Dhilebiwe ni Matewuji

26 Vano Yesu nuumala owoga dhithu ndha dhaatedhene oliye wawerela anamahara aye egihina: 2 “Nyu muhunona wihina ehanle malabo menli wihina ajhiwe Paskwa, ni Mwaana Muthu apelekiwe wihina apiwe vantxikwani.”

3 Vano anddimuwa aanamakutha ni anamaholela a nlogo otugumana vathaddo va namakutha munlubale ithaniwa Kayifaji, 4 ompanganela nuuxaga wihina emuhidde* Yesu ni empe. 5 Mowindala yowoga yegihina: “Kanimuhidde mudhidhi wa mathanga, wihina nnatatamule muladdu ni nlogo.”

6 Yesu agaali oBetaniya vaade va Simawu muliba maranya, 7 muhiyana dhaala omwaddamela agaparele garafwa na alabasturu mwaali makura oonukwela ni ookwima vanlubale, vano oliye wambela omukuthulela vamuru vaye wula Yesu ajhaga.* 8 Anamahara aye nuumona eragana ndale aliwa otakaleliwa ni owoga yegihina: “Munanongela ddi makura ayo ebewene? 9 Mwaha makura ayo yeere ogulihiwa korowa yapamene, vano korowaya evahiwe aliba oohaawa.” 10 Nuwawiwa madhu yaawogiwa, Yesu owoga egihina: “Mwahaya bwaddi mugamunyonya muhiyana ola? Ethu agereliye sapama. 11 Mwaha nyu malabwene munookalesa naaliba oohaawa, mbwenye miyo kaginakalege ni nyu malabo aamatene. 12 Muhiyana ola ohugithela makura ala oonukwela wihina agegeredhe mudhidhi gadhowaga okoyiwa. 13 Ginowuwaddelani ebaribari: Mburo bu mburo winalaleyiwe muthenga dhapama wapela elabo yaatene, ethu erilena muhiyana ola enere owogiwa ubuweliwaga oliye.”

14 Vano mmodha wa anamahara yaale 12 ithaniwa Judasi Iskariyoti odhowa wa anddimuwa aanamakutha 15 ni owoga egihina: “Munaagivahe ddi gampeleka mmadani mweenyu?” Aliwa wiwanana onvaha korowa 30 dha parata. 16 Okuma labo nenne odhowa osogolo osayelaga mudhidhi wofwanelela wihina amugulihe.

17 Labo noobajha na Mathanga a Pawu dhohikanna Emela, anamahara aye omwaddamela Yesu ni omukoha yegihina: “Munafuna wihina nawegeredhe waani mathanga a paskwa?” 18 Oliye wawakula egihina: “Mudhowe musidadi, munonfwanya mulobwana dhaala mmwaddele mwegihina: “Namahudhiha awogile egihina: ‘Mudhidhi waaga ohaddamela; ginafuna gimujhe paskwa naanamahara aaga vaade vawo.”’” 19 Vano anamahara aye werana dhaatedhene awaddele Yesu ni wegeredha yoojha ya paskwa.

20 Vati vigarimbe, oliye okarati vameza naanamaharaye 12. 21 Vano ejhaga oliye wawaddela egihina: “Ginowuwaddelani ebaribari, mmodha wa nyu aneere ogiguliha.” 22 Nuwawiwa madhu yaala, aliwa wukuuwa vanlubale, kadda muthu obajha omukoha egihina: “Nabwiya, nerege di miyo?” 23 Oliye wawakula egihina: “Yoole anajha ni miyo mutijelani* muna dinagigulihe. 24 Ebaribari, Mwaana Muthu anodhowa, ninga dholebela dhinawogiwa wodhela oliye, mbwenye ginomukubanyedha ole anamugulihe Mwaana Muthu! Yaakale yapama muthu yoyo ahere ahibaliwawene.” 25 Judasi ahanle neena numuguliha omukoha egihina: “Gerege di miyo Rabi?” Yesu omwakula egihina: “Diweene owonge yekawo.”

