Aalebeliye Akudda 1 Korintiyu
1 Miyo Pawulo, giithaniwe ni efunelo ya Mulugu wihina gikale murumiwi a Kiristu Yesu vamodha ni ddibilihu Sosteni, 2 nnalebela karta nna mulogo wa Mulugu oli oKorintiyu vamodha ni athu aatene eli mburo dhimodha yithaniwe wihina ekale oweela mwimodhani ni Kiristu Yesu ni enavuwiha ndina na Nabwiya Yesu Kiristu ali Nabwiya ehu ni ewa.
3 Mwaakele opama wohinifwanelela ni murenddele onadhela wa Mulugu Baabi ehu ni wa Nabwiya Yesu Kiristu.
4 Miyo ginomutamalela Mulugu aaga malabo aamatene mwaha weenyu wodhela opama wohinifwanelela wa Mulugu uvahiliyeni wodhela Kiristu Yesu; 5 mwaha wa oliye muhurelihiwa mwa dhaatedhene, ni kopolo dhaatedhene munninyuna dhowoga ni dha enonelo yenyu, 6 woona wihina onamoona wodhela Kiristu ohutibeeleya wa nyu, 7 ofiyedha ohuhalelagani newene gari modha wula mujhehaga woneyihiwa wa Nabwiya ehu Yesu Kiristu. 8 Oliye aneere wulibihani ofiyedha omakuthulo, wihina mwahinkedhiwe ethu labo na Nabwiya ehu Yesu Kiristu. 9 Mulugu ole uwithanneni wihina mukale mwimodhani* ni Mwanaye Yesu Kiristu Nabwiya ehu dororomeleya.
10 Addibila, miyo ginowukongomedhani mwa ndina na Nabwiya ehu Yesu Kiristu wihina aatene mwiwananege ndhithu munawoginyu ni mwahigawanyeye vikalelinyu, mbwenye mukale owiwanana mmubuweloni ni mukanne moonelo mmodhave. 11 Mwaha athu amodha enakala vaade va Kolowe, ehigaaddela wihina nyu addibila kamuniwanana. 12 Enaneriha ndo, sowihina kadda muthu wa nyu onowoga egihina: “Miyo gili a Pawulo,” “miyo gili a Apolu,” “miyo gili a Sefaji,”* mbwenye “miyo gili a Kiristu.” 13 Nerege Kiristu ohugawanyeya? Pawulo ohukomeliwa vantxikwani na goyi wihina akwe mwaha weenyu? Obe, nyu mbaddiziwe mwa ndina na Pawulo? 14 Ginomutamalela Mulugu mwaha miyo ohumbaddiza newene mmodha wa nyu ahili Kirispu ni Gayu, 15 wihina ahikalewo muthu anaawogege wi miyo gibaddiziwe ni ndina na Pawulo. 16 Hee, ginorumedha wihina gihabaddiza athu a vaade va Estefana. Mbwenye akala gihimbaddiza muthu mmodhaya, miyo kaginonne. 17 Mwaha Kiristu kagirumme wihina gibaddizege, mbwenye wi gilaleyege muthenga dhapama ohiya ni thotho dhaathu, wihina ntxikwa* na Kiristu nnadhe nihikanne mabasa.
18 Ebaribari wihina ale enadhowa otolosiwa enoona wihina dhohudhiha wodhela ntxikwa na goyi* otaduwa, mbwenye wa iyo nnavulusiwa, nnona ninga kopolo dha Mulugu. 19 Mwaha Dholebela dhinihina: “Ginere omariha thotho dhaathu enna enonelo ni ginere okoodda thotho dhaathu ethabwile ohudhera.” 20 Muthu a thotho ali waani? Ki namaleba* ali waani? Ole anadhiveliwa ovanyiha dhithu dheelabo* ela ali waani? Mulugu koonihile wi thotho dha mwilaboni muna otaduwa? 21 Wodhela thotho dha Mulugu, elabo ni thotho dhewa kifiyedhile omunona Mulugu. Mowindo, wodhela otaduwa onalaleyiwa, Mulugu ohaavulusa athu yaale enna nroromelo.
22 Mwaha wa yeyo maJudewu enaloba yintelelo teto Agerego enasayela thotho, 23 mbwenye iyo nnamulaleya Kiristu akwile vantxikwani na goyi eli ethu yokwakwathusa vamentoni va maJudewu ni enooniwa naathu a malogo ninga otaduwa. 24 Ni makalelo yaala, waathu yaale yithaniwe, maJudewu ni aGerego enamoona Kiristu ninga kopolo ni thotho dha Mulugu. 25 Mwaha dhithu dha Mulugu athu enooniwa ninga otaduwa, dhithu dhendho sili dha thotho wapitha athu, teto dhithu dha Mulugu athu enooniwa ninga kadhinna kopolo sinna kopolo wapitha athu.
26 Addibila, nyu muhoona wi nuwithaniwa ni Mulugu owinjhiva wa nyu kamwanna thotho vamentoni vaathu, newene owinjhiva wa nyu kamwali akopolo newene ooreela,* 27 mbwenye Mulugu asakunle dhithu dheelabo ela dhihinna thima, wihina dhaatote manyazo ale enna thotho; teto Mulugu asakunle dhithu dhahinna kopolo dheelabo ela, wihina atotena manyazo dhithu dhinna kopolo; 28 ohiya eyo, Mulugu asakunle dhithu dhahinna thima dheelabo ela ni dhinalamusiwa, ni dhithu dhinakala ninga kadhinna mabasa wihina dhigonjhihe dhithu dhinakala ninga sathima, 29 wihina ahikalevo muthu* aniithukulege vamentoni va Mulugu. 30 Mbwenye Mulugu dinikavihere okala mwimodhani ni Kiristu Yesu, mwaha oliye onowoniha thotho ni wogowa wa Mulugu. Vano wodhela Yesu, athu podi okala oweela, teto wodhela yowobola athu podi ovulusiwa, 31 wihina dhikale ndo ninga dholebela dhinawogiwa dhegihina: “Ole aniithukula, ithukulege mwaha wa Yehova.”*