Karta Noobajha Na Peduru
5 Mowindo, miyo namaholela mukwinyu gili namoona a goyi oonile Kiristu ni anaakele nthithimiho nimodhave nnafuna woneyihiwa, ginowaloba anamaholela eli vaari veenyu wihina: 2 mwakukulege mambila a Mulugu, muhiyedhiwinyu mmadani mweenyu wihina mwasamalelege, mulabaga ninga anamaholela mohuwaddihedhiwa, mweregena ni murima weenyu waatene, mwahijhehaga opurelavo ethu-siithu, mbwenye nuuhagalala. 3 Kamwaathongege ninga mambilaya beenyu mwaha mwinnyaya di Mulugu, mbwenye mukale yotajhiha yapama vamentoni vewa. 4 Vano namakukula munlubale ooneyihiwa, nyu muneere waakela kara ya nthithimiho ni ehinanongeya.
5 Nimakalelo mamodhave, nyu azombwe, mwawiwelelege athu eli anlubale* wupithani nyu. Nyu aatene mukale athu owiyeviha mmodha ni mukwaye, mwaha Mulugu onowawidda athu owithukula mbwenye onowavaha opama wohinifwanelela athu owiyeviha.
6 Mowindala, mwiiyevihe vamentoni va Mulugu akopolo,* wihina oliye uwunnuwiheni* mudhidhiya wakwanela. 7 Nvokedheni Mulugu dhithu dhaatedhene dhinuthuwathuwihani, mwaha wi oliye anowupwathani. 8 Mukanne mubuwelo wapama ni mwisugwerege! Mwaha mwiidddani enyu Saddana anna wusayelani, angoromaga* ninga poddogoma, anvedaga muthu wihina amutakune. 9 Mbwenye mukanne nroromelo nooliba wi mwande owana nuliye, munonaga wi addibilinyu eelabo yaatene yavati enna ofwanyiwa makathamiho mamodhave. 10 Mowindala, mwamala woona goyi mudhidhi mung’nove, mwinnyene Mulugu anna opama wohinifwanelela uwithanneni wihina mukale mwimodhani ni Kiristu ni mwaakele nthithimiho naye namukalakala, aneere omala wuhudhihani. Oliye aneere wulibihani, aneere wuvahani kopolo ni aneere wukaviherani okala txithi. 11 Kopolo saye ni mukalakala. Amem.
12 Wodhela Silvanu, ginamoonimi ninga ddibila oororomeleya, ginowulebelani karta nna mwa makalelo oogwaddela wihina gulibiheni ni guroromeliheni wihina wula fupama wohinifwanelela weebaribari wa Mulugu. Mparele pamadhene ni kopolo dheenyu. 13 Muhiyana* anakala oBabiloniya asakuliwe ninga nyu, onowaruma malojhelo teto mwanaga Marku nuliyeya onowaruma malojhelo. 14 Mulojhelanege mmodha ni mukwaye ni beju* yooddibila.
Murenddele okale ni nyu aatene muli mwimodhani ni Kiristu.