Aalebeliye Akudda Eberewu

13 Mudhowegeve mudhivelanaga mmodha ni mukwaye ninga oddibila. 2 Munaahiye wawakela aleddo, mwaha athu amodhaya ehinonaga yahaawakela angero. 3 Kamwaddiwale ale eli mukambura, mwawubuwelege ekalaga ninga mmagiwe vamodha naaliwa. Ohiya eyo, kamwaddiwale ale enoonihiwa goyi, mwawubuwelege ekalaga ninga munoonihiwa goyi vamodha naaliwa. 4 Matelo ekale oothithimiheya vamentoni vaathu aatene, ogonihana waathu etelane kukale wonyakavala, mwaha Mulugu aneere watoriha athu yaale enawerana mararuwo* ni ale enakuma mba. 5 Makalelo eenyu ookalawo yonihege wihina kamunadhivela korowa ni muhagalalege ndhithu munninyuna. Mwaha oliye awogile egihina: “Kagidha guhiya ni kagidha gunyanyala.” 6 Wihina nikale ooliba murima ni nifiyedhe owoga negihina: “Yehova* dinagikavihera; kagidha goova. Muthu anaagerele ddi?”

7 Mwawubuwele addibila enuuholelani vaari veenyu, ale yuwaddeleni muthenga wa Mulugu, vano moonaga dhowima dha mweeddelo wewa wapama, mutajhihege nroromelo newa.

8 Yesu Kiristu dimmodhave ndilo, peeno ni mukalakala.

9 Kamuholosiwe ni dhohudhiha dhohiyana-iyana ni dhohunoneya, mwaha sapama murima olibihiwa ni opama wohinifwanelela ohiya ni dhoojha dhahinaakavihera ale enathuwathuwela.

10 Athu enaapara mabasa muddammwani kinna oneti woojha dhithu dhinakala waltareni ninnihuna. 11 Mwaha nyama dha anenyama ale namakutha munlubale anathukuleliye nikamena mburo woweela ninga mukutho wa dhoothega, dhinapaheliwa okwibi wa ddammwa. 12 Nimakalelo mamodhave Yesu oonihiwe goyi okwibi wa mulago wa luwani wihina atxenihe nlogo nnikame naye. 13 Mowindala, kabeni ndhowe nagumane nuliye okwibi wa ddammwa, nnyemuliwaga ninga oliye, 14 mwaha kaninna luwani yamukalakala, mbwenye ninna ojheha ni murima wehu waatene yeyo enadha osogolo. 15 Wodhela nroromelo ninnihuna ni Yesu nimuthithimihege Mulugu malabo aamatene, eyo enakala ninga mukutho nnanvahihu Mulugu, teto nnolabihedha mulomo dhehu wihina nivuwihe ndina naye vaanamwinjhi. 16 Ohiya eyo, kamuddiwale werana opama ni ogawana naathu amodha ele munninyuna, mwaha Mulugu onodhiveliwa mukutho ndho.

17 Mwawiwelelege ale enuuholelani vaari veenyu ni muharege dhoholela dhewa, mwaha aliwa enowusugwerani ninga muthu anaakulele muladdu; wihina yaparege mabasa ala nuuhagalala ohiya waaparaga nuwikubanyedha, mwaha eyo yeere wutotelani makathamiho.

18 Mudidele onilobelela, mwaha kannanganyedha wihina nihikanna mubuwelo wapama, woona wihina nnafuna nikale oororomeleya mwa dhithu dhaatedhene. 19 Mbwenye ginowukongomedhani olobela wihina miyo gihogoloseliwe wa nyu mowaguva.

20 Mulugu a murenddele, ohunvenyiha muukwani Nabwiya ehu Yesu teto nikame na nipangano namukalakala nili ni Yesu. Oliye namakukula munlubale a mambila 21 uvaheni dhithu dhaatedhene dhapama wihina mweregena efunelo yaye, teto wodhela Yesu Kiristu oliye ononikavihera werana ele enamuhagalasa. Mulugu aakele nthithimiho na mukalakala. Amem.

22 Addibila, miyo ginowukongomedhani wihina nuuvilela mpwasedhe wavuruwana madhu ala oolibiha, mwaha karta nna gulebelimini kanlapile. 23 Ginafuna munone wihina ddibilihu Timotiyu ohukumihiwa mukambura. Oliye adha ovanene nnere odha wengo wihina nuwooneni.

24 Malojhelo aaga mwaavahedhe ale enuuholelani ni oweela aatene. Addibila owItaliya enowaaruma malojhelo.

25 Opama wohinifwanelela okale ni nyu aatene.