Dhilebiwe ni Lukaji
1 Athu owinjhiva ehiilibihedha osayela ni oleba dhopadduwa dhaatedhene dhereye, dhendho iyo aatene nnahowelihu, 2 mowindala, dhithu elembiwa dhinowiwanana ni ndhe niwalihu ni anamoona yiwale ni elaleyile muthenga wa Mulugu. 3 Teto ni miyoya nusanyiha muselu dhaatedhene mwamakalelo owaakwanela, okuma wambeliwa gihithoma wulebelani nabwiyaaga mwamakalelo owaakwanela oothithimihiwa Teyofilu 4 wihina mukanne ebaribari wodhela dhithu mwiwalinyu muhudheraga.
5 Malabo a Erodi,* mwene ooJudeya ahikalawo namakutha ithaniwa Zakariya aali a nikuru na Abiyaji, mwariye aali a nlogo na Arawu ndina naye aali Elizabeti. 6 Aabilene yaali owogowa* vamentoni va Mulugu ni yowawiwelela malamulo aamatene ni dhoholela dha Yehova.* 7 Mbwenye kiyanna ahima mwaha Elizabeti kaabala, teto aabilene yahithabwa wuluvala.
8 Mudhidhi yoole Zakariya eera wapara mabasa aye oonamakutha vamentoni va Mulugu nnikuru naye aathomeliwiye, 9 mowiwanana ni elemelelo yaanamakutha, ofiya mudhidhi waye wopaha insensu, vano oliye ovolowa mburo woweela wa Yehova.* 10 Mudhidhi apahaga insensu, muthithi waatene waathu waali ode olobelaga. 11 Nuwindo, ofiya mungero a Yehova,* oliye wimela moono woojha wa altare wapahiwa insensu. 12 Zakariya numoona mungero ole, oliye osimwela ni wambela woova. 13 Nuwindo mungero omwaddela egihina: “Kuwoove Zakariya, mwaha malobelo awo ehivuruwaniwa, mwariyo Elizabeti aneere ombala mwaana, vano onvahe ndina na Juwawu. 14 We onere ohagalala ni onere othaba vanlubale, teto athu owinjhiva enere ohagalala nuubaliwa waye, 15 mwaha mwaana oyo aneere okala munlubale vamentoni va Yehova.* Mbwenye oliye kanamung’wege vinyu newene dhong’wa dhimodha dhowawa, naarive ahinabaliwe aneere odhaaleliwa muzimu wotxena, 16 ni aneere wakavihera amwaana Izarayeli owinjhiva omuhogolowela Mulugu ewa Yehova.* 17 Oliye aneere okala osogolo wa Mulugu ni muzimu ni kopolo dha Eliyaji, wihina erihe murima dha abaabi okala ninga dha ahima, ni aneere waweriha aliba ohiwelela okanna thotho dhaaliba wogowa wihina akavihere nlogo na Yehova* okala nowegeredheyanene.”
18 Zakariya omukoha mungero ole egihina: “Ginakanne addi ebaribari wihina enere wereya? Mwaha miyo vamodha ni mwaraga nihithabwa wuluvala.” 19 Mungero ole omwakula egihina: “Miyo gili Gabiriyeli, gili vamentoni va Mulugu, girumiwe wihina guwaaddele ni gufihedhe muthenga ola wapama. 20 Mbwenye vano kunaawogege, onaakale muliba ohuwoga ofiyedha labo dhithu ndha dhinafuniiwa opadduwa mwaha kuwarumedhe madhu gawogilimi, enafuna wakwanela mudhidhiya wafiya.” 21 Mudhidhi yoole nlogo naali ode nimujhehaga Zakariya, aliwa okala ootikineene mwaha eera othabwa olegela mburo woweela* wageliye. 22 Oliye nukuma kaanda owoga naaliwa, vano aliwa wonelamo wihina ohoona ethu yootikiniha* mburo woweela. Oliye awoga naaliwa ni mada mwaha ndhuna kanakuma. 23 Vano egaakwanne malabo aapariye mabasa ootaleleya oliye ohogolowela vaade.
