Aalebeliye Akudda 1 Korintiyu
3 Mowindo addibila, miyo kagandile owoga ni nyu ninga athu oomuzimuni mbwenye ninga athu oomwiilini woona wi muli ahima a Kiristu. 2 Miyo gujhihileni mukaka ohiya yojha yovaadda, mwaha nyu mwaali mwahinathi wunnuwelavo. Teto nivano kamununnuwe, 3 bumwahaya nivanove muli athu oomwiilini. Woona wi vikalelinyu munokalelana ajhe ni munokangana, mowindo, nerege kamuli athu oomwiilini wula mweeddelo weenyu oliganaga ni athu amwilaboni? 4 Amodha yawogaga yegi: “Miyo gili a Pawulo,” mbwenye amodhaya enihina: “Miyo gili a Apolu,” mubuwelo oyo kunooligana ni waathu eelabo?
5 Apolu baani? Ki Pawulo baani? Iyo nili arumiwi baahi enaapara mabasa a Nabwiya, yayo yukavihereni okanna nroromelo. 6 Miyo waala, Apolu weka manjhe, mbwenye unnuwiha di Mulugu, 7 teto ole anaala nuule anahela manjhe kahiyo yego, mbwenye Mulugu anunnuwiha dili athimaya. 8 Ole anaala ni ole aneeka manjhe aabilene enalaba vamodha,* mbwenye kadda muthu aneere okanna yowakela yaye, mowiwanana ni mabasa aapariliye. 9 Mowindala nnalaba mwimodhani ni Mulugu. Nyu dili mundda wa Mulugu onalimiwa, nyumba ya Mulugu.
10 Mowiwanana ni opama wohinifwanelela Mulugu agivahiliye, miyo gihimutibela alisersi ninga meesili apama,* vano ohukala muthu mmodha anamaga vadhulu valsersiva. Mbwenye kadda muthu apwaasedhe pama makalelo anafuniye omagavo. 11 Mwaha kawo muthu anaamutibele* alisersi mmodhaya, ahili yoole atibeliwe, ali Yesu Kiristu. 12 Akala muthu amagile valisersini vale alabihedhaga woru, parata, mabwe oojerimela, tabwa, maani obe mutati, 13 mabasa kadda muthu aapanriye eneere woneya nafiya labona; mwaha mootho onere wawoneyiha teto mootho oyo onere wawoneyiha mabasa baani kadda muthu aapanriye. 14 Akala mabasa epariwe ni muthu yoyo kigujhuliwe, aneere wawakela mareeliho; 15 vano mabasa ale yaja ni mootho, oliye aneere wayelela, mbwenye muthu oyo aneere ovuluwa; nimakalelo yayo, enakalege ninga muthu avuluwe vamoothoni.
16 Nyu kamunonne wi muli tempulu ya Mulugu teto muzimu wa Mulugu onakala ni nyu? 17 Muthu yoole anaagujhule tempulu ya Mulugu, Mulugu aneere omutolosa, mwaha tempulu ya Mulugu soweela teto nyu dili tempuluya.
18 Kamwilekethe mwaannya: akala vikalelinyu ohukalavo muthu anubuwela wihina ohukanna thotho elabo yeela,* akalege ninga taduwa wihina akale athotho. 19 Mwaha thotho dheelabo ela otaduwa vamentoni va Mulugu, woona wi dholebela dhinihina: “Oliye onowapara* aliba thotho nuuxaga wewa.” 20 Ohiya eyo: “Yehova* ohunona wihina mubuwelo waathu athotho kunna mabasa.” 21 Bumwahaya, kadda muthu wa nyu kiithukulege mwaha waathu; mwaha dhithu dhaatedhene seenyu: 22 naarive akale Pawulo, Apolu, Sefaji, elabo, egumi, okwa, dhithu dhiliwo, dhithu dhinafuna odha osogolo, dhaatedhene seenyu; 23 mwaha nyu muli a Kiristu, teto Kiristu da Mulugu.