Aalebeliye Akudda 1 Korintiyu
12 Vano addibila, ginafuna wihina munone pamadhene wodhela gari dhoomuzimuni. 2 Nyu muhunona wihina mudhidhi muhunabajhe ororomela,* nyu mootujeliwa ni mooholosiwa ni dhikwamuthu dhihinawoga muharaga mburo bu mburo wuthukuleliwani. 3 Mowindo, munonege wi kaawo muthu anawoga egihina: “Yesu ohuulumeliwa!” awogaga wodhela muzimu wa Mulugu, teto kaawo muthu anawoga egi: “Yesu di Nabwiya!” ehili wodhela muzimu wotxena.
4 Dhihikalawo gari dhohiyana-iyana, mbwenye muzimuya bummodhave; 5 teto mmabasani a Mulugu mwihikala mabasa ohiyana-iyana, mbwenye Nabwiyaya dimmodhave; 6 wihikala mabasa oohiyana-iyana, mbwenye Mulugu anafuna wihina athu aatene yaparege mabasa ayo, ali mmodha. 7 Mbwenye nikavihero na muzimu wotxena nnowoneya mwaathu aatene teto Mulugu onowavaha wihina aakavihere aatene. 8 Wodhela muzimu wotxena, ohukalawo muthu anavahiwa madhu* a thotho, teto wodhela muzimu yoyo enowandeya owoga ni enonelo; 9 wodhela muzimu wotxena enowandeya okanna nroromelo teto amodha enowanda wavulumusa aredda 10 ni onowakavihera amodha waapara mabasa ootikiniha; mmodha ovuhulela; mmodha wawonelamo pama madhu evuhuleliwe; mmodha owoga dhiwogelo dhohiyana-iyana; muthu mmodhaya otapulela dhiwogelo. 11 Naarive dhigaali ndo, dhithu dhaatedhene ndha dhinapariwa wodhela muzimu wotxena mmodhave teto muzimu ola onamugawela kadda muthu ninga munafuneliwa.
12 Mowindo ninga mwiili oliiwa mmodhave mbwenye ohukanna yaano dhowinjhiva teto naarive yaano ndho dhiginjhivile, mwiiliya mmodhave, nimakalelo mamodhave Kiristu ali ndo. 13 Mwaha iyo aatene nibaddiziwe wodhela muzimu mmodhave wihina nikale mwiili mmodhave, podi akala muJudewu, muGerego, mudhaari, ole ali ootapuwa, aatene iyo nakenle muzimu mmodhave.
14 Ebaribari, mwiili kunna yaano emodha, mbwenye dhowinjhiva. 15 Nnyalo nahawoge neegi: “Woona wi kagili nlada, kaginakosa epaddi ya mwiili,” naarive niwogaga ndo kanaahiye okala yaano ya mwiili. 16 Teto nibaru nahawoge neegi: “Woona wi kagili ninto, kaginakosa epaddi ya mwiili,” naarive niwogaga ndo kanaahiye okala yaano ya mwiili. 17 Mwiili waatene wahakale ninto ki mabaru yaakale waani? Mwiili waatene wahakale nibaru ki puna yaakale waani? 18 Mbwenye ebaribariya sowi, Mulugu ohuhela kadda yaano vamburoni vewa mwamakalelo yamudhivela.
19 Dhaatedhene dhahakale yaano emodha, ki mwiili waakale wuuvi? 20 Ebaribariya sowi yaano dhihinjhiva, mbwenye mwiili bummodha baahi. 21 Ninto kannadha nawerela malada: “Kaginuhowelani,” emodhave, musolo kudha wawerela manyalo: “Kaginuhowelani.” 22 Mbwenye yaano dha mwiili dhinoneya ninga kadhinna thima sofuneya, 23 teto dhipaddi dha mwiili nnonihu ninga kadhinna thima sidhendho nnathabwihu osamalela; mowindo dhipaddi dha mwiili wehu nihinafunihu wi athu yoone, nnosamalela pama, 24 mbwenye dhipaddi dhehu dhowoneya pama kannathabwa osamalela. Naarive dhigaali ndo, Mulugu apadduse mwiili nimakalelo yaala, avahaga thima epaddi enahowela osamaleliwa, 25 wi mwiili wahikale wogawanyeya, mbwenye yaano dhikale dhowiwanana ni dhisamalelanege mmodha ni mukwaye. 26 Yaano modha yonaga goyi, yaano dhaatedhene dhinowoona goyi; teto yaano modha yathithimihiwa yaano dhaatedhene dhinohagalala vamodha.
27 Mowindo, nyu muli mwiili wa Kiristu teto kadda muthu wa nyu yaano enakosa epaddi ya mwiili ola. 28 Mulugu ohasakula athu ohiyana-iyana mmulogoni, onvaha kadda muthu mabasaye: oobajha arumiwi, anabiili anamavuhulela, anatharu anamahudhiha, voharela mabasa ootikiniha; gari yovulumusa; wakavihera amodha; onona ohoolela pama ni onona owoga dhiwogelo dhohiyana-iyana. 29 Nerege aatene arumiwi? Aatene anamavuhulela? Nerege aatene anamahudhiha? Aatene enowawerana matikiniho? 30 Nerege aatene ehikanna gari yovulumusa? Aatene enowoga dhiwogelo dhohiyana-iyana? Obe aatene anamatapulela? 31 Mowindala, mudidele osayela gari dhinna thima. Vano miyo ginere wuwonihani dila enlubale.