Ovuhulela wa Juwawu

1 Ovuhulela* wa Yesu Kiristu, Mulugu anvahiliye wihina awonihe adhaari aye dhithu dhinafuna opadduwa moohilegela. Yesu omuruma mungero aye wa Juwawu mudhaari a Mulugu wihina amwaddele dhintelelo dha dhithu dhinafuna opadduwa. 2 Oliye ahivaha onamoona madhu aavahiwiye ni Mulugu ni onamoona wa madhu aavahiwiye ni Yesu Kiristu, mwebaribarene oliye ohuvaha onamoona dhithu dhaatedhene ooniliye. 3 Oohagalala di muthu yoole anawileri ni ndhu nootaama ni athu yaale enawiwa madhu a yovuhulela ela ni eniwelela dhithudha dhilebiwemo, mwaha mudhidhiya othomiwe ohaddamela.

4 Miyo Juwawu, ginalebela mulogo 7 dhili porovinsiya yoAziya wihina:

Mukanne opama wohinifwanelela ni murenddele wa “Ole ali, aali, ni anadhawo,” wodhela muzimu 7 dhili osogolo wa mpaddo wa onamathonga waye 5 ni murenddele wa Yesu Kiristu “ali Namoona Oororomeleya,” “oobajha ovenyihiwa muukwani” ni “Namathonga a mamwene aatene eelabo yavati.”

Ole ananidhivela ni anoobole mwa dhoothega dhehu wodhela nikame naye 6 teto oliye ohuneriha wihina nikale mamwene, anamakutha a Mulugu aye ni Baabi, mwebaribarene duliye anafwanelela othithimihiwa ni kopolo dha mukalakala. Amem.

7 Kasugwani! Oliye anadha mmuraboni, athu aatene enere omoona, vamodha naleya emulante ni mwaalago; mahimo aatene amwilaboni yavati enerege wivada vathimarimani yikubanyedhaga mwaha waye. Hee, eyo mwebaribarene enere wereya. Amem.

8 “Miyo gili Alfa ni Oomega,”* anawoga di Yehova* Mulugu, “ole ali, aali ni anadhawo, Akopolo Dhaatedhene.”

9 Miyo Juwawu, ddibilinyu ni mukwinyu a mmakathamihoni ni anaalamulele vamodha ni nyu mumweneni ni anavilela mwaha womuhara Yesu, gaali eliga enithaniwa Patimu, mwaha olaleya wodhela Mulugu ni ovaha onamoona wodhela Yesu. 10 Gikaviheriwaga ni muzimu wotxena gahoonihiwa labo na Nabwiya, vano mundduli mwaaga, miyo wiwa ndhu nakopolo nakala ninga oruma wa palaza, 11 negihina: “Dhithu onooniwe olebele varoluni wamala ovahedhele mulogo ndha 7: woEfezu, woEsmirna, woPergamu, woTiyatira, woSarde, woFiladelfiya ni woLawudiseya.”

12 Miyo nurugunuwa wihina gimoone baani awoga ni miyo, miyo woona panti* 7 dha woru 13 teto vaari va panti ndhe ahikalavo muthu aligana ni Mwaana Muthu, agawanre malaya yafiya omoddoni ni agimagilena vathimarimani sintu ninlubale na woru. 14 Ohiya eyo, musolo waye ni mathithiya yaali ootxena ninga mooya ootxena a nimbila obe murabo, mento aye yakala ninga nlumi na mootho, 15 manyalo aye yaligana ni muthove* wathima wosiwaga veeko; ndhu naye nakala ninga oruma wa manjhe owinjhiva. 16 Nlada naye na moono woojha mwahikala thendderi 7, teto omulomoni waye wokuma supaadda noolapa ni nowirwa dhipaddi dhaabilidhene, kove yaye yakala ninga nduwa nnajerimela ni kopolo dhaatedhene. 17 Miyo nuumona omothela osogolo wa manyalo aye okalaga ninga geere okwa.

Nuwindo, oliye ogipara ni moono waye woojha owoga egihina: “Kuwoove. Miyo gili Oobajha ni Oogomihedha, 18 ni ole anakalawo. Miyo gahikwa, mbwenye vano gihikalawo ni mukalakala teto gihikanna xavi dha okwa ni dha mahame.* 19 Mowindala, olebe dhithu woniliwe, dhithu dhinapadduwa ovanene ni dhithu dhinaapadduwe dhithu ndha dhavira. 20 Ela si yoviteya yotaleleya ya thendderi 7 ni panti 7 dha woru woniliwe dhigaali nlada naaga noojha: thendderi 7 dhinatapulela angero a mulogo 7, vano panti 7 dhinatapulela mulogo 7.”