Aalebeliye Akudda Eberewu

11 Nroromelo fuuhanganyedha wihina dhithu dhinadha osogolo dhineere weereya, ethu enanivaha ebaribari wihina ele nihinandihu woona ehikalawo mwebaribarene. 2 Wodhela nroromelo nno, athu a mudhidhi wa kale* yahaakela onamoona wihina Mulugu oohagalala naaliwa.

3 Mwaha wa nroromelo, nihonelamo wihina mudhidhi wohiyana-iyana oliwo, opwehiwe* mburo wewa woofwanelela mowiwanana ni madhu a Mulugu teto dhithu dhinoneya dhipaddusiwe wodhela dhithu dhihinooneya.

4 Mwaha wa nroromelo Abeli ahinvaha Mulugu mukutho munlubale okwaranya mukutho wa Kayini. Teto wodhela nroromelo nimodhave oliye waakela onamoona wihina aali muthu owoogowa mwaha Mulugu ahirumedha nvaho waye, bumwahaya naarive agakwile oliye anna owogave mwaha wa nroromelo naye.

5 Mwaha wa nroromelo Enoki ahitamihiwa wihina ahikwe mwaha woonihiwa goyi ni kaawo mburo aafwanyiwiiyewo mwaha Mulugu ahimutamiha, mbwenye ahinatamihiwe, ahivahiwa onamoona wi oomuhagalasa pamadhene Mulugu. 6 Ohiya eyo, wahikanna nroromelo kinenyeya omuhagalasa Mulugu, mwaha ole anamusayela Mulugu anohowela okanna ebaribari wihina oliye ohukalawo ni onowareeliha ale enamusayela ni murima waatene.

7 Mwaha wa nroromelo, Nowe nuwakela muthenga wa Mulugu wa dhithu dhohoneya, wooniha wi oomoova Mulugu ni osasanya mwanddeya wihina aavuluse amudhaaye; teto mwaha wa nroromelo otoriha elabo ni wooniwa ninga muthu owogowa mwaha wa nroromelo naye.

8 Mwaha wa nroromelo, Abaraawu nuwithaniwa ahiiwelela, oliye odhowa elabo ajhehedhiye waakela ninga nvaho; oliye omaga olenddo, naarive ahinonaga wadhowiye. 9 Mwaha wa nroromelo, ahidhowa okalaga ninga munyawedda elabo yathomeliwiiye, akalaga muddammwani ni Izaki vamodha ni Jako yayo yaakele mpaganyo mmodhave vamodha ni oliye. 10 Oliye oojhehedha luwani enna alisersi eebaribari, yeyo yegeredhiwe ni esasanyiwe ni Mulugu.

11 Teto mwaha wa nroromelo, Sara naarive agamanle wuluvala, oliye waakela kopolo wihina ambale mwaana aakale odhuulu,* mwaha ahinona wihina Ole aampaganyile dororomeleya. 12 Bumwahaya, wodhela mulobwana mmodha akala ninga aali ookweene, aliwa waabala ahima owinjhiva ninga thendderi dhodhulu ni oohukontareya ninga mutxesa* onakala sere-sere ya niya.

13 Aatene yaala ekwile eganna nroromelo, naarive mpaganyo ole wahinaakwanele aliwa yakala ninga enna woona wakwanelaga; teto kayakuwile wihina yaali anyawedda ni yera ovira elabo yeele. 14 Athu yayo enawoga dhithu ndha enowooniha wihina enosayela ni murima weewa waatene mburo onafuna okala wewa. 15 Mowindala yahaakalege wubuwelave mburo wikumiliwa, yeere okanna ofuru wohogolowelawo. 16 Ebaribariya sowihina athu yaala enowilibihedha ofwanya mburo wapama, obe nere, mburo onafwanyeya odhulu. Mowindala, Mulugu kanakanna manyazo withaniwa Mulugu ewa, mwaha ohasasanyedha sidadi.

17 Mwaha wa nroromelo, Abaraawu nuwehiwa, ompeleka mwanaye Izaki ninga mukutho. Mulobwana yoola ahagalale mwaha wa mpaganyo aakenliye, wiwegeredha wihina ampeleke mwanaye mmodha aanniyena, 18 naarive agaaddeliwe wihina: “Onithaniwege odhuulu* wawo onaadhe wa Izaki.” 19 Mbwenye oliye woonelamo wihina Mulugu ohukanna kopolo dhonvenyihana Izaki muukwani naarive agakwile; ela yatonyihedha ethu yafuna wereya osogolo.

