Ovuhulela wa Juwawu
21 Nuwindo, miyo woona elabo yodhulu exa ni elabo yavati exa, elabo yodhulu yakale ni elabo yavati yakale yahivira teto niya kayaliwo. 2 Ohiya eyo, gihoona luwani yoweela, Jeruzale muxa, akitaga odhulu adhaaga wa Mulugu owiwegeredhene ninga namwali amanle wiwomihedha wihina amwaakele mamune. 3 Nuwindo, miyo wiwa ndhu nootaama ndhelaga vampaddoni voomwene negihina: “Kasugwa! Musasa wa Mulugu oli naathu oliye aneere okala naaliwa, aliwa enaakale nlogo naye. Vano Mulugwene aneere okala naliwa. 4 Oliye aneere ofufutha mitori dhaatedhene mwintoni mwewa, kawinadha wikala okwa, wunla, okubanya newene obulela. Dhego dhamundduli dhihivira.”
5 Vano ole aakaratile vampaddoni voomwene owoga egihina: “Kasugwa! Ginna osaddula dhithu dhaatedhene wihina dhikale dhixa.” Oliye wenjhedhedhave egihina: “Kaleba, mwaha madhu ala boororomeleya ni beebaribari.” 6 Oliye ogaaddelave egihina: “Ehakwanela! Miyo gili Alfa ni Oomega,* oobajha ni oogomihedha. Muthu yoole anakanne nthona gineere onvaha mwamahala manjhe enakuma vaneeddudduni anavaha egumi. 7 Muthu yoole anaagonjhihe aneere ohalana dhithu ndha; vano miyo ginere okala Mulugu aye, oliye aneere okala mwanaga. 8 Mbwenye athu owoova, ehinna nroromelo, athu ootakala enerana dhithu dhonyakavala, anamapa, athu enawerana mararuwo,* enawerana masenga, enebedha dhikwamuthu ni aliba woota aatene, eneere ovokedhiwa nthiya nnahidda mootho ni enxofere. Nthiya nna nnatapulela okwa wanabiili.”
9 Mungero mmodha wa angero ale 7 gawonilimi egaparele mapusulano 7 mwadhanle mulili 7 dhogomihedha, odha ogaaddela egihina: “Kadhawuno guwoonihe namwali anafuna oteliwa, mwariye Nimbila.” 10 Vano, ni kopolo dha muzimu wotxena, oliye ogithukulela mwango munlubale ni wootaama, nuwindo ogitonyihedha luwani yoweela yoJeruzale, ekitaga odhulu wa Mulugu 11 ni nthithimiho na Mulugu. Ojerimelawa wakala ninga nibwe nathima, ninga nibwe na jaspe nowooneela ninga kiristale.* 12 Luwaniya yahikanna txinga enlubale ni yootaama teto yahikanna musiwo 12, kadda musiwo vahikala mungero mmodha ni vahilebiwa mandina a mahimo 12 aamwaana Ezarayeli. 13 Omadhelo nduwa wahikala musiwo miraru, epaddi yoomwango wahikala musiwo miraru, epaddi yooti wahikala musiwo miraru, teto omayelo nduwa wahikala musiwo miraru. 14 Txinga ya luwani ele yahikanna mabwe 12 aaliserse, mmabweni mmo mwahilebiwa mandina aarumiwi 12 a Mwana Nimbila.
15 Ole awoga ni miyo ahipareela epano yopimana, mutati wa woru wihina apimena luwani, musiwodha ni txingaya. 16 Luwaniya yanna dhipaddi nayi, olapawa ni orambalalawa wera oligana. Oliye opima luwani ele ni mutati wakwana 12 000 estadiyu;* olapawa, orambalalawa ni otaamawa weera oligana. 17 Voharela, oliye opima txingaya wakwana: 144 kovadu* mowiwanana ni mpimo wamuthu teto mudhidhi mmodhave oli mpimo wamungero. 18 Txingaya yaamagiwe ni mabwe a jaspe teto luwaniya yaamagiwe ni woru yapama ni yowonela ninga viduru. 19 Alisersi a txinga ya luwani ele aamagiwe ni mabwe aatene athima: alisersi oobajha aamagiwe ni mabwe a jaspe; anabiili ni safira; anatharu aamagiwe ni kalsedoniya; anennayi aamagiwe ni esmeralda; 20 anetanu aamagiwe ni sardonika; anetanu nammodha aamagiwe ni sardiyu; anetanu nabiili aamagiwe ni kirizolitu; anetanu natharu aamagiwe ni berilu; anetanu nennayi aamagiwe ni topaziyu; aneekumi aamagiwe ni kirizoprazu; aneekumi nammodha aamagiwe ni Jasintu; a neekumi nabiili aamagiwe ni mabwe a ametista. 21 Ohiya eyo, musiwodha 12 dhaasasanyiwe ni mabwe a peerola* 12; kadda musiwo wasasanyiwe ni peerola modha. Teto dila enlubale ya luwani ele yasasanyiwe ni woru yapama yowooneela ninga viduru.
22 Kagonilemo tempulu mwaha Yehova* Mulugu Akopolo Dhaatedhene dili tempuluya vamodha ni Mwana Nimbila. 23 Luwaniya kinahowela nduwa obe mweri wihina omoneyelegemo, mwaha nthithimiho na Mulugu thinamoneyelamo, teto lampadana di Mwana Nimbila. 24 Malogo eneeddege emoneyeliwaga ni waara wa luwani eyo teto mamwene eelabo yavati eneere odhanamo nthithimiho newa. 25 Ni mutana musiwodha kadhinafugiwege mwaha kamunakalege yiihi. 26 Nthithimiho ni ovuwa wa malogo oneere odhiwana muluwani. 27 Mbwenye dhithu dhaatedhene dhotakala newene muthu yoole aneerana dhithu dhonyakavala ni dholeketha kanadha avolowamo; enaavolowemo baahi baathu yaale Mwana Nimbila aalebiliye mulivuruni neegumi.