Karta na Tiyago
1 Miyo Tiyago, mudhaari a Mulugu ni a Nabwiya Yesu Kiristu, ginaalebela mahimo 12 eli mburo dhohiyana-iyana:
Malojhelo!
2 Addibilaga, muhagalalege mwaafwanyiwaga dhoweha dhohiyana-iyana, 3 mwaha nyu muhunona wihina nroromelo neenyu nehiwaga nnooliba ni munohudhera okala oovilela. 4 Mowindala muhiye wi ovilela wamarihe waapara mabasa ewa, wihina mukale owakwanelene ni muhinna nihonya mwadhaatedhene, mwahijhombeliwaga ethu.
5 Bumwahaya, akala ohukalawo muthu anahowela thotho adidele omuloba Mulugu, mwaha oliye onowavaha athu aatene mwamahala ni kanamusumulula ole analoba, aneere onvaha. 6 Mbwenye adidele oloba ni nroromelo, ahanganyedhaga ethu, mwaha muthu yoole ananganyedha analigana ni otekuma wa niya nipevo nnathukuleliwa mburo onafuniwa. 7 Mwebaribarene muthu yoyo kajhehedhe wakela ethu enadha wa Yehova;* 8 mwaha oliye dowanganyedha,* kanaliba osaddula dhothoma dhaye mwa dhaatedhene aneriyena.
9 Mbwenye ddibila ohaawa* akale oohagalala mwaha Mulugu onomuthithimiha vamentoni vaye, 10 teto ooreela ahagalale mwaha wohudhera okala owiyeviha; woona wihina muliba oreela aneere onyaala ninga folori dha mukokolani. 11 Mwaha nduwa nakuma nnoopaha vanlubale ofiyedha wanyaaliha makupu, vano foloridha omoramo, owomawa wule ogomawo. Ni makalelo mamodhave, muliba oreela aneere okwa ni malonddayene.
12 Oohagalala duule anaadidele ovilela naarive afwanyiwaga yoweha, mwaha aanda ovilela aneere wakela kara yegumi, Yehova* aapaganyiliye ale yahinahiye omudhivela. 13 Muthu akala vaari va yoweha, ahiwoge egihina: “Ginna wehiwa ni Mulugu.” Mwaha Mulugu kanehiwa ni dhithu dhabure, newene oliye kanamweha muthu ni dhithu dhabure. 14 Mbwenye, kadda muthu aneehiwa ni analekethiwa ni munigwa wa mmurimani mwaaye. 15 Vano munigwa ole wamunyowela, winomuthukulela werana yoothega; yoothega ele yereya enomuthukulela omakwelo.
16 Kamulekethiwe addibilaga ginathabwimi wudhivelani. 17 Nvaho dhaatedhene dhapama ni dhologomana dhinadhela odhulu, dhinakita wa Baabi apaddusile dhomoneyela dhaatedhene dhodhulu, yoyo ahinasadduwa ninga murunti ohunaliba otama. 18 Oliye dithomile wihina nikale anaaye mwaha iyo waroromela madhu aye eebaribari, nimakalelo yaala nikale namulibu a dhopaddusa dhaye.
19 Munaaddiwale madhu ala addibilaga a vati vamurima: Kadda muthu aaguvelege wiiwa mbwenye kathamagelege owoga ni kaaguvelege otakaleliwa; 20 mwaha owali wa muthu kunamuthukulela werana dhithu dhiniwanana ni wogowa wa Mulugu. 21 Bumwahaya, muhiye dhikalelo dhaatedhene dhonyakavala ni dhithu dhaatedhene dhabure, nuwiyeviha murumedhe wihina Mulugu aapwehe madhu aaye mmurimani mweenyu, yayo enna kopolo dhowuvulusani.
22 Mowindala, mweregena yeele madhu enawogiiwa, ohiya okalaga wiiwave baahi, wula mwilekethaga ni mubuwelo wowoota. 23 Mwaha akala muthu onowavuruwana madhu enawogiiwa mbwenye kanavirihamo, analigana ni muthu aniiwang’ana kove yaye muspelyuni. 24 Oliye aniiwang’ana mudhidhi yoole baahi, amala onodduwala makalelo aliye. 25 Mbwenye ole anapwasedha opendda nlamulo noologomana nenno nnadhana ofuru ni adidela ohara, kanaakale ninga muthu ole ahinaliba odduwala dhithu iwaliye, mbwenye anaakale muthu anaparihedha mabasa dhithu aniiwiye, bumwahaya dhowera dhaye dhinerege omuhagalasa.
26 Akala muthu anubuwela wi onomwebedha Mulugu wula ahinonne osugwera nlumi naye, analeketha murima waye teto webedha waye kunna mabasa. 27 Makalelo apama owebedha eli oweela ni ohukanna nihonya vamentoni va Mulugu ehu ni Baabihu, baala: wasamalela anakwadhuni ni amamukwele mmakathamihoni mwewa ni ohukanna nihonya neelabo.