24 Nuuvira mwanamalabo mwariye Elizabeti okanna wari, ni dhahivira mweri mitanu akalaga vaade vaye baahi ahivenyagavo, oliye oowoga egihina: 25 “Siyela Yehova* agereliye malabo yaala. Oliye ohugubuwela wihina aamarihe manyazo aaga vaari vaathu.”
26 Nuuvira mweri mitanu nammodha, Elizabeti aganna wari, mungero Gabiriyeli orumiwa ni Mulugu sidadi yoGalileya yithaniwa Nazare, 27 wa namwali dhaala ahinagonege ni mulobwana, aaveviwe* ni mulobwana dhaala ithaniwa Juze a emudhi ya Davidi, ndina na namwali oyo ithaniwa Mariya. 28 Mungero ole nufiya vaade vaye owoga nuliye egihina: “Murenddele okale ni we, Yehova* ali ni we.” 29 Mwaha wa madhu yaale oliye othuwathuwa vanlubale ni osayelaga wonelamo muselu ole watapuleliwa. 30 Nuwindo, mungero ole owoga nuliye egihina: “Kuwoove, Mariya, mwaha mahala a Mulugu eli ni we. 31 Vano we onere okanna wari, ni onere ombala mwaana, windo onvahe ndina na Yesu. 32 Oliye anaakale munlubale ni anithaniwege Mwaana a Namadhuludhulu, vano Yehova* Mulugu, aneere onvaha omwene wa ababe Davidi, 33 teto oliye aneere okala Mwene a nlogo na Jako malabo aamatene ni Omwene waye kunadha okanna omakuthulo.”
34 Mariya omukoha mungero ole egihina: “Woona wihina miyo kaginagonege ni mulobwana ndhodha dhinapadduwe addi?” 35 Mungero ole omwakula egihina: “Muzimu wotxena onere okala ni we. Vano kopolo dha Namadhuludhulu* dhinere wukunela, bumwahaya ole anaabaliwe anithaniwege oweela, Mwaana a Mulugu. 36 Ni onone wihina mmudhaawo Elizabeti, naarive aguluvale ni ahibalaga aneere okanna mwaana, teto ola bumweeri wa neetanu nammodha waye; 37 mwaha Mulugu kanaawoga madhu, yahakwanela.” 38 Mariya owoga egihina: “Miyo gili mudhaari a Yehova!* Yereye ni miyo ninga munafuneliye.” Nuwindo, mungero ole ovenyavo vamentoni vaye.
39 Malabo yaale Mariya omaruwa mowaguva odhowa murudda dhaala womwangoni sidadi* yooJuda. 40 Ofiya vaade va Zakariya ni omulojhela Elizabeti. 41 Elizabeti nuwiwa muselu wa Mariya, mwaana aali mbani mwaaye olupa, vano Elizabeti odhaaleliwa muzimu wotxena 42 ni owoga ni ndhu nootama egihina: “Oorelihiwa di we vaari va ahiyana aatene, ni yoreelihiwa siyowima* eli mbani mwawo! 43 Dhandeyile addi miyo okanna oneti ninga yola, mayi a nabwiyaaga odha ogaredhela? 44 Mwaha miyo nuwiwa ndhu na muselu wawo mwaana mbani mwaaga ohulupa nuuhagalala. 45 Oohagalala duule arumedhe mwaha madhu aaddeliwiye ni Yehova,* mohanganyedha enere wakwanela.”
