Ovuhulela wa Juwawu
14 Nuwindo, miyo woona Nimbila nigimenle omwangoni Siyawu, nigaali vamodha ni athu owakwana 144 000, yanna ndina naye ni ndina na Ababe nigalebiwe vakoveni. 2 Vano miyo wiwa oruma wadhela odhulu wakala ninga oruma wa manjhe owinjhiva teto ninga oruma wa dari yowoopiha; oruma giwalimi wakala ninga anamiba yibaga ni yawobaga abangwe ewa. 3 Aliwa yowiba jhibo yakala ninga jhibo exa egaali osogolo wa mpaddo woomwene, osogolo wa angero annayi ni osogolo wa anamaholela. Jhibo eyo kaawo muthu aanda ohudhera ehili a 144 000 yayo eguliwe veelaboni yavati. 4 Ala baathu yaale ehiitakalihe nahiyana mwaha kinagonege ni muhiyana. Ala biyala enahara Nimbila mburo bu mburo winayiwa. Aliwa eguliwe vaari vaathu ninga namulibu a Mulugu ni a Nimbila, 5 aliwa newene kinootege ni kinna nihonya.
6 Miyo omoona mungero mmodha avavaga odhulu, oliye ahikanna muthenga dhapama dha mukalakala wihina aalaleyele ale enakala elabo yavati, malogo maatene, mahimo ni athu a dhiwogelo dhaatedhene. 7 Mungero ole oowoga ni ndhu nootaama egihina: “Mmoovege Mulugu ni mmuthithimihege mwaha ohufiya mudhidhi wihina aatorihe athu. Mowindala, mmwebedhege Ole apaddusile odhulu, elabo yavati, niya ni anedduddu a manjhe.”
8 Voharela, odhawo mungero mmodhaya anabiili awogaga egihina: “Ohumotha! Ohumotha Babiloniya munddimuwa ole aweriha malogo maatene omung’wa vinyu a efunelo yaye yowawerana mararuwo.”*
9 Vano odhawo mungero mmodhaya anatharu awoga ni ndhu nootama egihina: “Muthu yoole anaamwebedhe mwanenyama owoopiha ni ekwamuthu yaye ofiyedha waakela yintelelo vakoveni obe mmadani, 10 nuuliyeya aneere omung’wa vinyu oowali wa Mulugu, yoyo akuthuliwe ahitatanyiwe niithu mukoponi ya owali waye teto aneere woonihiwa goyi ni mootho vamodha ni enxofere vamentoni va angero oweela ni va Nimbila. 11 Mwiisi wa goyi enafuniiwa woonihiwa, onerege ogwelave odhulu ni mukalakala, ale enamwebedha mwanenyama owoopiha ni ekwamuthu yaye vamodha naaleya enaakela yintelelo ya ndina naye, kinithuwege mutana ni mahiyu. 12 Bumwahaya ale eli oweela, enawiwelela malamulo a Mulugu ni enamuroromela Yesu enohowela ovilela.”
13 Vano miyo wiwa ndhu nakuma odhulu negihina: “Kaleba: Obajha mudhidhi yoola odhowa osogolo, oohagalala baathu yaale enakwa egaali mwimodhani Nnabwiya. Hee, muzimu wotxena onihina aliwa yavumele mabasa ewa ooviheya, mwaha dhithu yeriliwana dhinowahara.”
14 Nuwindo, miyo woona murabo wotxena teto mmurabonimwa mugakaratile muthu akala ninga mwaana muthu agawanre kara ya woru mmuruni ni agamuhiddele kalonga owirwa.
15 Mungero mmodhaya okuma mburo wotaleleya wa mutempulu akuwaga ni ndhu nootama wihina amwaddele ole aakaratile mmuraboni egihina: “Omuthukule kalongawo wambele ohadda mwaha mudhidhi wohadda ohufiya teto dhowiima dheelabo yavati dhihimala wotowa.” 16 Ole aakiratile mmuraboni onviriha kalongaye elabo yavati vano dhowiima dheelabo yavati ohaddiwa.
17 Mungero mmodhaya okuma mburo wotaleleya wa mutempulu eli odhulu, nuliyeya ahikanna kalongaye owirwa.
18 Nuwindo, valtareni okumavo mungero mmodhaya anna owedha woolamulelana mootho. Oliye okuwa ni ndhu nootaama amwaaddelaga ole aanna kalonga owirwa egihina: “Omulabihedhe kalonga awo owirwa wihina ogwaddena dhisamwa dha uva ali elabo yavati, mwaha uvaya ohumala withwa.” 19 Vano mungero ole onviriha kalonga aye elabo yavati ni ogwaddana nvidera weelabo yavati, nuwindo ovokedha mburo munlubale munakamuliwa uva a owali wa Mulugu. 20 Uva ole odhowa okamuleliwa ode wa luwani, teto mburo ole wakamuliwa uva wahiddiha ofiyedha okumamo nikame nowinjhiva nagomela omulomoni waakavalo, ni nothamaga olenddo wowakwana 296 kilometuru.*