Dhilibiwe ni Marku
12 Nuwindo oliye wambela wawaddela alabihedhaga musibe egihina: “Ahikalawo mulobwana dhaala anna mundda waye wa uva omagela txinga, otiba muliddi womukamulamo vinyu ni omaga nyumba yotaama; nuwindo mundda ole wa uva ohiya mmadani mwa anamalima, omaga olenddo odhowa elabo emodha. 2 Nufiya mudhidhi wohadda omuruma mudhaari aye mmodha wihina agumane ni anamalima ale wihina aakele dhowima dhaye. 3 Mbwenye aliwa omuhidda omuukutha ni omuruma wihina adhowege ahithukunle ethu. 4 Oliye omuruma mudhaari mmodha aliwa omuukutha musolo ni omuruwana. 5 Voharela oliye omuruma mmodha, mbwenye aliwa ompa; waruma amodhaya, mmodha omuukutha mbwenye amodhaya waapa. 6 Oliye ahikanna mwanaye athabwesiye omudhivela. Vogomihedhava omuruma mwanaye egihina: ‘Podi wera mwanaga ola enere omuriha.’ 7 Mbwenye anamalima ale owoga vikaleliwa yegihina: ‘Anahalena munddaya diyola. Kabeni nimpe nihalena dhithu dhaye.’ 8 Nuwindale, aliwa omwihidda, ompa ni onvokedha ode wa mundda ole wa uva. 9 Mwinnya a mundda ole wa uva anawerena ddi? Ahogolowa anere waapa anamalima ale, ni aavahe mundda ole wa uva anamalima amodha. 10 Nyu kamunilerigi dholebela dhinihina: ‘Nibwe ameesili ekoddiliwa thi nibwe nathimana.* 11 Ndho dhinadhela wa Yehova* teto sotikiniha vamentoni vehu’?”
12 Mwaha wa yeyo aliwa ofunaga ninga emmage,* mwaha yahinona wihina awogaga musibe ole awagana aliwene. Woona wihina yowoova muthithi waathu, aliwa omwihiya ni omaruwa odhowaga.
13 Nuwindo, waruma Afarizewu amodha nnikuru namukavihera Erodi wihina yamukone ni madhu aye. 14 Nufiya aliwa omwaddela yegihina: “Namahudhiha, nihinona wi dhithu munawoginyu sebaribari ni kamunasayela wahagalasa athu, newene kamunasugwa ekalelo yewa yoode, mbwenye munahudhiha dila ya Mulugu mowiwanana ni ebaribari. Munoonamo aavi, enowenyeya* omuliva Sezare musoko obe naari? 15 Nilivege obe naari? Nuwoona ogwalagwambi wewa oliye weera: “Munagehela ddi? Kadhanani korowa modha ya denariyu* wihina goone.” 16 Aliwa odhana korowa modha ya denariyu, oliye wakoha egihina: “Kove ela ni madhu ala elebiwe vala bawani?” Aliwa omwakula yegihina: “Ya Sezare.” 17 Vano oliye wawaddela egihina: “Mmulive Sezare ele eli ya Sezare, mbwenye mmulive Mulugu ele eli ya Mulugu.” Aliwa otikina vanlubale ni makalelo awakunliye.
18 Mudhidhi yole Asadusewu yawoga wihina kawili ovenyihiwa muukwani omwaddamela Yesu ni omukoha yegihina: 19 “Namahudhiha, Moyizeji ahileba egihina, muthu akwa ahimuhiyile mwaana ddibileya amutele mamukweleya wihina nihimo nne na ddibile nnakwele. 20 Yahikalawo alobwana 7 yaali oddibila. Oobajha otela, mbwenye okwa ahimuhiyile mwaana. 21 Anabiili omutela maamukweleya mbwenye okwa ahimuhiyile mwaana, ni opadduwa emodhave ni anatharu. 22 Aatene yala atanu nabiili kiyahiyile ahima. Vano omakuthulowa muhiyanaya okwa. 23 Wafiya mudhidhi wovenyihiwa anookwa, aatene yala 7 mamuneya anakale aani? Mwaha aatene yahimutela.” 24 Yesu wawakula egihina: “Nyu munowileketha, mwaha kamunonne Dholebela, newene kamunonne kopolo dha Mulugu? 25 Mwaha anookwa yavenyihiwa alobwana kinaatelege newene ahiyana kinaateliwege, mbwenye enakalege ninga angero oodhulu. 26 Wodhela ovenyihiwa waanookwa, nyu kamunilerigi livuru na Moyizeji, Mulugu awongiye nuliye vanikupuni egihina: ‘Miyo gili Mulugu aAbaraawu, Mulugu a Izaki ni Mulugu a Jako’? 27 Oliye kahiyo Mulugu aanokwa mbwenye aathu ookalawo. Nyu munowileketha vanlubale.”