46 Mariya owoga egihina: “Egumaaga* enomuthithimiha Yehova,* 47 teto egumaaga* eli yohagalalene mwaha wa Mulugu Nvulusi aaga, 48 mwaha oliye ohoona ohawa wa mudhaari aye. Hee! Obajha peeno odhowa osogolo, malogo enaagoonege ninga muthu oohagalala, 49 mwaha Mulugu a kopolo ohugerela dhithu dhinlubale, noweela thi ndina naye, 50 teto onowaweddela thagaraga yaale enamuriiha ni murima wamutene ni enamoova. 51 Oliye ni moono waye oherana dhithu dhakopolo; ohawigara athu enna murima dhowithukula. 52 Ohakitiha vampaddoni woomwene athu a kopolo, ni wagwelihavo athu owiyeviha; 53 ohajhiha dhithu dhapama athu enna dala ni ohawigara aliba ooreela ehinna ethu. 54 Oliye ohudha omwakihedha Ezarayeli mudhaari aye, ubuwelaga thagaraga dhaye dha mukalakala, 55 mwaha wa Abaraawu ni odhuulu waye,* mowindala ninga aapaganyiye makolo ehu.” 56 Mariya ahikala ni Elizabeti mweri miraru, nuwindo ohogolowela vaade vaye.
57 Ofiya mudhidhi wihina Elizabeti abaale, oliye okanna mwaana mwanamulobwana. 58 Amwanddamani aye ni amudhaaye wiiwa wihina Yehova* ahimweeddela thagaraga mwaha wa yeyo aliwa ohagalala nuliye. 59 Vano nuwakwana malabo matanu natharu, aliwa omuthukula mwaanaya wihina ineliwe* ni wihina yanvahe ndina naababe, Zakariya. 60 Mbwenye amaye owoga yegihina: “Naari! Oliye anithaniwege Juwawu.” 61 Mwaha wa yeyo aliwa owoga yegihina: “Kaawo mmudhaawo anna ndina nenno.” 62 Vano wakoha ababeya ni mada wihina awaddele ndina iithaniwegena mwana ole. 63 Oliye oloba mwanatabwa ni olebavo: “Ndina naye di Juwawu.” Mwaha wa yeyo aatene otikina. 64 Mudhidhi mmodhave yoole mulomo waye ofuguwa, nlumi naye otapuwa ni wambela owoga amuthithimihaga Mulugu. 65 Vano athu aatene yaaddamane naaliwa wambela woova ni owogiwaga dhithu dhendha murudda waatene womwangoni ni woJudeya. 66 Aatene yiwale yopadduwa ela, okoya mmurimani mwewa ni yowoga yegihina: “Mwaana yola unnuwa anaakale aani?” Mwaha nlada na Yehova* naali nuliye.
67 Vano ababe Zakariya odhaaleliwa muzimu wotxena ni ovuhulela yegihina: 68 “Oothithimihiwa di Yehova,* Mulugu oWizarayeli, mwaha ohubuwela nlogo naye wihina oobole. 69 Ni oliye ohunivaha namavulusa* a kopolo vaade va Davidi mudhaari aye, 70 mowindala ninga aawogiliye ni anamavuhulela aye akale, 71 wihina anivuluse mmadani mwa amwiddani ehu ni mwaathu aatene yaale enanidda; 72 wihina aweeddele thagaraga dhipaganyiwe makolo ehu ni ubuwelele nipangano naye noweela, 73 ni wodhela yolibela eeriliyena nnikolo nehu Abaraawu, 74 wihina anivahe oneeti womparela mabasa ootaleleya, wodhela onoobola mmadani mwa amwiddani ehu, 75 ni wihina nikale oororomeleya ni owogowa vamentoni vaye malabo ehu aamatene. 76 Mbwenye we mwanaga onithaniwege namavuhulela a Mulugu oodhulu, mwaha onere okala osogolo wa Yehova* wihina wegeredhe dila dhaye, 77 wihina avahe enonelo nlogo naye enaawobole wodhela oleveleliwa dhoothega dhewa, 78 mwaha wa thagaraga dha Mulugu. Waara winere odha odhulu mwaha wa thagaraga dhaye, 79 wihina aamoneye eli muyihini ni ekwile ni aweddihe manyalo ehu dila ya murenddele.”
80 Mwaana ole nuwunnuwa okala a kopolo epaddi yoomuzimuni, oliye okalagave mwiddeddereni ofiyedha nlabo akumeleliye vamentoni vaamwaana Ezarayeli.