Dhilebiwe ni Matewuji
1 Livuru nnawoga wodhela egumi* ya Yesu Kiristu,* mwaana Davidi, mwaana Aabaraawu:
2 Abaraawu ombala Izaki;
Izaki ombala Jako;
Jako ombala Juda ni ahima amodha;
3 Juda ombala Pereji ni Zera, mayiwa aali Tamari;
Pereji ombala Ejironi;
Ejironi ombala Rawu;
4 Rawu ombala Aminadabi;
Aminadabi ombala Nazo;
Nazo ombala Salmoni;
5 Salmoni ombala Bowaji, mayeya aali Rahabe;
Bowaji ombala Obedi mayeya aali Ruti;
Obedi ombala Jese;
6 Jese ombala mwene Davidi.
Davidi ombala Salomawu mayeya aali mwadha Uriya;
7 Salomawu ombala Robowawu;
Robowawu ombala Abiyaji;
Abiyaji ombala Aza;
8 Aza ombala Jeyozafa;
Jeyozafa ombala Jeyorawu;
Jeyorawu ombala Uziya;
9 Uziya ombala Jotawu;
Jotawu ombala Akaji;
Akaji ombala Ezekiya;
10 Ezekiya ombala Manaseji;
Manaseji ombala Amoni;
Amoni ombala Josiya;
11 Josiya ombala Jekoniya ni ahima amodha, mudhidhi maJudewu ethukuleliwaga oBabiloniya.
12 Nuumala othukuleliwa oBabiloniya, Jekoniya ombala Seyaltiyeli;
Seyaltiyeli ombala Zorobabeli;
13 Zorobabeli ombala Abiyudi;
Abiyudi ombala Eliyaki;
Eliyaki ombala Azori;
14 Azori ombala Sadoki;
Sadoki ombala Akimu;
Akimu ombala Eliyudi;
15 Eliyudi ombala Eliyazar;
Eliyazar ombala Mataa;
Mataa ombala Jako
16 Jako ombala Juze, mamune Mariya, amaye Yesu, anithaniwa Kiristu.
17 Mowindala malogo aamatene okuma Abaraawu ofiyedha Davidi yaali 14, vano okuma Davidi ofiyedha mudhidhi amwaana Ezarayeli yathukuleliwiwa oBabiloniya yaali malogo 14, okuma mudhidhi amwaana Ezarayeli yathukuleliwiwa oBabiloniya ofiyedha Kiristu obaliwa yaali malogo 14.
18 Obaliwa wa Yesu Kiristu wereyile mudhidhi Mariya amaye Yesu, egaveviwe ni Juze, Mariya okanna wari wodhela muzimu wotxena,* ehinatelane. 19 Woona wi Juze mamune Mariya aali muthu apama ni kafuna omuthukuliha manyazo, Juze ofunaga omuhiya ahiwogile ethu. 20 Mbwenye Juze nuwubuwela dhithu ndha, mungero a Yehova* owoga nuliye muurohani egihina: “Juze, mwaana Davidi, kuwoove omuthukulela mwariyo Mariya vaade vawo, mwaha oliye arubale* mwaha muzimu wotxena. 21 Mariya aneere ombala mwaana, mwanamulobwana, onvahe ndina na Yesu,* mwaha oliye aneere wawobola athu aye mudhoothegani mwewa.” 22 Dhithu dhaatedhene ndha dhipadduwe wihina yakwanele madhu aawogile Yehova* wodhela namavuhulela aye egihina: 23 “Kasugwani! Mwananamwali ahinagonege ni mulobwana aneere okanna wari, ambale mwaana, mwanamulobwana, ni aneere ovahiwa ndina na Emanuweli,” ndina nna nnatapulela “Mulugu ali nihiyo.”
24 Juze nuvenya werana dhaatedhene mungero a Yehova* awogiliye ni omuthukula mwariye ni okalagana vamodha. 25 Mbwenye Juze kaamugonihe Mariya ofiyedha ombala mwaana mwanamulobwana, vano Juze onvaha ndina na Yesu.