Karta na Tiyago

3 Addibilaga, kahiyo wihina aatene nyu munohowela okala anamahudhiha, mwaha muhunona wi Mulugu aneere onitoriha vanlubale wapitha athu amodha. 2 Mwaha iyo aatene nnokwakwathuwa dila dhowinjhivadhene. Akala muthu kanakwakwathuwa wodhela dhowoga dhaaye, muthu yoyo doologomana, teto podi wanda osumulula mwiili waye waatene. 3 Namagelela kabala* omulomoni wa kavalo wihina aniiwelelege, nnoweeddiha mwiili waye waatene. 4 Mwaasugwe a baruku anddimuwa: naarive egaathabwile wunnuwa teto ethunyiwaga nnipevo ninlubale, eneeddihiwa ni lemi ning’ono adhowaga mburo winafuna muliba anamweddiha.

5 Mwamakalelo mamodhave, nlumi yaano eng’ono ya mwiili, mbwenye nnowithukula ndhithu dhinlubale. Kasugwani, mootho mung’onove onoopaha* kokola enlubale! 6 Nlumi nnaligana ni mootho. Yaano dhaatedhene ninnihuna, nlumi thithabwile okanna obure, mwaha nnothegiha mwiili wamutene ni podi ononga egumi yaatene ya muthu teto nnaligana ni Jhehena mwaha nnowatota makathamiho. 7 Kawo mwanenyama athu ehinandiwa onfuwa, podi okala amukokolani, oovava, owiburula ni amwiiko, aatene yayo enofuwiwa. 8 Kaawo muthu ananda osugwera nlumi. Mwaha wi kannasugwereya, nnowatota makathamiho ni nihidhaala ndibwi.* 9 Ni nlumi nnomuthithimihana Yehova Baabi, teto nlumi nimodhave nnowawulumelana athu yayo epaddusiwe “moligana ni Mulugu.” 10 Mulomo mmodhave onowawoga madhu oothithimiha ni owulumela.

Addibilaga, kinafwanelela weragana dhithudha mwa makalelo yayo. 11 Nerege ntxela nimodhave nnokuma manjhe oodhiva ni manjhe oowawa? 12 Addibilaga, nerege muthanko wa figu onowavaha aazeyitona, obe muthanko wa uva onovaha figu? Emodhave, ntxela na manjhe a mwinnyu kannaakumiha manjhe oodhiva.

13 Baani ali athotho vaari veenyu? Enohoweleya akanne mweeddelo wapama winatonyihedha wihina mabasa aye anawerana nuupwaseya winadha mwaha wa thotho. 14 Mbwenye akala mmurimani mweenyu muhukanna nrima ni kamuniwanana, kamwithukulena enonelo yeenyu, mweragana ndo munna wootela ebaribari. 15 Ela kahiyo thotho enadhela odhulu; mbwenye sa elabo yeela yavati, ya anenyama* ni ya ademoniyu. 16 Mwaha vinakala nrima ni wiiddana, vinokala ohiwanana ni dhithu dhaatedhene dhabure.

17 Mbwenye thotho dhinadhela odhulu, voobajha, soweela, samurenddele, sokweya, sowaguva wiwelela, sodhaleliwa thagaraga ni dhowima dhapama, kadhinna nsakulo newene kahiyo dhogwalagwambi. 18 Ohiya eyo, dhowiima dha wogowa dhinaaliwa ni murenddele wa ale enasayela murenddele.