Karta Noobajha Naakudda Tesalonisense

3 Vano nuwoona wihina kananda ovilela, iyo woona wi sapama okala wAtena yekihu 2 ni omuruma Timotiyu ddibilihu ni murumiwi a Mulugu yoyo analaleya muthenga wa Kiristu wihina adhe wengo; iyo nimurumile ni efunelo yowulibihani ni wuutodolani nroromelo neenyu, 3 wihina ahikalewo muthu anaathabwe othuwathuwa mwaha wa makathamiho ala. Teto nyu muhunona wihina iyo kannanda wathawa makathamiho ala. 4 Mudhidhi nigaali vamodha ni nyu, nowuwaddelesani wihina neere ofwanyiwa makathamiho ninga yaala, teto siyeyo enanipadduwela peeno ninga munonninyu. 5 Bumwahaya, miyo nuwoona wihina kaganda ovilela, omuruma Timotiyu wihina ginone makalelo nili nroromelo neenyu, goovaga wihina Ddiyabo* anadha uholoseni, vano mabasa ehu ekale eebeweene.

6 Mbwenye Timotiyu dhendha vala onofiyawene, oliye ohunaddela muselu dhapama wodhela ororomeleya ni odhivela weenyu, teto onaddelave egihina nivanove munonubuwela kamunanddiwale ni muhukanna munukwela woonoona, ninga iyo ninnihuna munukwela wowuwonani dila biili. 7 Bumwahaya addibila, mmakathamihoni mwehu mwaatemwene ni goyi yaatene nonilihu, nihilibiheya vanlubale mwaha weenyu ni ororomeleya munoonihinyu. 8 Mwaha akala nyu munokala txithi mwa Nabwiya iyo nnakala oolibeene.* 9 Nnande addi omutamalela Mulugu mwaha ohagalala winlubale ninnihuna vamentoni va Mulugu ehu mwaha wa nyu? 10 Mutana ni mahiyu, iyo nnolobela nuuviheya wihina nigumane vamodha ni nyu kove ni kove ni wihina naakwanelihe dhaatedhene dhinuhalelani munroromeloni neenyu.

11 Bumwahaya ninna olobela wihina Mulugu Baabi ehu ni Nabwiya ehu Yesu, enifugulele dila wihina iyo nande odha wuwoonani. 12 Teto Nabwiya athabwege wenjhedhedha, hee, odhivelana weenyu mmodha ni mukwaye ni makalelo munaadhivelinyu athu aatene, ninga iyo nnathabwihu wudhivelani nyu aatene; 13 ni makalelo yayo, oliye aneere olibiha murima dhenyu wihina muhukanne muladdu, mugaali oweela vamentoni va Mulugu ehu ni Baabi, mudhidhi Nabwiya Yesu vamodha ni oweela aatene enafuniwa odha.