Dhilebiwe ni Juwawu
21 Nuwindo, Yesu wafwanya dila biili anamaharaye niya yoTiberiyadi. Oliye adhile nimakalelo ala: 2 yaali vamodha ni Simawu Peduru, Tome (aalemeliwena ni ndina na mwanapata), Nataniyeli ooKana ooGalileya, ahima a Zebedewu ni anamaharaye abiili. 3 Simawu Peduru owoga egihina: “Ginaya gatote oba.” Aliwa omwakula yegi: “Nihiyoya nnere wuhara.” Nuwindo, aliwa odhowa ogwela mmwanddeyani, mbwenye emahiyu yaatene kayahiddile newene oba modha.
4 Vati visaga, Yesu wimela sere-sere ya niya, mbwenye anamaharaye kayanonne wihina aali Yesu. 5 Vano, Yesu wakoha egihina: “Anaaga, nyu mukanna ethu* yoojha?” Aliwa wakula yegihina: “Naari.” 6 Oliye wawaddela egihina: “Nvokedhe nthavina epaddi ya moono woojha wa mwanddeya munere ohidda oba.” Nuwindo aliwa ovoka, mbwenye kiyandile otavula, mwaha dhahiyamo oba dhowinjhiva. 7 Vano, namahara ole Yesu athabwesiye omudhivela omwaddela Peduru egihina: “Di Nabwiya!” Simawu Peduru nuwiwa wihina di Nabwiya, owara guwo dhaye mwaha aali madave,* numala olupela muniya. 8 Mbwenye anamahara amodha odhaga ni mwanddeya mung’ono, etxetxeresaga nthavina mwaha mwahidhala oba teto kayalapenle nuude, yaali meturu 90.*
9 Nufiya ode, woona mootho ni oba dhigaali veeko, vamodha ni pawuya. 10 Yesu wawaddela egihina: “Kadhaanani oba dhimodha muhiddilinyu ovanene.” 11 Vano Simawu Peduru ogwela mmwanddeyani owetela nthavi nne ode; naadhanlemo oba, dhowakwana, 153 dhinlubale. Naarive dhigaadhanlemo, nthavina kanaatale. 12 Yesu wawaddela egihina: “Dhaani mujhe.” Mbwenye kaavo namahara andile oliba murima wihina amukohe oliye aali aani, mwaha yahinona wi di Nabwiya. 13 Yesu odhowa, othukula pawu ele waavaha, werana emodhave ni oba. 14 Ela yaali dila yanatharu Yesu aagumaniyena anamaharaye numala ovenyihiwa muukwani.
15 Nuumala ojha, Yesu omukoha Simawu Peduru: “Simawu mwaana Juwawu, we onothabwa ogidhivela opitha ndha?” Oliye omwakula egihina: “Hee, Nabwiya, nyu muhunona wi ginowudhivelani.” Oliye owoga egihina: “Wajhihege mambila aaga.” 16 Oliye omukohave dila yanabiili: “Simawu mwaana Juwawu onogidhivela?” Simawu wakula: “Hee Nabwiyani nyu muhunona wihina ginowudhivelani.” Oliye owoga egihina: “Wakukulege mambila aaga.” 17 Oliye omukohave dila yanatharu: “Simawu mwaana Juwawu onogidhivela?” Peduru wukuuwa mwaha Yesu omukoha dila yanatharu egihina: “We onogidhivela?” Bumwahaya oliye adhe awogege egihina: “Nabwiyani, nyu muhunona dhithu dhaatedhene teto muhunona wi miyo ginowudhivelani.” Yesu owoga egihina: “Wajhihege mambila aaga. 18 Ginowuwaddela ebaribari: We ogaali muzombwe, wawaresa ni weddesa mburo wafuniwe. Mbwenye wuluvala, we onerege omuhoowela muthu owuuweddiha ni owuwariha ni anerege wuthukulela mburo wahinafuniwe.” 19 Yesu awogile madhu ala wihina onihe makalelo okwa waye wamuthithimihiwa Mulugu. Vano numala owoga, oliye omwaddela egihina: “Ogiharegeve.”
20 Nuwindo, Peduru orugunuwa ni omoona namahara ole Yesu athabwesiye omudhivela aaharaga, yoole mudhidhi ejhaga aamwaddamele Yesu ni aamukohile egihina: “Nabwiya baani anuguliheni?” 21 Vano oliye nuumona, Peduru omukoha Yesu egihina: “Nabwiya enampadduwele ddi mulobwana ola?” 22 Yesu omwakula egihina: “Miyo gafuna wihina oliye akalegewove ofiyedha miyo odha, we onavolowa vaavi? Mbwenye we ogiharegeve.” 23 Nuwindo, anamahara aatene onona wihina namahara ole kaakwe. Mbwenye Yesu kamwaddele wihina oliye kaakwe, mbwenye awogile egihina: “Miyo gafuna wihina oliye akalegewove ofiyedha miyo odha, we onavolowa vaavi?”
24 Ola di namahara anavaha onamoona ni alembe dhithu ndha, teto ni iyoya nihinona wihina onamoona waye bwebaribari.
25 Mwebaribarene, dhihikalawo dhithu dhowinjhiva enrena Yesu. Mbwenye, dhahalebiwe rolu dhaatedhene, podi wera mwilaboni kamwakale mburo wokoyavo.