Dhilebiwe ni Matewuji
18 Mudhidhi yoole, anamaharaye omwaddamela Yesu ni omukoha yegihina: “Mwebaribarene munlubaleya a Mumweneni wodhulu baani?” 2 Vano oliye omwithana mwaana ompweha vaari vewa 3 ni owoga egihina: “Ginowuwaddelani ebaribari mwahisaddula* murima dhenyu mukala ninga anamwani, kamunande ovolowa Mumweneni wodhulu. 4 Bumwahaya ole aniyeviha ninga mwaana diyoyo ali munlubaleya Mumweneni wodhulu; 5 teto muthu yoole anamwakela mwaana ninga yola ni ndina naaga anogakela nimiyoya. 6 Mbwenye ole anaamukwakwathuse mmodha waathu yaala ang’ono enagiroromela, yakale yapama ommagelela mukohini mwaaye nibwe ninlubale amusilana buuru tirigu, vano avokedhiwe muniya addaddele mommo.
7 “Ginowakubanyedha athu amwilaboni mwaha wowakwakwathusa athu amodha! Mwebaribarene yeere okalawo athu amodha yaakwakwathuse* amodha, mbwenye ginowakubanyedha athu yayo enakwakwathusa athu amodha! 8 Akala nlada nawo obe nnyalo nawo nnowukwakwathusa, ogwaddewo ni orahilele wolapela. Sapama ovolowa ni egumi ogaddibwaga obe ooragalene, ohiya ovokedhiwa maladawo aamenlene obe manyalo awo aamenlene othukuthani wa mootho ohunathima. 9 Teto akala ninto nawo nnowukwakwathusa, ovenyihemo orahilele wolapela. Sapama ovolowa ni egumi nninto nimodha ohiya ovokedhiwa oJhehena* onahidda mootho ni mento awo aamenlene. 10 Mukale pasope wihina munamulamuse mmodha wa athu yaala ang’ono, miyo ginowuwaddelani wihina angero ewa eli odhulu enosugwa malabo aamatene kove ya Ababa enakala odhulu. 11* ——
12 Nyu munoonamo aavi? Namakukula anna mambila 100 vano nimodha nnorimela, kanahiya 99 omwangoni vano anodhowa osayela nne nirimele? 13 Ginowuwaddelani ebaribari, oliye afwanya anoothabwa ohagalala ohiyana naale 99 ehirimele. 14 Nimakalelo mamodhave, Ababa* eli odhulu kinafuna newene mmodha wa athu yaala ang’ono orimela.
15 “Ohiya eyo, ddibilo erana yoothega, odhowe wamonihe yoothega* eriliyena, we nuliye baahi, uvuruwana woomobola ddibilo. 16 Mbwenye ahuvuruwana omuthukule muthu mmodha obe abiili, mwaha muladdu waatene onanoneya ebaribariya akala ehikalavo anamoona* abiili obe araru. 17 Oliye ahuvuruwanani, muwoge ni mulogo, teto ahivuruwana ni mulogoya omoonege ninga muthu amwilaboni ni namakukusa musoko.
18 “Ginowuwaddelani ebaribari: Dhaatedhene munamaginyu elabo yavati dhinere omagiwa elabo yodhulu, teto dhaatedhene munatapulinyu elabo yavati dhinere otapuliwa elabo yodhulu. 19 Teto ginowuwaddelani ebaribari ela: Nyu athu abiili munakala elabo yavati, mwiwananela oloba ethu yathima, munere ovahiwa Nababa eli odhulu. 20 Mwaha vili athu abiili obe vili athu araru egatugumane mwa ndina naaga, miyo ginakala vaari vewa.”
21 Vano Peduru omwaddamela Yesu ni omukoha egihina: “Nabwiya, ddibilaga agithegela gimulevelele dila ngaasi? Gimulevelele dila 7?” 22 Yesu omwakula egihina: “Miyo kaginuwaddela dila 7 baahi, mbwenye okunamo dila 77.
23 “Bumwahaya Omwene wodhulu onaladdanihiwa ni mwene awithanihe anamalabaye wihina aakukuse mangawu. 24 Nubajha wakukusa, odhiwana mulobwana ambolihe korowa dhowakwana 10 000 talentu.* 25 Mbwenye woona wihina kanna ethu wihina alivena mangawu ale, nabwiye oruma wihina oliye, mwariye, anaaye ni dhithu dhaatedhene anniyena dhigulihiwe wihina eliviwe mangawu ale. 26 Vano mudhaari ole okokora ni ompigiriyela egihina: ‘Mugeddele thagaraga, ginere wulivani dhaatedhene.’ 27 Mwaha womweddela thagaraga nabwiya amudhaari ole, omwihiya odhowaga ni omulevelela mangawu anniyena. 28 Vano mudhaari ole omaruwa, odhowa ogumana ni mudhaari mukwaye, yoyo ambolihe korowa dhowakwana 100 denariyu,* vano oliye omuhidda, wambela omurigindda mmelo egihina: ‘Gilive korowadhaga ogibolihiwe.’ 29 Nuwindo mudharaaye omukokorela ni omuloba egihina: ‘Kagikurumuweleni miyo ginere oliva korowa dhenyu.’ 30 Mbwenye oliye okoodda. Ohiya eyo, oliye onvokedha mukambura ofiyedha omuhogolosela mangawu anniyena. 31 Vano adhaari akwaye nuwoona dhaapadduwe, aliwa okwerebeya vanlubale, odhowa omwaddela nabwiya ewa dhaatedhene dhereye. 32 Nabwiye omwithana ni owoga egihina: ‘Mudhaari abure, we nugiloba miyo gihulevelela mangawu aamatene wanniwena. 33 Ninga miyo guweddelimi thagaraga, we kuwerena emodhave, omweddela thagaraga mudhaari mukwawo?’ 34 Vano nabwiye nutakaleliwa, omuthukula wavahedha anamasugwera kambura ofiyedha oliva dhaatedhene abolihiye. 35 Ababa oodhulu enere wuwerelani emodhave kadda muthu wa nyu ahimulevelelaga ddibile ni murima watene.”