Aalebeliye Akudda 1 Korintiyu

15 Addibila, vano ginafuna guwubusedheni muthenga guwaddenlimini, yoyo murumedhilinyu ni munadidelinyu ohara ofiyedha peeno. 2 Mwadidelave wiwelela muthenga dhapama guwaddenlimini munere ovulusiwa; mbwenye mwahiya wiwelela kamunaavulusiwe.

3 Ethu yathima gihudherimi siyele guwaaddelimini wihina: Kiristu ohukwa mwaha dhoothega dhehu, mowiwanana ni Dholebela; 4 teto ohupwehiwa mmahame ni ohuvenyihiwa labo nanatharu, mowiwanana ni Dholebela; 5 ni okumelela vamentoni va Sefaji,* nuwindo vaarumiwi aye Kumi nabiili. 6 Voharela, ahoniwa ni athu ookwaranya 500 mudhidhi mmodhave, owinjhivaya wa athu yayo elive ni iyo, naarive amodhaya egamanle ogona muukwani. 7 Vasogolova, ogumana ni Tiyago, nuwindo ogumana ni arumiwi aatene. 8 Mbwenye omagomihedhowa, ogithwanyuwela miyo, ninga mwaana abaliwe labona nihinathi ofiya.

9 Vaari va arumiwi aatene, miyo gili ole ahinna thima ni kaginafwanelela withaniwa murumiwi, mwaha gihithabwa oharahara mulogo wa Mulugu. 10 Mowindo, wodhela opama wohinifwanelela wa Mulugu, miyo gili murumiwi. Teto opama waye wohinifwanelela agitonyihedhiye kahi weebewene. Mohiyana ni aliwa, gihilaba vanlubale wapitha aatene; mbwenye kahi miyo, buupama wohinifwanelela wa Mulugu oli ni miyo. 11 Mowindo, naarive akale miyo obe arumiwi amodha, iyo aatene nnolaleya, teto nyu munorumedha muthenga oyo nnalaleyihu.

12 Akala iyo nnalaleya wi Kiristu ohuvenyihiwa muukwani, ki mwahaya bwaddi amodha wa nyu egawoga wi kunadha okalawo ovenyihiwa wa anookwa? 13 Mwebaribarene, akala kawinaakale ovenyihiwa wa anookwa, Kiristu kavenyihiwe muukwani. 14 Mbwenye, akala Kiristu kavenyihiwe muukwani, muthenga nnalaleyihu bweebewene, teto nroromelo nenyu theebewene. 15 Ohiya eyo, akala anookwa kinaavenyihiwe, Mulugu kanvenyihile Kiristu, teto eyo enatapulela wi iyo nnomwinkedha Mulugu nawogaga wi ohunvenyiha Kiristu muukwani. 16 Mwaha akala Kiristu kavenyihiwe, naanokwaya kinaavenyihiwe. 17 Teto akala Kiristu kavenyihiwe, nroromelo nenyu kaninna mabasa; nivanove muli muuthegani. 18 Akala dhili ndo, makiristawu enagona muukwani ehirimela nimukalakala. 19 Akala egumihu yaatene nnamujheha Kiristu baahi, nnofwanelela okubanyedhiwa wapitha athu aatene.

20 Mbwenye, ebaribariya sowi Kiristu ohuvenyihiwa muukwani, oliye di murajhi ovenyihiwa wa ale ekwile. 21 Woona wi okwa odhiile wodhela mulobwana mmodha, emodhave, ovenyihiwa waanookwa onaadhe wodhela mulobwana mmodha. 22 Woona wi athu aatene enookwa mwaha wa Adawu, emodhave, athu aatene enere waakela egumi mwaha wa Kiristu. 23 Mbwenye kadda muthu anavenyihiwege mudhidhaye wafiya: oobajha di Kiristu, voharela ale eli a Kiristu, enavenyihiwe oliye adha. 24 Omakuthulowa, oliye aneere onvahedha Omwene Mulugu, ali Mulugu aye ni Ababe. Eyo enaapadduwe oliye aatolosa anamathonga ni aatene yaale enna owedha ni kopolo. 25 Mwaha oliye onofwanelela othonga ofiyedha Mulugu wapweha amwiddani aye aatene vati va manyalo aye. 26 Okwa di mwiddani oogomihedha anaagujhuliwe. 27 Mwaha Mulugu “ohupweha dhithu dhaatedhene vati va manyalo aye.” Mbwenye oliye aawogaga wi ‘dhithu dhaatedhene dhihipwehiwa vati va manyalo aye,’ eyo kinamutaganyihedha ni Muluguya apwehile dhithu dhaatedhene vati va manyalo aye. 28 Mbwenye, Mulugu amala onvahedhela dhithu dhaatedhene mwanaye, vano Mwanaye aneere wipweha vati va manyalo a Ole anvahedhele dhithu dhaatedhene, wi Mulugu akale a dhaatedhene mwa aatene.

