Karta na Tiyago
5 Vano kavuruwanani nyu aliba oreela! Munle ni mwikubanyedhe mwaha oheruwa onafuna wufwanyani. 2 Dhoreela dheenyu dhihimala ovudda teto dhowara dheenyu dhihimala ojhiwa oweese.* 3 Woru ni parata yenyu ehimala ojhiwa mukwita, teto mukwita wewa onere okala onamoona weenyu ni onere otakuna mwiili weenyu. Dhithu muugenlinyu dhinere okala ninga mootho malabo ookuthula. 4 Kasugwani! Anamalaba ehaddile mundda dheenyu enna wunla mwaha kamwathambilihe,* teto Yehova* Mulugu aanyakoddo ohiwa wunla wewa elobaga nikavihero. 5 Nyu mwahikanna egumi yapama elabo ela yavati ni moofuna wihagalasa. Munaligana ni anenyama enajha eruvaga wula ejheehaga opiwa. 6 Nyu muhumutoriha ni muhumpa muthu owoogowa. Nerege oliye* katakaleliwe ni nyu?
7 Mowindala addibilaga, mukale oovilela ofiyedha Nabwiya odha. Kasugwani makalelo namalima anajhehiye dhego alimiliye mmunddani, oliye onojheha nuuvilela ofiyedha orubwa muzongwe oobajha ni oogomihedha. 8 Ni nyuwa mukale oovilela, mulibe murima, mwaha nlabo na Nabwiya ninna waddamela.
9 Addibila, kamwabanege* mmodha ni mukwaye wihina munatorihiwe. Kasugwani! Namatorihaya ali vamulago. 10 Addibila, wodhela wavilelana makathamiho ni okala oovilela, mwatajhihege anamavuhulela yayo yawoga mwa ndina na Yehova. 11 Kasugwani, nnowona wi ale yavilele yahihagalala.* Nyu muhiwa ovilela wa Jo teto muhawoona mareeliho Yehova anvahiliye; ni muhoona yeekinyu wihina Yehova ohukanna nthebwa ninlubale ni dathagaraga.
12 Okwaranya dhaatedhene ndha addibilaga, muhiye olibelela odhulu, newene elabo yavati teto mwaahiye makalelo aatene oolibela. Mbwenye madhu enyu owi “hee” ekale hee, owi “naari” ekale naari, wihina munaadhe mutorihiwe.
13 Vaari veenyu ohukalavo muthu anoona goyi? Muthu yoyo adidele olobela. Vaari veenyu ohukalavo muthu ali oohagalalene? Muthu yoyo iibege jhibo dhinanvuwiha Mulugu. 14 Vaari veenyu ohukalavo muthu ali muredda? Awithane anamaholela mulogo edhe emulobelele, emudholihaga makura mwandina na Yehova.* 15 Vano nlobelo nneriwana ni nroromelo, nnere onvulumusa muredda oyo, mowindo Yehova aneere omulibiha. Teto akala oliye uherana dhoothega aneere oleveleliwa.*
16 Mowindo, kadda muthu amwaddelege mukwaye dhoothega eriliyena teto mulobelelanege mmodha ni mukwaye wihina nvulumusiwe. Malobelo a muthu owogowa ehikanna kopolo. 17 Eliyaji aali muthu ninga iyo; mbwenye oliye nuulobela ni murima waye wamuteene wihina muzongwe ahirubwe, muzongwe ahimala yaka tharu ni mweri mitanu nammodha ahirubwile. 18 Vano oliye nuulobela dila yanabiili, muzongwe orubwa teto thaya* ovaha dhowiima.
19 Addibilaga, mmodha wa nyu ahiya ohara ebaribari mwaha oholosiwa, mbwenye muthu mmodha anomukavihera ohogolowa, 20 munone wi muthu yoyo anaamwerihe muliba otheega ohogolowa dila yaye yabure, aneere onvulusa muukwani ni aneere okuneela dhoothega dhowinjhiva.