Aalebeliye Akudda Eberewu
10 Woona wi Nlamulo murunti wa dhithu dhapama dhaadhe osogolo, ohiya ebaribariya, nlamulo kannadha neeriha mukutho dhimodhave dhinapelekiwa malabo aatene, yaka ni yaka, dhaalogomaniha ale enamwaddamela wihina emwebedhe. 2 Dhahakale ndo, mukutho dhapelekiwa kadharajhihe ohiyiwa? Mwaha ale enaapara mabasa ootaleleya woona wihina yeere otxenihiwa, kiyubuwelege dhoothega dhewa. 3 Mbwenye mohiyana ni eyo, mukutho ndho dhineriwana kadda yaka dhinowawubusedha athu wihina ehithega, 4 mwaha nikame na ng’ombe ni mbuzi kannanda othimiha dhoothega.
5 Bumwahaya, Kiristu adhaaga elabo yavati, ahiwoga egihina: “‘Nyu kamunahowela mukutho newene nvaho, mbwenye muhugegeredhela mwiili. 6 Teto nyu kamurumedhile mukutho dhoopaha newene mukutho dhopaheliwa dhoothega.’ 7 Nuwindo miyo owoga gegihina: ‘Gili vala (muroluni muhulebiwa wodhela miyo) wihina gerena efunelo yenyu, nyu Mulugu aaga.’” 8 Vobajhavene oliye aawogile egihina: “Nyu kamunahowela newene kamurumedhile mukutho, nvaho, nvaho dhoopaha newene nvaho dhinapelekeliwa dhoothega” mukutho dhendho dhinapelekiwa mowiwanana ni Nlamulo, 9 vano oliye owoga egihina: “Gili vala wihina gerena efunelo yenyu.” Oliye onovenyihavo yoobajha opwehavo yanabiili. 10 Ni “efunelo yeela” nihimala otxenihiwa ni mukalakala wodhela mwiili wa Yesu Kiristu oli nvaho.
11 Ohiya eyo, yoole ali namakutha malabo maatene anakala vamburoni vaye wihina aapare mabasa ootaleleya teto dila dhowinjhivadhene anvelela mukutho dhimodhave dhendho dhahinanda othimiha dhoothega mowakwanela. 12 Mbwenye oliye ohupeleka mukutho wamukalakala onande ovenyihavo dhoothega, nuwindo ohukarati moono woojha wa Mulugu, 13 obajha venvo anna ojheha ofiyedha amwiddani aye opwehiwa vati vamanyalo aye. 14 Mwaha waali wodhela mukutho mmodha baahi oliye athukuleliye athu aatene yaale enatxenihiwa okala oologomana ni mukalakala. 15 Ohiya eyo, muzimu wotxena onoonivaha onamoona wegihina: 16 “‘Nna thi nipangano ginafunimi werana naaliwa yavira malabo yayo’ anawoga di Yehova.* Ginere wapweha malamulo aaga mmurimani mwewa ni ginere waleba mmubuweloni mwewa.’” 17 Numala oliye wenjhedhedhave egihina: “Kagidha gubuwela dhoothega dhewa ni dhowera dhewa dhihiniwanana ni malamulo.” 18 Woona wi Mulugu ohulevelela dhoothega ndha, kunahoweleya mukutho wolevelelana dhoothega.
19 Bumwahaya addibila, mwaha wa nikame na Kiristu vano nihikanna ebaribari wihina iyo podi weedda dila enanthukulela mburo woweela, 20 dila exa ni enavaha egumi oliye anifuguleliye wodhela kurtina, obe neere mwiili waye, 21 teto woona wihina nihikanna namakutha munlubale yoyo anakabelela nyumba ya Mulugu, 22 kabeni nimwaddamele Mulugu ni murimihu wateene ni nroromelo neebaribari, nigamanle osuwa murima dhehu ni otxeniha mubuwelo wehu wabure teto mwiiliya nigamanle ohabiha ni manjhe apama. 23 Mowindala, nihidduwale olibela nerilihuna vaari vaanamwinjhi wodhela ejhehedhelo yehu, kanihogolowele mundduli mwaha ole anipaganyile dororomeleya. 24 Nubuwelanege mmodha ni mukwaye wihina nikaviherane wooniha odhivela ni wapara mabasa apama, 25 teto kanselele otugumana vamodha ninga eneera athu amodha, mbwenye nlibihanege mmodha ni mukwaye, thabwa-thabwa noonaga wi omakuthulo winna waddamela.
26 Mowindala, nerana yoothega yapudhave wula nigamanle onona ebaribari, kawo mukutho mmodha onaapelekeliwe dhoothega dhehu, 27 mbwenye nnojhehedha otorihiwa wowopiha ni owali onahidda ninga mootho onafuna watolosa athu ohiwelela. 28 Muthu yoole ahinafuna wiwelela Nlamulo na Moyizeji, aneere okwa aheddeliwe thagaraga, athu abiili obe araru yakalela onamoona. 29 Munoonamo aavi? Muthu anamunyingale Mwaana a Mulugu ni ahinavahe thima nikame na nipangano atxenihiwiyena teto anaaruwane ni anaanyemule muzimu wa Mulugu yoyo onanivaha opama wohinifwanelela, kanaafwanelele osinyusiwa vanlubale? 30 Mwaha iyo nihimunona ole awogile egihina: “Kunyawunya saaga; ginere wahogolosela.” Ohiya eyo: “Yehova* aneere otoriha nlogo naye.” 31 Ethu yowopiha vanlubale, fusinyusiwa mmadani mwa Mulugu ookalawo.
32 Mowindala, kamwaddiwale malabo amundduli, mwaha nyu mugamanle wakela waara wadhela wa Mulugu, muhanda owana koddo naarive nvilelagana goyi enlubale. 33 Malabo mamodha nyu moonyemuliwa, mooruwaniwa ni mowonihiwa goyi vaari vaathu, teto malabo mamodha, mowakavihera athu yafwanyiwa makathamiho ninga yaala. 34 Mwaha nyu mowaweddela thagaraga addibila yafugeliwe mukambura, mwahiyelele ohagalala moorumedha waakiwa dhokanna dhenyu muhaganyedhaga wihina muhukanna ethu yapama ni yamukalakala.
35 Mowindala, munaahiye okala athu ooliba murima mwaha munere wawakela mareeliho owinjhiva. 36 Mwaha nyu munohowela okala athu oovilela, wihina mwamala werana efunelo ya Mulugu, mwakele ele Mulugu apaganyiliye. 37 Teto, “vohilegela” ole “anadha aneere ofiya, kanaalegele.” 38 “Mbwenye mudhaari aaga owogowa aneere okalawo mwaha wa nroromelo naye’ mbwenye ‘ahogolowela mundduli, ginere otakaleliwa nuliye.” 39 Iyo kanili ale enahogolowela omatolosiwelo, mbwenye nili ale enna nroromelo wihina ekoye egumiwa.