Karta Nanabiili Naakudda Korintiyu
1 Miyo Pawulo, murumiwi a Kiristu Yesu wodhela efunelo ya Mulugu, vamodha ni Timotiyu ddibilihu, nnalebela karta nna mulogo woKorintiyu naaleya aatene eli oweela enakala oAkaya:
2 Opama wohinifwanelela ni murenddele wa Mulugu Baabi ehu ni wa Nabwiya Yesu Kiristu okale ni nyu.
3 Oothithimihiwa di Mulugu Baabi a Nabwiya Yesu Kiristu, Baabi a thagaraga ni Mulugu ootodola waatewene, 4 anantodola* mmakathamihoni* mwehu mwatemwene, wihina, ni otodoliwa nnakelihu wa Mulugu, nandege watodola athu amodha enafwanyiwa makathamiho bi makathamiho. 5 Mowindo, ninga makathamiho ehu yinjhiviliwa wodhela Yesu Kiristu, nimakalelo mamodhave otodoliwa nnaakelihu wodhela Kiristu wihinjhiva. 6 Akala nnofwanyiwa dhoweha nnerela wihina mutodoliwe ni nvulusiwe, teto akala nnotodoliwa, nnerela wihina ninyuwa mutodoliwe, otodoliwa ngo winere wukaviherani wavilelana makathamiho mamodhave enanifwanya. 7 Teto nihikanna ebaribari wihina munere okalave oororomeleya, mwaha nihinona wihina, ndala ninga munafwanyiwinyu makathamiho mamodhave enanifwanya ni nyuwa munere otodoliwa.
8 Addibila, nnafuna mwanone makathamiho yanifwanyile elabo yoAziya. Makathamiho yahinisegedha ofiyedha iyo ohukanna kopolo teto kananona akala neere okalawo obe naari. 9 Mowindo, iyo nuubuwela wi naathongeliwe okwa. Eyo yereyile wihina nihithabwege wiroromela naannya, mbwenye nimuroromelege Mulugu anna kopolo dhowavenyiha anookwa. 10 Oliye ohunoobola ni anerege onoobolave vaari va ngovi ela yowopiha eli okwa, teto nivanove nihikanna ejhehedhelo wi anerege odhowave anoobolaga. 11 Ninyuwa podi onikavihera wodhela onilobelela, mowindo, athu owinjhiva enerege omuthithimiha mwaha wa iyo, ni mahala nawakenlihu wodhela wakuliwa wa malobelo yawerana anamwinjhi.
12 Mowindo, iyo nnowithukula mwaha wi: mwilaboni thabwa-thabwa vaari veenyu nnowedda nimakalelo oweela ni ebaribari enadhela wa Mulugu, ohiya ni enonelo ya elabo ela mbwenye wodhela opama wohinifwanelela wa Mulugu. Teto mubuwelo wehu onovaha onamoona. 13 Mwaha iyo kannulebelani dhithu nyu muhunandinyu woonelamo, teto miyo ginajheha wi nyu moonelegemo pamadhene* dhithu ndha, 14 nimakalelo yayo nyu muhonelamo wi iyo nnowithukula mwaha weenyu, ninyuwa munere withukula mwaha wehu labo na Nabwiya Yesu.
15 Mowindala, ni nroromelo nna, miyo gafuna girajhihe odha wuwaredhelani wihina nyu mukanne ohagalala* dila yanabiili; 16 mwaha goofuna odha wuwaredhelani gaadhowaga oMasedoniya teto gaakumaga oMasedoniya gihogolowele wuwaredhelani, gamala mugivelele vang’ono mudila gaadhowaga oJudeya. 17 Nerege miyo geeragana yothoma ela kagavahile thima? Obe ginerana dhothoma mowiwanana ni dhofuna dha mwiili, bumwahaya ngera “hee, hee” mudhidhi mmodhave “naari, naari”? 18 Mbwenye, ndala ninga Mulugu ali oororomeleya, dhithu nuwaddelihuni sebaribari, iyo kannera “hee” teto mudhidhi mmodhave iyo weera “naari.” 19 Ohiya eyo, Yesu Kiristu Mwaana a Mulugu, yoyo miyo Silvanu* ni Timotiyu nulaleyihuni, kanawoga “hee” amala oliye owoga “naari,” mbwenye “hee” anamuwogiye damukalakala. 20 Mpaganyo dhaatedhene dha Mulugu dhinowakwanela* mwaha wa Yesu. Bumwahaya wodhela ndina naye nnowera “Amem” wa Mulugu wihina nimuthithimihe Mulugu. 21 Mbwenye ole ananiroromeliha iyo vamodha ni nyu wihina nili a Kiristu, di Mulugu anisakunle. 22 Oliye ohunivaha selu. Selu eyo bumuzimu wotxena oli mmurimani mwehu, oli mpaganyo onaakwanele.
23 Miyo nivanove kaginaadhe oKorintiyu ngo wihina ginupiheni mbani, Mulugu dinamoona aaga.* 24 Kahiyo wera nroromelo munninyuna annyaya di iyo, mbwenye mabasa ala nnaapara vamodha wihina mukanne ohagalala, teto nyu muli oolibeene mwaha wa nroromelo nenyu.