29 Akala anookwa kinaavenyihiwe, ki ale enabaddiziwela okwa, enere ddi? Akala anookwa kinavenyihiwe, ki ale enabaddiziwa, enabaddiziwela ddi? 30 Mwahaya bwaddi mudhidhi waamutene nigapweha egumi yehu vangovini? 31 Okwa winogiharahara malabo aamatene. Addibila, eyo ebaribari ndala ninga ginithukulimi mwaha wa nyu wodhela Kiristu Yesu, Nabwiya ehu. 32 Akala oEfezu, miyo gihiwana ni anenyama owoopiha ninga athu amodha, gipurilevo ddi? Akala anookwa kinaavenyihiwe, “nijhege ni ning’wege, woona wi mangwaana nnere okwa.” 33 Kamulekethiwe. Wandana wabure winononga mweeddelo wapama.* 34 Muhogolowele ekalelo yenyu yapama wihina mwande werana dhithu dhapama, ni kamutheege, mwaha athu amodha kimunonne Mulugu. Ginawoga ndo wihina guutoteni manyazo.

35 Mbwenye muthu podi okoha egihina: “Anookwa enavenyihiwe nimakalelo baani? Hee, ki enavenyihiwe ni mwiili baani?” 36 Taduwawe! Ele onaaliwe kinahogolowela okalawo ehirajhihile okwa. 37 We kunaala ethu egaamanle wunnuwa, mbwenye onaala thanga, podi okala ya tirigu obe thanga dhimodha; 38 mbwenye Mulugu onowunnuwiha ninga munafuneliye teto thanga ele yunnuwaga kinakala emodhave. 39 Kahi wihina mwiili dhaatedhene dhinoligana, mwaha ohukalawo mwiili wa muthu, mwiili wa ng’ombe, mwiili wa balame ni mwiili wa oba. 40 Teto dhihikalawo mwiili dhoodhulu ni mwiili dha velaboni yavati, mbwenye nthithimiho na mwiili dhoodhulu nihiyana ni na mwiili dha velaboni yavati. 41 Waara wa nduwa wihiyana ni waara wa mweeri teto waara wa thendderi winohiyana. Mwebaribarene, kadda thendderi enowaara mohiyana ni thendderi emodha.

42 Emodhave enapadduwa ni ovenyihiwa wa anookwa. Mwiili onakwa onovudda, mbwenye mwiili onavenyihiwa, kunavudda. 43 Onavitiwa* ohunna nthithimiho mbwenye onavenyihiwa oganna nthithimiho. Onavitiwa ohunna kopolo mbwenye onavenyihiwa oganna kopolo. 44 Onavitiwa mwiili weemuthu mbwenye onavenyihiwa mwiili woomuzimuni. Akala ohukalawo mwiili weemuthu, ohukalawo mwiili woomuzimuni. 45 Mowindo ninga dholebela dhinawogiwa: “Mulobwana oobajha Adawu, ahikala muthu aanna egumi.”* Vano Adawu oogomihedha okala muzimu onavaha egumi. 46 Mowindala, onabajha okalawo kahi mwiili woomuzini, mbwenye onabajha boomwilini vano odha woomuzimuni. 47 Muthu oobajha davelaboni yavati ubiwe ni nthubi; muthu anabiili adheele odhulu. 48 Athu avelaboni yavati enaligana nuule Mulugu amubiliye onthubini; teto athu oodhulu enaligana nuule ali oodhulu. 49 Mowindo ninga nnaliganihu nuule ubiwe onthubini, nimakalelo mamodhave nnerege oligana nuule ali oodhulu.

50 Addibilaga ginafuna guwaddeleni wihina: nyama nnikame kinaakele Omwene wa Mulugu, newene ethu enavudda kinakala vamodha ni ethu ehinavudda. 51 Nvuruwane, ginafuna guwaddeleni yoviteya yootaleleya: Kahi wihina aatene nnere ogona muukwani, mbwenye aatene nnere osadduliwa, 52 mudhidhi mmodhave ninga okapila wa ninto, mudhidhi yoobiwaga palaza yogomihedha. Mwaha palaza enere woobiwa vano anookwa enere ovenyihiwa ni mwiili ohunavudda, teto iyo nnere osadduliwa. 53 Mwaha mwiili ola onavudda onere osadduwa wihina okale ohunavudda, teto mwiili ola onakwa onere osadduwa wihina okale ohunakwa. 54 Mbwenye, mwiili onavudda wasadduliwa okala mwiili ohunavudda teto mwiili onakwa wasadduliwa wi okale mwiili ohunakwa, enere wakwanela madhu enihina: “Okwa ohutolosiwa nimukalakala.” 55 “Okwa, ogonjhiha wawo oli wuvi? Okwa, kopolo dhawo dhili wuvi?” 56 Kopolo enadhana okwa siyothega teto kopolo ya yoothega thi Nlamulo. 57 Oothithimihiwa akale Mulugu, mwaha oliye onoonivaha ogonjhiha wodhela Nabwiya ehu Yesu Kiristu!

58 Mowindala, addibilaga ginuudhivelimini, mukale ooliba, ohuthikeya ni nviheyena wapara mabasa a Nabwiya, munonaga wi mabasa munamparelinyu Nabwiya kahiyo eebeweene.