26 Ejhagave, Yesu othukula pawu, olobela, nuwindo ogwaddanya wagawela anamahara aye egihina: “Kathukulani mujhe, ela enatapulela mwiili waaga.” 27 Ni werana emodhave, othukula kopo olobela ni wavaha aliwa egihina: “Mung’we aatene nyu, 28 ela enatapulela ‘nikame naaga na nipangano’ nnakuthuliwe ni nnakavihere athu owinjhiva wihina eleveleliwena dhoothega. 29 Mowindala ginowuwaddelani gegihina: Kaginadha gimuhogolowela omung’wa vinyu anakuma muthanko wa uva, ofiyedha labo ginadhimi gimung’wa vinyu muxa vamodha ni nyu Mumweneni mwa Ababa.” 30 Numala wiiba jhibo, aliwa odhowa Mwango Woolivera.

31 Vano Yesu wawaddela egihina: “Emahiyu yeela nyu aatene munere okwakwathuwa wodhela miyo, mwaha dholebela dhinawoga dhegihina: ‘Ginere omporosa namakukulaya vano mambilaya ebalalesiwe.’ 32 Mbwenye gavenyihiwa muukwani, ginere ogumana ni nyu oGalileya.” 33 Vano Peduru omwakula egihina: “Naarive aatene ekwakwatuwe wodhela ele enafuna wupadduwelani miyo kaginadha gikwakwathuwa!” 34 Yesu omwaddela egihina: “Ginowuwaddela ebaribari: Emahiyu yeela mutubi ahinunle onere ogikoodda dila tharu.” 35 Peduru omwakula egihina: “Naarive ehoweleyaga okwa vamodha ni nyu miyo kaginukoddeni.” Anamahara amodhaya owoga emodhave.

36 Yesu ofiya naaliwa mburo dhaala onithaniwa Jetisemani ni owoga naanamahara aye egihina: “Mukarati vevala, miyo ginaya wule galobele.” 37 Vano oliye omuthukula Peduru ni amwaana Zebedewu abiili, wambela wukuuwa ni osimwela vanlubale. 38 Oliye wawaddela egihina: “Gihithabwa* wukuuwa gihanle vang’ono wihina gikwe. Muhale vevala ni mukale mento vamodha ni miyo.” 39 Nususedha vang’ono osogolo oliye okokora, oworomela vati ni olobela egihina: “Babani, kamwerena. Dhenyeya susihani kopo ela vamentoni vaaga. Kayereye efunelo yaaga mbwenye yereye efunelo yenyu.”

40 Oliye ohogolowela vaali anamahara aye ni wafwanya egonaga, ni owoga ni Peduru egihina: “Nyu kamwandile okala mento vamodha ni miyo newene wora modha? 41 Mukale mento ni mudidele olobela wihina munamorele muwehiwani. Ebaribarene muzimu onofuna,* mbwenye mwiili oli wokwerebeyene.”* 42 Dila yanabiili oliye osusavo ni olobela egihina: “Babani akala kinenyeya osusihavo kopo ela vamentoni vaaga gihing’wile, yereye efunelo yenyu.” 43 Ohogolowa dila yanabiili, waafwanya egonaga mwaha mento yera wanyemela. 44 Osusavo dila yanabiili ni olobela dila yanatharu, aavirisedhaga madhu mamodhave. 45 Ohogolowela waali anamahara aye ni wawaddela egihina: “Mudhidhi ninga yola munoogona ni munna withuwa! Kasugwani! Onna waddamela mudhidhi Mwaana Muthu anafuniye opelekiwa mmadani mwa anamathega. 46 Kavenyani, kabeni ndhowege. Kasugwani! Anna ofiya ole anagiguliha.” 47 Mudhidhi yoole Yesu awogagave, mmodha wa anamahara aye kumi nabiili ithaniwa Judasi odhana muthithi waathu egaaparenle masupadda ni mmiri dhewa. Aliwa yarumiwe ni anddimuwa aanamakutha vamodha ni anamaholela a nlogo.

