Alebeliye Akudda Romanu
3 Muthu akala muJudewu obe ineliwa,* anapuravo ddi? 2 Vihikala mpurelo munlubale. Vobajha, Mulugu ohavaha maJudewu dholebela dhootaleleya. 3 Ki enapadduwa ddi? Akala athu amodha kinna nroromelo, ohuroromeleya wewa onoomariha ororomeleya wa Mulugu? 4 Newene! Naarive athu yerege woota, mbwenye Mulugu dinawoga ebaribari, ninga munawogela dholebela, dhegihina: “Madhu eenyu enere woneya wihina bowogowa, mudhidhi mwatorihiwaga mooniha wihina aliwa enowoota.” 5 Nerana dhithu dhabure, athu enowoonelamo wihina Mulugu dowogowa. Akala oliye ononisinyusa eyo enatapulela wihina Mulugu dohogowa? (Athu amodha enubuwela ndo) 6 Newene! Akala siyeyo, Mulugu anaatorihe aavi elabo?
7 Mbwenye akala miyo ginowoota, teto woota waaga onowoniha wi Mulugu anawoga ebaribari ni onowathukulela athu omuthithimiha oliye, mwahaya bwaddi Mulugu agagithana muliba oothega? 8 Nerege iyo podi owogaga ninga athu amodha enoota yegihina: “Kabeni neregena dhithu dhabure wihina opama odhe”? Otorihiwa waathu yayo bowogowa.
9 Ki nere ddi? Nerege iyo nili athimaya wapitha athu amodha? Newene! Mwaha nihinona wihina maJudewu vamodha ni aGeregoya, ehikanna yotheega, 10 ninga munawogela Dholebela dhegihina: “Kawo muthu owoogowa, newene mmodha; 11 kawo muthu anna enonelo; teto kawo muthu anamusayela Mulugu. 12 Athu aatene ehipupuruwa, kinna mabasa; kawo anerana opama, newene mmodha.” 13 “Mmelo wewa mahame ootibiweene; aliwa enowileketha ni nlumi neewa.” “Madhu enaawogiwa enakala ninga ndibwi na nowa.” 14 “Teto muwano mwewa muhudhaala madhu owulumela ni oowawa.” 15 “Manyalo ewa enathamagela okuthula nikame.” 16 “Munaviriwa enowatatamula makathamiho ni enowawoniha goyi athu, 17 ni kinonile dila ya murenddele.” 18 “Vamentoni vewa kinamova Mulugu.”
19 Mowindala, nihinona wi dhithu dhaatedhene dhinawoga Nlamulo, nnawagana athu aatene eniwelela Nlamulona, wihina athu ehikanne yowoga woona wi elabo yaatene enofwanelela osinyusiwa ni Mulugu. 20 Ohiya eyo kawo muthu* anooniwe ninga owogowa vamentoni vaye wodhela ohariha dhinawoga Nlamulo, woona wi mabasa a Nlamulo* enomuthukulela muthu onona ele eli yabure.
21 Mbwenye vano nahihoweleyaga nlamulo ohoneyihiwa wogowa wa Mulugu, Nlamulo nna ni Anamavuhulela enavahiwa onamoona, 22 hee, wogowa wa Mulugu winadhela mwaha womuroromela Yesu Kiristu wa athu yaale aatene enna nroromelo. Mwaha wi Mulugu kanamusakula muthu. 23 Aatene ehithega ni kinafiyedha nthithimiho na Mulugu, 24 mbwenye mwaha nvaho wa opama wohinifwanelela, aliwa enowithaniwa ninga athu owoogowa, wodhela woboliwa ni mukutho avahile Kiristu Yesu. 25 Mulugu ohumpeleka Kiristu ninga mukutho wihina athu ekanne wandana nuliye wodhela nroromelo na nikame naye. Mulugu oherana ndo wihina ooneyihe wogowa waye, teto mwaha woovilela waye eera walevelela dhoothega yeriliwana kale. 26 Oliye oherana ndo wihina ooneyihe wogowa waye ovanene, wi awonege ale enna nroromelo ni Yesu okala athu owogowa.
27 Enuthukulela withukula ddi? Kayiwo. Wodhela nlamulo baani? Mwaha wi nnowiwelela nlamulo? Naari! Mbwenye mwaha wiwelela nlamulo na nroromelo. 28 Mwaha iyo nnonne wi muthu anooniwa okala owogowa wodhela nroromelo yahihoweleyaga mabasa enakukusa nlamulo. 29 Nerege oliye Mulugu amaJudewu baahi? Kahiyo Mulugu a malogo mamodha? Hee, oliye Mulugu aathu aatene. 30 Woona wi Mulugu ali mmodha baahi, oliye anawona athu owineliwa ninga owogowa mwaha wa nroromelo teto oohineliwa wodhela nroromelo neewa. 31 Eyo enatapulela wihina nnafuna nibibiddele nlamulo wodhela nroromelo nehu? Naari! Iyo nnowakwaneliha nlamulo.