Karta Noobajha Na Peduru
4 Woona wi Kiristu oonile goyi aganna mwiili wemuthu ni nyuwa mwiwegeredhe wihina mubuwelege ninga Kiristu; mwaha muthu anoona goyi epaddi yomwiilini ohuthwaruwa werana dhoothega, 2 wihina egumaye yaatene yomwiilini, ahilabihedhe eragana dhofuna dhaathu, mbwenye alabihedhe eragana efunelo ya Mulugu. 3 Mwaha kale, nyu muhunonga mudhidhi wowinjhivene mweragana dhithu eneerana athu amalogo, mwahithukula mweeddelo wa manyazo,* munigwa dhabure, olezela, mathanga ohudhuwanyeya, ong’wa wohupimelela ni mookokorela dhikwamuthu dhoosema. 4 Aliwa kinoonelamo mwahaya bwaddi mudhe muhiyege weedda vamodha naaliwa ni muhuharaga mweeddelo wewa wabure, bumwahaya eguuwogani obure. 5 Mbwenye athu ayo eneere wakulela vamentoni va ole anaatorihe vohilegela athu ookalawo ni anookwa. 6 Bumwahaya naanokwaya ehilaleyiwa muthenga dhapama, wihina naarive egatorihiwe omwiilini mowiwanana ni moonelo waathu, aliwa podi okala mento esogoleliwaga ni muzimu wa Mulugu.
7 Mbwenye wihaddamela omakuthulo wa dhithu dhaatedhene. Mowindala, mukanne mubuwelo wapama ni mukale mento wodhela wawerana malobelo. 8 Mwadhaatedhene ndha, mudhivelanege mmodha ni mukwaye ni murima waatene, mwaha odhivela onokunela dhoothega dhowinjhiva. 9 Mwakelanege mmodha ni mukwaye mmavademwinyu muhunlihaga dhammurimani. 10 Woona wi kadda muthu ohakela gari, alabihedhe wihina aaparele mabasa athu amodha ninga namasogolela oopama wohinifwanelela wa Mulugu onoonihiwa mwamakalelo oohiyana-iyana. 11 Akala muthu ohukanna gari yowoga, awogege mowiwanana ni madhu a Mulugu; akala muthu ohukanna gari yowalabela athu amodha, alabihedhege mowiwanana ni kopolo avahiwiye ni Mulugu, wihina mwadhaatedhene Mulugu athithimihiwe wodhela Yesu Kiristu. Nthithimiho ni kopolo saaye ni mukalakala. Amem.
12 Addibila ginudhivelimini, kamutikine dhoweha ndho dhorusa dhinufwanyani, ekalaga ninga dhithu ndho dhinuupadduwelani dhixa. 13 Ohiya eyo, muhagalalegeve mwaafwanyiwaga makathamiho mamodhave yanfwanyile Kiristu, wihina ni nyuwa muhagalale ni mukanne ohagalala winlubale wafiya mudhidhi wowooneyihiwa nthithimiho naye. 14 Oohagalala di nyu munaruwaniwa mwaha wa ndina na Kiristu, mwaha muzimu wa nthithimiho, hee, muzimu wa Mulugu oli ni nyu.
15 Mowindala, kaginafuna wihina newene mmodha wa nyu oonege goyi mwaha wokala namapa, mbava, mpanga obe ovolowela muselu dhannya. 16 Mbwenye akala muthu onowoona goyi mwaha wokala Mukiristawu, kakanne manyazo, adhowegeve amuthithimihaga Mulugu wodhela okala Mukiristawu. 17 Vano ohufiya mudhidhi wihina otoriha wambele. Mbwenye otorihiwa ngo onaabajhe ni athu a Mulugu. Mowindala, akala anambeeliwe di iyo, ki weera omakuthulo wa athu yaale ehiniwelela muthenga dhapama dha Mulugu, winaakale aavi? 18 “Akala kahiyo yokweya muthu owoogowa ovuluwa, ki weera muthu abure ni oothega enampadduwele ddi?” 19 Mowindala, athu yaale enoona goyi mowiwanana ni efunelo ya Mulugu, epeleke egumi yewa wa Mpaddusi eehu oororomeleya ni edhowegeve yeragana opama.