Alebeliye Akudda Romanu
10 Addibila, efunelo yaaga yavati vamurima ni ginamulobesimi Mulugu, sowihina aliwa evuluwe. 2 Miyo ginovaha onamoona wihina aliwa booviheya wa Mulugu, mbwenye kinaviheya ni enonelo yeebaribari. 3 Mwaha aliwa kinonne wihina Mulugu dinamweriha muthu okala owogowa, mwaha wa yeyo enothuwathuwela werana dhithu wihina ekale athu owogowa, mbwenye kinerana ele Mulugu anawogiye enamweriha muthu okala owogowa. 4 Mowindo, wodhela mukutho wa Kiristu, Nlamulo nihifiya omakuthulo, wihina muthu yoole anaamuroromele, ooniwe ninga muthu owogowa.
5 Moyizeji ohuleba wodhela wogowa winadhela mwaha wa Nlamulo egihina: “Muthu yoole anerana dhithu ndha aneere ofwanya egumi.” 6 Mbwenye wogowa winadhela mwaha wa nroromelo winihina: “Kuwoge mmurimani mwawo wegi: ‘Baani anagwele odhulu?’ wihina amukitihe Kiristu; 7 obe: ‘Baani anakitele Mwaabijimuni?’* wihina anvenyihe Kiristu muukwani.” 8 Mbwenye yolebela enawoga ddi? “Madhu eli vowaddamelavene vamulomoni vawo ni mmurimani mwawo,” eyo enatapulela “madhu” a nroromelo nnalaleyihu. 9 Akala we onoolaleya vathaddo wihina Yesu di Nabwiya, teto mmurimani mwawo wakanna nroromelo wihina Mulugu ohunvenyiha muukwani, onere ovulusiwa. 10 Wihina muthu akale owogowa onohowela akanne nroromelo mmurimani mwaaye, teto wihina avulusiwe oliye onofwanelela ovuwiha muthenga oyo vathaddo ni mulomo waye.
11 Mwaha epaddi dhaala ya Yolebela enihina: “Kawo muthu anamuroromele, anadha aathukula manyazo.” 12 Bumwahaya, kawo ohiyana maJudewu ni aGerego; Nabwiya ali naathu aatene ni anowareeliha aatene yaale enanvuwiha. 13 Mwaha “muthu yoole anaavuwihe ndina na Yehova* aneere ovulusiwa.” 14 Kito enanvuwihe addi wula ehimuroromelaga? Ki enambele addi omuroromela wula ehiniwege alaleyiwaga? Kito enaamunone addi ahidhowilewo muthu aalaleya? 15 Akala dhili ndo, enadhowe addi olaleya wula ehirumiwe? Ninga munawogela dholebela: “Oowoma manyalo, baale enalaleya muthenga wapama wa dhithu dhapama!”
16 Mowindo, kahiyo athu aatene erumedhe muthenga dhapama. Izayiya ohuwoga egihina: “Yehova,* baani aroromele dhithu ndha nilaleyihu?”* 17 Mowindo, nroromelo nnahara ele eniwiwa. Teto ele eniwiwa enadha mwaha wa madhu a Kiristu. 18 Mbwenye miyo ginakohimi siila: Nivano kiniiwe muthenga ola? Ehiwa, “mwaha athu aatene a velaboni yavati ehiwa muthenga ola; teto ale enakala mburo dholapela ehawiwa madhu ala.” 19 Ginookohave gegihina: Nerege Ezarayeli kanoonelemo? Vobajha Moyizeji ohuwoga egihina: “Miyo ginere wuwerihani wihina mwakalelege nrima athu ehili a nlogo; ni ginere wuwerihani wihina mukanne owali wowopiha ni nlogo nahinna enonelo.” 20 Izayiya nuuliba murima ohuwoga egihina: “Gihifwanyiwa naathu yahigisayela, gihinoniwa naathu yahagikohedha.” 21 Mbwenye oliye onowoga wodhela Ezarayeli egihina: “Malabo aamatene gowatapulela nlada naaga nlogo nohiwelela ni nowithukula.”