48 Namaguliha ole ahimala opangana naliwa egihina: “Yoole ginambejarimi mummage.” 49 Numwaddamela Yesu, oliye omulojhela egihina: “Bonooti Rabi!” Nuwindo onvaha beju. 50 Mbwenye Yesu omukoha egihina: “Mulobwana wadhela ddi?” Nuwindale aliwa omuhidda Yesu ommaga. 51 Mudhidhi yoole mmodha waaliwa aali ni Yesu, oweta supadda naye omugwaddana nibaru mudhaari a namakutha munlubale. 52 Yesu omwaddela egihina: “Kahogolosela supadda vamburoni vewa, mwaha aatene yaale enalabihedhe supadda enere okwa ni supadda. 53 Munubuwela wihina kaginanda waloba Ababa wihina mudhidhi yola aliwa yarume matxikwi ni matxikwi aangero?* 54 Mowindala dhinaakwanele addi Dholebela dhinawoga dhegihina dhithudha dhereye nimakalelo yaala?” 55 Mudhidhi yoole Yesu owoga ni muthithi ole waathu egihina: “Nyu mudhile ni masupadda vamodha ni mmiri dhenyudhene wihina mugimage ninga gere okala mbava? Malabo aamatene gakaratesa mutempulu gihudhihaga, mbwenye kamugimagile. 56 Mbwenye dhaatedhene ndho dhereye wihina dhakwanele dholebela dhilebiwe nanamavuhulela.” Vano anamahara aye omuhiya yekaye, aliwa othawa.

57 Ale yammange Yesu omuthukulela wa Kayifaji namakutha munlubale wengo watugumane anamaleba ni anamaholela. 58 Mbwenye Peduru oomuhara wolapelawene ofiyedha oddemulela vathaddo va namakutha munlubale, nufiya okarati ni anamalaba wihina oone ethu yapadduwe.

59 Anddimuwa aanamakutha ni Sinediriyu yaatene yowasayela athu wihina evahe onamoona wowoota wodhela Yesu, wamuthukulele opiwa. 60 Naarive athu owinjhiva evahaga onamoona wowoota kinfwannye newene mmodha. Nuuvira mudhidhi okumelela abiili 61 ni owoga yegihina: “Mulobwana ola awogile egi: ‘Miyo podi obwanyula tempulu ya Mulugu ni givenyihedhe malabo mararu.’” 62 Wodhela yeyo namakutha munlubale ovenya ni owoga egihina: “We kunaakula ethu? Yowakula yawo siivi wodhela athu ala enuwinkedhiwa?” 63 Mbwenye Yesu kaakunle ethu. Nuwindo namakutha munlubale owoga nuliye egihina: “Mwa ndina na Mulugu ookalawo, kalibela akala we oli Kiristu Mwaana a Mulugu!” 64 Yesu omwakula egihina: “Di nyu munawoga ndo. Mbwenye ginowuwaddelani: Obajha peeno odhowa osogolo nyu munere omoona Mwaana Muthu agakarante moono woojha wa kopolo ni adhaaga mmuraboni odhulu.” 65 Namakutha munlubale otala dhowara dhaye ni owoga egihina: “Oliye ohuruwana dhithu dhotaleleya! Ki mwahaya bwaddi nigaahowela anamoona? Kasugwani! Nyu muhiwa oliye aruwanaga dhithu dhotaleleya. 66 Oliye wakoha egihina: “Monelo weenyu buuvi?” Aliwa wakula yegihina: “Oliye afwanelele okwa.” 67 Omuturela maara wintoni ni empwadulaga mmaramani wula amodha emuukuthaga, 68 ewogaga yegihina: “Kavuhulela Kiristu. Uvande baani?”

69 Peduru aakaratile ode vathaddo, vano mudhaari dhaala a mwanamuhiyana omwaddamela ni owoga egihina: “Ni weya waali vamodha ni Yesu muGalilewu!” 70 Mbwenye oliye okoodda vaari vaathu aatene egihina: “Kagimunonne muthu yoyo munamuwoginyu.” 71 Vano oliye nukumela musiwo mmodha wavathaddo, namwali mmodhaya omoona ni owoga naale yaali vevale egihina: “Mulobwana ola aali vamodha ni Yesu Munazarenu.” 72 Dila biili oliye okoodda alibelaga egihina: “Miyo kagimunonne mulobwana yoyo!” 73 Nuuvira mwanamudhidhi ale yaali vevale omwaddamela Peduru ni owoga yegihina: “Mwebaribarene ni weya weddesa nuliyene mwaha mawogelo awo* enowoniha.” 74 Nuwindo oliye wambela wiwulumela ni alibelaga egihina: “Miyo kagimunonne mulobwana yoyo!” Vohilegela mutubi wunla. 75 Vano Peduru wubuwela ele aawogile Yesu egihina: “Mutubi ahinunle we onere ogikoodda dila tharu.” Vano oliye ovenyavo ni wunla vanlubale.