20 Teto mwaha wa nroromelo, Izaki omureeliha Jako vamodha ni Ezawu nuwindo wawaddela dhithu dhaapadduwe osogolo.

21 Mwaha wa nroromelo, Jako ahalaga vang’ono nuukwa omureeliha kadda mwaana a Juze nuwindo oliye omukokorela Mulugu wula agaasameele mukogodho waye.

22 Mwaha wa nroromelo, Juze aaddamelaga omakuthulo wa egumi yaye, owoga wodhela olenddo wa amwaana Ezarayeli, nuumala oliye waavaha dhoholela wodhela makalelo afuniye wihina makuvaaye yeriwena.

23 Mwaha wa nroromelo, Moyizeji nuubaliwa, makolo aye onvita muwari mwa mweeri miraru, mwaha aliwa yahoona wihina mwaana ole ahithabwa owoma* ni kiyoovile nlamulo na mwene. 24 Mwaha wa nroromelo, Moyizeji nuwunnuwa okoodda withaniwa mwaana a mwanamuhiyana a Farawo, 25 oliye othoma woonihiwa goyi vamodha ni nlogo na Mulugu, ohiya ojhavo dhohagalasa dhihinaliba ovira dha yoothega, 26 mwaha oliye oona onyemuliwa wa Kiristu ninga mareeliho manlubale opitha dhoreela dha Wijipitu, teto oliye oosugwa pamadhene mukono afuniye waakela osogolo. 27 Mwaha wa nroromelo oliye ohiya elabo yoWijipitu ahoovile owali wa mwene, mwaha ali txithi okalaga ninga onomoona Ole ahinooneya. 28 Mwaha wa nroromelo, oliye waajha mathanga a paskwa ni oruma wihina musiwo dhisigihiwe nikame, wihina mungero a Mulugu ahaape aniiwa owaasuza.

29 Mwaha wa nroromelo, nlogo naatene wabuwa niya Yoofila thaya egaali yowummene. Mbwenye akudda Ejipitu nuwaahara aliwa oddadda ni manjhe.

30 Mwaha wa nroromelo, amwaana Ezarayeli nuuwerewera* txinga yoJeriko muwari mwa malabo matanu nameeli, obwanyuwa. 31 Mwaha wa nroromelo, Rahabe yoyo aali namararuwa* kaakwile vamodha ni athu oohiwelela, mwaha oliye ahawakela anameddelela ni murenddele.

32 Ki vano giwoge ddi? Kagakanne mudhidhi gahaawoge wodhela Jidiyawu, Baraki, Sansawu, Jefite, Davidi ni Samuweli vamodha nanamavuhulela amodha. 33 Mwaha wa nroromelo, aliwa ehaagonjhiha mamwene mukoddoni, yaherana dhithu dhowogowa, yahakela mpaganyo dha Mulugu, yahifuga mulomo dhaapoddogoma, 34 yahithimiha kopolo dha mootho, yahanda othawa opiwa ni supaadda, athu yahanna kopolo vano okala akopolo vanlubale, yaali akopolo mukoddoni ni yowagonjhiha anyakoddo yafuna ovolowa elabwiwa. 35 Ahiyana yahaawakela anookwa ewa yavenya muukwani, mbwenye amodha yowonihiwa goyi mwaha kayarumedha wooboliwa wihina yande waakela ovenyihiwa wanookwa weebaribari. 36 Hee, amodha ehifwanyiwa dhoweha wodhela onyemuliwa ni owaxuliwa; ohiya eyo, yoomagiwa ni yovokedhiwa mukambura. 37 Aliwa yovonyiwa ni mabwe, yowehiwa, yoogwaddanyiwa vaari ni vaari, yoopiwa ni masupadda, yeedda egawanre mathebe* a mambila ni a mbuzi, yorabulela dhithu, yowagumanana makathamiho, yowonihiwa goyi; 38 teto elabo kiyaali yofwanelela wa aliwa. Yoovira mburo dhaatedhene dha mwiddeddereni, mmwangoni, mmakunguni ni mburo dhimodha dhotibeya.

39 Mowindo, naarive aatene yaala egarumedhiwe ni Mulugu mwaha nroromelo neewa, kiyandile woona dhithu yapaganyiwiwa dhakwanelaga, 40 mwaha Mulugu ahinikoyela ethu yapama wi anivahe, wihina aliwa yahilogomanihiwe iyo nihinathi.