Aalebeliye Akudda 1 Korintiyu

4 Athu enoonege ninga arumiwi a Kiristu ethomiwe wihina ekabelelege* dhoviteya dhootaleleya dha Mulugu. 2 Mbwenye ethu enajhehiwa wa arumiwi sowi ekale oororomeleya. 3 Wa miyo kaginapwatha otorihiwa ni nyu obe ni tiribunale yaathu. Mwebaribarene miyo kaginitoriha meeka. 4 Mubuwelo waaga kunaginyemela wihina giherana ethu yabure. Naarive dhigaali ndo miyo kagili muthu oologomana, mbwenye Yehova* dinoona* akala dhithu ginerimina sapama obe sabure. 5 Bumwahaya kamutorihe ethu labona nihinafiye, mbwenye mujheehege labo nnafuna ofiya Nabwiya. Oliye aneere okumeleliha dhithu dhoviteya dhili oyiihini adhena mburo wowaara teto aneere obumbula* dhithu dhili mmurimani mwaathu vano kadda muthu aneere wakela nthithimiho nnadhela wa Mulugu.

6 Addibila, wodhela dhithu ndha giwogilimi, miyo ni Apolu nihivaha yotajhiha yapama wi yukavihereni, mwaha wa yotajhiha yehu, muhudhere nlamulo nna: “Muharege baahi dholebela dhinawogiwa,” wihina munaakale athu owithukula, vano mwambele wavaha thima athu amodha wapitha amodhaya. 7 Anuhiyaniha ni athu amodha baani? Mwebaribarene, ethu baani onniwena wahivahiwiwe? Akala dhithu onniwena were ovahiwa, kito oniithukulela ddi ekalaga ninga kuwere ovahiwa?

8 Vano muhukanna dhithu dhaatedhene mwahowelinyu? Muhumala oreela? Vano muhubajha othonga yekinyu? Miyo geere odhiveliwa mwahabajhe othonga, wihina nihiyoya nthongege vamodha ni nyu. 9 Mwaha miyo ginoona wi Mulugu anipwehile iyo arumiwi nikuru nogomihedha, ninga athu ethongeliwe opiwa. Mwaha nnooniwa ninga sekere* yeelabo, vamentoni va angero ni vaathu. 10 Iyo nili ataduwa mwaha wa Kiristu, mbwenye nyu muli ooxaga mowiwanana ni Kiristu, iyo nili oolodhowa mbwenye nyu dili akopoloya; nyu munothithimihiwa, mbwenye iyo nnonyemuliwa. 11 Ofiyedha peeno, nnokwa dala ni nthona, kaninna dhowara,* nnowukuthiwa,* kaninna vokala, 12 teto nnolaba nuuviheya ni madihu. Naaruwaniwaga, iyo nnowareeliha; naharahariwaga nnovilela; 13 ninkedhiwaga, nnowakula mopwaseya;* ofiyedha peeno elabo enanoona ninga dhithu dhinarahileliwa vadhuguni,* dhithu dhootakala dhihinna mabasa.

14 Kaginulebelani dhithu ndha wihina gutoteni manyazo, mbwenye wihina guhudhiheni ninga anaaga ginaadhivelimi. 15 Naarive mukanne anamahudhiha 10 000 wa Kiristu, mwebaribarene kamunna abaabi owinjhiva; mwaha miyo gili baabinyu wa Kiristu Yesu wodhela muthenga dhapama. 16 Mowindala, ginowukongomedhani: mugitajhihe miyo. 17 Bumwahaya ngamuruma Timotiyu wihina adhe wengo, mwaha di mwanaga ginamudhivelimi mwa Nabwiya. Oliye aneere wuwubusedhani makalelo gineerimina dhithudha* mowiwanana ni Kiristu Yesu, mowindala ninga ginahudhihimi mburo dhaatedhene ni mulogo dhaatedhene.

18 Athu amodha enna withukula okalaga ninga kaginaadhe guwaredhelani. 19 Vohilegela ginere odha guwaredheleni, Yehova* afuna, mbwenye kaginafuna wavuruwana athu ayo enithukula, ohiya eyo, ginafuna goone akala ehikanna kopolo dha Mulugu obe naari. 20 Omwene wa Mulugu kunoneya ni madhuve baahi, mbwenye wodhela kopolo dha Mulugu. 21 Ki nyu munafuna ddi? Gidhe guwaredheleni ni muwaxuwaxu obe nuudhivela ni murima woopwaseya?