Karta Noobajha na Juwawu
5 Muthu yoole anarumedha wihina Yesu di Kiristu, mwaana a Mulugu, teto ole anamudhivela Mulugu aadhivelege ahima a Mulugu. 2 Mwaha wa yeyo nihinona wihina nnowadhivela ahima a Mulugu teto naamudhivelaga Mulugu nnowawiwelela malamulo aye. 3 Mbwenye omudhivela Mulugu winatapulela: wawiwelela malamulo aye mwaha malamulo aye kinanyemela. 4 Mwaha muthu yoole ali mwaana a Mulugu, onoogonjhiha elabo. Nihigonjhiha elabo mwaha wa nroromelo nehu.
5 Baani anaagonjhihe elabo? Kahi muthu yoole anna nroromelo wihina Yesu Mwaana a Mulugu? 6 Yesu Kiristu ahidha wodhela manjhe nnikame. Oliye kadhile ni manjheve baahi: mbwenye adhile ni manjhe vamodha nnikame. Vano muzimu onovaha onamoona mwaha muzimu si ebaribari. 7 Dhili dhithu tharu dhinavaha onamoona: 8 muzimu, manjhe, nnikame; dhithu dhendha tharu dhili mwimodhani.
9 Akala nnorumedha onamoona waathu, nnone wihina onamoona wa Mulugu buli winlubaleya. Mwaha ola onamoona wa Mulugu: onamoona oliye avahiliye wodhela Mwanaye. 10 Anamuroromela Mwaana a Mulugu, ohukanna onamoona. Ahinna nroromelo ni Mulugu anamoona ninga muliba woota mwaha kanaroromela onamoona avahile Mulugu wodhela Mwanaye. 11 Onamoonaya buula: Mulugu ohunivaha egumi yohimala teto egumi eyo eli ni Mwanaye. 12 Ole anamurumedha Mwaana ohukanna egumi mbwenye ole ahinamurumedha Mwaana a Mulugu kanna egumi.
13 Miyo ginulebelani dhithu ndha wihina nyu munaroromela ndina na Mwaana a Mulugu, munone wihina muhukanna egumi yohimala. 14 Nroromelo ninnihuna wooliye thinna: ethu-siithu nnamulobihu akala enowiwanana ni efunelo yaye, oliye onooniwa. 15 Teto, akala nihinona wi onoonivuruwana ndhe nnamulobihu, kannanganyedha wi nnere okanna dhithu nimulobilihu, woona wi nimulombe oliye.
16 Muthu yoole anaamone ddibile eragana yoothega ehinamuthukulela omakwelo, oliye aneere omulobelela vano Mulugu aneere onvaha egumi, hee, ginawagana ale yahinerena yoothega enathukulela omakwelo. Mbwenye ehikalawo yoothega enathukulela omakwelo. Kaginaagana yoothega yeyo anafwaneleliye olobeleliwa. 17 Ohogowa waatewene yoothega; naarive dhigaali ndo, ehikalawo yoothega ehinathukulela omakwelo.
18 Nihinona wihina muthu yoole ali mwaana a Mulugu, kanerana yoothega mbwenye Mwaana a Mulugu* onomusugwera muthu oyo. Teto Mbure kananda omwerana ethu yabure muthu yoyo. 19 Nihinona wi nipaddusiwe ni Mulugu, mbwenye elabo yaatene eli mmadani mwa Mbure. 20 Nihinona wihina Mwaana a Mulugu ohudha onivaha enonelo wihina nikanne thotho ya ole ali eebaribari. Teto iyo nili mwimodhani nuule ali eebaribari, wodhela mwanaye Yesu Kiristu. Oliye dili Mulugu eebaribari ni egumi yohimala. 21 Anaaga, pole-pole ni dhikwamuthu.*