28 Vano namaleba mmodha aaddamele vevale ni iwalege okangana wule, nuwoona wihina Yesu ahawakula pama, omukoha egihina: “Muwari mwa malamulo aamatene noobajhana* thivi?” 29 Yesu omwakula egihina: “Noobajhana thinna: ‘Nvuruwane amwaana Izarayeli: Yehova,* Mulugu ehu, ali mmodha baahi, Yehova. 30 Omudhivele Yehova* Mulugu awo ni murima wawo waatene, ni emuthu yawo* yaatene ni mubuwelo wawo waatene ni kopolo dhawo dhaatedhene.’ 31 Nanabili thinna: ‘Omudhivelege mwanddamani awo ninga onidhiveliwe.’ Kaniwo nlamulo ninlubale nnakwaranya yala.” 32 Namaleba ole owoga egihina: “Namahudhiha, muhakula pama ni muhuwoga ebaribari: ‘Oliye di mmodha baahi ni kaawo mmodha omukwaranya oliye,’ 33 bumwahaya omudhivela ni murima waatene, ni enonelo yaatene ni kopolo dhaatedhene, ni omudhivela mwanddamani awo ninga onidhiveliwe, winokwaranya dhovelela dhoopaha ni mukuthodha.” 34 Vano, Yesu nuwonelamo wihina mulobwana ole ahimwakula ni thotho oliye omwaddela egihina: “We kulapenle Omwene wa Mulugu.” Mbwenye kaavo muthu mmodha ahogolowele omukoha.
35 Yesu nuuhogolowela ohudhiha mutempulu, oliye wakoha egihina: “Mwahaya bwaddi anamaleba egawoga yegi Kiristu mwaana a Davidi? 36 Mwinnyene Davidi wodhela oveetheliwa ni muzimu wotxena ohuwoga egihina: ‘Yehova* owoga nnabwiya aaga egihina: “Okarati moono waaga woojha ofiyedha miyo wapweha amwiddani awo vati va manyalo awo.’” 37 Akala mwinnyene Davidi anamwithana Nabwiya, dhinandeya addi oliye okala mwanaye?”
Muthithi waatene walivo wonvuruwana pamadhene. 38 Oliye ahudhiha egihina: “Pole-pole ni anamaleba, enadhiveliwa wawara malaya oolapa ni enadhiveliwa olojheliwa yakala vamerkadu, 39 ni enadhiveliwa okarati mburo dhobajha* dha musinagoga ni mburo dhathima yakala vamathangani. 40 Aliwa enowaherula* amamukwele, teto othabwawa enowawerana malobelo oolapa. Aliwa enere otorihiwa mwamakalelo oopiha mbani.”
41 Oliye okarati waddamela kaxa* mwavokedhiwa dhovelela ni wambela osugwa muthithi waathu wavokedha korowa mukaxani mune, teto athu ooreela yovokedhamo korowa dhowinjhiva. 42 Ofiya maamukwele dhaala oohawa opwehamo korowa* biili* dhahanna muthengo munlubale. 43 Yesu wawithana anamahara aye ni wawaddela egihina: “Ginowuwaddelani ebaribari: Maamukwele ola oohawa divokedhilemo korowa dhowinjhiva mukofirini wakwaranya athu aatene. 44 Mwaha aatene evokedhilemo ndhe yahanliwana, mbwenye maamukwele ole nuhaawa waaye avokedhilemo dhithu dhatedhene anniyena wihina akalewo.”