Dhilibiwe ni Marku
8 Malabo yaale wahitugumana muthithi mmodha munlubale, mbwenye aliwa kiyanna ethu yoojha. Nuwindo oliye wawithana anamahara aye ni wawaddela egihina: 2 “Ginoweddela thagaraga muthithi ola waathu, mwaha eli ni miyo malabo ala mararu teto kinna ethu yoojha. 3 Miyo gaaruma wihina edhowege mmavaade mwewa egavoliwe dala,* enookwa mudila, mwaha amodha edhele wolapelawene.” 4 Mbwenye anamahara aye omwakula yegihina: “Mburo yola wahinakaliwa nnafwanye waani pawu dhowakwana muthithi yola waathu?” 5 Vano oliye wakoha egihina: “Munna pawu ngaasi?” Aliwa wakula: “Ninna tanu nabiili.” 6 Ni oruma wihina muthithi ole waathu okarati vati. Othukula pawu tanu nabiili, olobela, nuumala ogwaddanya ni wavaha anamahara aye vano anamahara aye ogawela muthithi waatene waali vevale. 7 Ohiya eyo yahikanna mwana oba vang’ono, vano numala olobela wawaddela wihina yagawele. 8 Nuwindo ojha, orubala, nuddoddela pawu dhahanle odhaala muddanga* mitanu nabiili dhinlubale. 9 Yahikalavo athu owakwana 4000. Nuwindo oliye wapaganya.
10 Vohilegela oliye ogwela mmwanddeyani naanamahara aye ni ofiya murudda woDalamanuta. 11 Nufiya wengo, afarizewu efunaga wihina emwehe omwaddamela wambela okangana nuliye emulobaga yintelelo yodhulu. 12 Nuwindo oliye ovumela vadhulu ni owoga egihina: “Mwahaya bwaddi nlogo nna nigasayela yintelelo? Miyo ginowuwaddelani ebaribari, nlogo nna kannonihiwe yintelelo newene modha.” 13 Vano oliye wahiya, ogwela mmwanddeyani, wabuwela kobela emodha.
14 Nuwindo, aliwa oddiwala othukula pawu ni kiyathukunle ethu mmwanddeyani ehili pawu modha. 15 Yesu wawaddela egihina: “Mukale mento; teto pasope ni emela ya Afarizewu ni emela ya Erodi.” 16 Vano aliwa obajha okangana vikaleliwa mwaha ohuthukula pawu. 17 Nunona yakanganeliwa oliye wakoha egihina: “Munakanganela ddi mwaha ohuthukula pawu? Nivanove kamwiwale ni kamonelemo? Murima dhenyu kadhinanda wonelamo? 18 ‘Naarive muganna mento kamunoona, naarive muganna mabaru kamuniwa?’ Kamunubuwela 19 muddanga mingaasi dhodhaladhene mwaddoddelinyu, nugwaddanya pawu ndhe tanu yaajhile athu 5000?” Omwakula yegihina: “Kumi nabiili.” 20 Obe pawu ndhe tanu nabiili yaajhile athu owakwana 4000, muddanga* mingasi dhinlubale dhahanle dha pawu mwaddoddelinyu?” Omwakula yegihina: “Mitanu nabiili.” 21 Nuwindo, wakoha egihina: “Nivanove kamunonelemo?”
22 Nufiya oBetizayida aliwa omudhelana mulobwana dhaala ohoona ni omuloba wihina amutapulele nlada naye. 23 Oliye opareela nlada na mulobwana ole ohoona omuthukulela mburo wolapela wa murudda yoole. Numuturela maara mmwintoni mwaaye omparela nlada ni omukoha egihina: “Onowanda woona ethu-siithu?” 24 Mulobwana ole osugwa odhulu ni omwakula egihina: “Ginowawoona athu, mbwenye enakala ninga muthanko dhineedda.” 25 Dila yanabiili Yesu ompara mulobwana ole mmwintoni mwaaye vano oliye wambela woona pama. Mento aye wambela woona, oliye woonaga dhithu dhaatedhene. 26 Nuwindo oliye omuruma wihina adhowege vaade vaye egihina: “Kuhogolowele mmuruddani.”
27 Yesu ni anamahara aye odhowa murudda woSezareya ooFilipi, egaali mudila oliye wakoha anamahara aye egihina: “Athu amodha enubuwela wihina miyo gili aani?” 28 Aliwa omwakula yegihina: “Juwawu Namabaddiza, mbwenye amodha enihina muli Eliyaji teto amodha enihina muli namavuhulela.” 29 Oliye wakoha egihina: “Ki nyu, munihina miyo gili aani?” Peduru wakula egihina: “Nyu muli Kiristu.” 30 Nuwindo wakongomedha wihina ehimwaddele muthu mmodha wodhela oliye. 31 Ohiya eyo, oliye wambela wahudhiha wihina Mwaana Muthu eere woonihiwa goyi dila dhowinjhivadhene ni eere okoddiwa ni anamaholela, anddimuwa aanamakutha ni anamaleba, eera ndo apiwe vano labo nanatharu avenyihiwe muukwani. 32 Mbwenye muselu ola oliye awonge vaddedderenivene aatene yiiwaga. Mbwenye Peduru omuthukulela okwibi wambela omusumulula. 33 Mwaha wa yeyo oliye orugunuwa wasugwa anamahara aye ni omusumulula Peduru egihina: “Kasusedha ngo, Saddanawe! Mwaha mubuwelo onniwena kahiyo wa Mulugu, mbwenye bwaathu.”
34 Oliye withana muthithi ole waathu vamodha ni anamahara aye ni wawaddela egihina: “Ole anafuna okala namahara aaga iikodde ni athukule ntxikwa naye na goyi* agiharege. 35 Ole anafuna ovulusa egumaye aneere oyelela, mbwenye ole anayelele egumaye mwaha wa miyo ni mwaha wa muthenga dhixa aneere ofwanya. 36 Mwebaribarene muthu anapuravo ddi ayelela egumi yaye mwaha wojhavo elabo? 37 Obe muthu anaalive ddi wihina avuluse egumi yaye? 38 Mwaha muthu yoole anaagikalele manyazo vamodha ni madhu aaga vaari va nlogo nna nooraruwa* ni noothega, Mwaana Muthu aneere omukalela manyazo aadhaaga munthithimihoni na Ababe vamodha ni angero oweela.”