Nabwiya.
2 Ginomukongomedha Evodiya ni Sintiki okanna mubuwelo mmodhave mwa Nabwiya. 3 Ni ginowuloba ni weya mukwaaga eebaribari nnaparihu mabasa vamodha, kuselele wakavihera ahiyana ayo yilibihedha vanlubale olaleya muthenga dhapama ni miyo vamodha ni Kelementi ni akwaaga amodha mandiniwaya elebiwe mulivuruni neegumi.
4 Muhagalalege mwa Nabwiya malabo aamatene. Ginohogolowela gegi: Muhagalalege! 5 Okweya weenyu winoniwe naathu aatene. Kamuddiwale wihina Nabwiya uhaddamela. 6 Kamuthuwathuwelege ethu-siithu, mbwenye mwa dhaatedhene, mulobelege nuubebedha, vamodha nuutamalela, mmwaddelaga Mulugu dhooloba dhenyu; 7 vano, murenddele wa Mulugu onapitha enonelo yaathu, onere okurumusa murima ni mubuwelo weenyu wodhela Kiristu Yesu.
8 Vano addibila, dhaatedhene dhili dhebaribari, dhili dhohoweleya, dhili dhowogowa, dhili dhoweela, dhili dhodhivela, dhinawogiwa pama, dhili dhofwanelela, ni dhaatedhene dhili dhothithimiheya, mudidele wubuwela dhithu dhendha. 9 Mweregena dhithu muhudherinyu, mwakenlinyu ni mwiwalinyu ni miyo, ni ndhedha mugoonilinyu geeragana, vano Mulugu a murenddele aneere okala ni nyu.
10 Miyo ginohagalala vanlubale mwa Nabwiya mwaha vano, muhambela ogubuwela. Naarive mugithuwathuwelaga, muhumala mudhidhi wowinjhivene muhandaga woniha efunelo eyo. 11 Kaginawoga ndo mwaha wohaleliwa dhithu, mwaha gihudhera okalawo ni yeele ginnimina mudhidhi waamutene. 12 Gihinona okalawo ni dhego vang’ono ni gihinona okalawo ni dhego dhowinjhiva. Mwadhaatedhene ni mudhidhi wamutene gihudhera yoviteya elivo wodhela okanna yoojha ni ovoliwa dala, okanna dhoreela ni ohawa. 13 Mwadhaatedhene gihikanna kopolo mwaha wa ole anagivaha kopolo.
14 Mbwenye nyu, muheriha pama ogikavihera mmakathamihoni mwaaga. 15 Mwebaribarene nyu akudda Filipense, muhunona wihina numala wiwa muthenga dhapama dila yoobajha, miyo nukuma oMasedoniya kawo mulogo mmodha wagikavihera ni warumedha wakela nikavihero naaga, ohuli weenyu; 16 mwaha miyo ngaali oTesalonika, nyu mwahivahedhela ethu wihina mugikaviherana dhohowela dhaaga, ohiya dila modha mbwenye muherana dila biili. 17 Kahiyo wihina miyo ginasayela ovahiwa mukono, mbwenye ginafuna mwaakele yowima enadhela mwaha nyu okala athu oovaha. 18 Mowindala, vano gihikanna dhaatedhene gahowelimi, teto gihikanna okunamo. Vano dhihigakwana, mwaha ndhe mmwinkelelinyu Epafroditu wihina adhena, mukutho onarumedhiwa, wonukwela ni onamuhagalasa Mulugu. 19 Mulugu aaga aneere wuvahani dhithu dhaatedhene munahowelinyu mowiwanana ni dhoreela dhaye dhothithimiheya, wodhela Kiristu Yesu. 20 Mulugu ehu ali Baabi, athithimihiwege ni mukalakala. Amem.
21 Mwafiyihedhe malojhelo aaga oweela aatene eli mwimodhani ni Kiristu Yesu. Addibila eli vamodha ni miyo, enowaaruma malojhelo ewa. 22 Oweela aatene, thabwa-thabwa ale enakala vaade va Sezare, enowaaruma malojhelo.
23 Opama wohinifwanelela wa Nabwiya Yesu Kiristu, oreelihe makalelo eenyu apama owubuwela.