Ovuhulela wa Juwawu
9 Mungero anetanu wooba palaza yaye. Miyo woona thendderi yaakumile odhulu omorela elabo yavati, ovahiwa xavi ya muliddi wooddiha.* 2 Thendderi ele ofugula muliddi ole wooddiha nuwindo okumamo mwiisi munlubale wakala ninga onakuma muthukuthani ya mootho; nduwa vamodha ni odhulu okala wooriba mwaha wa mwiisi wakuma mmuliddini mune. 3 Vaari va mwiisi ole okumavo kwaakwa dhowinjhiva omwadheyela elabo yaatene yavati ni ovahiwa owedha teto owedha wimodhave winna awalize* eelabo yeela yavati. 4 Waddeliwa wihina dhihinonge mpidda wa elabo yavati newene makupu obe muthanko, mbwenye yanonge athu ehinna yintelelo ya Mulugu vakoveni.
5 Kwaakwa ndho kadhenyiwe wihina dhaape athu ayo, mbwenye dhawonihe goyi muwari mwa mweri mitanu, teto goyiya simodhave muthu anooniye alumiwa walize. 6 Malabo yayo athu enerege osayela okwa mbwenye newene kinadha efwanya, enerege wunlela okwa, mbwenye okwa winerege wathawa.
7 Ekalelo ya kwaakwa ndha yaligana ni akavalo yegeredhiwe wihina yawaniwena koddo. Mmurunimwa yahiwara dhithu dhaligana ni kara dha woru, teto koviwaya yaligana ni kove ya muthu, 8 mbwenye yahikanna mathithi yakala ninga mathithi aahiyana. Menoya yakala ninga aapoddogoma, 9 ni yahikanna dhowibarelana dha vathimarimani dhaligana ni dhowibarelana dha vathimarimani dha mujhila. Marumelo a mampelo ewa yakala ninga oruma wa karo dhinawetiwa ni akavalo enathamagela okoddoni. 10 Ohiya eyo, mwiiladhiwadha dhihikanna muropi ni dhinoluma ninga awalize, teto owedha yavahiwiwa wowawerela obure athu muwari mwa mweri mitanu waali omwilani. 11 Ehikanna mwene ewa, mungero a muliddi wooddiha. Ni Ebarayiku anithaniwa Abadoni,* mbwenye ni Egerego anithaniwa Apoliyoni.*
12 Okubanyedhiwa woobajha wihivira. Pasope! Okubanyedhiwa wula wavira, dhinere odhawo dhokubanyiha biili.
13 Mungero anetanu nammodha wooba palaza yaye. Miyo wiwa ndhu nakuma vaari va manyaga aaltare ole a woru aali vamentoni va Mulugu 14 nimwaddelaga mungero ole anetanu nammodha anna palaza yaye negihina: “Watapule angero annayene emageleliwe mwihinjhe munlubale Ewufarati.” 15 Vano angero yegeredheliwe mudhidhi oyo, labo, mweeri ni yaka eyo, otapuliwa wihina yaape athu a epaddi yanatharu.
16 Miyo gahiwa nummeroniwana; numero na anyakoddo ayo yaweeddiha akavalo, nowakwana 200 milyonji. 17 Makalelo yaali akavalo ayo ni aleya yaagwenle baala: dhowibarelana dha vathimarimani yawanriwa dhaali dhofiila ninga mootho, dhakurambwe ninga mabwe enithaniwa jasintu, dhanjhani ninga enxofere; ohiya eyo, akavaloya murudhiwadha dhakala ninga muru dhaapoddogoma teto muwanomwa mookuma mootho, mwiisi ni enxofere. 18 Epaddi yanatharu yaathu opiwa ni mulili ndha: mootho, mwiisi ni enxofere yakuma muwano mwewa. 19 Mwaha kopolo dhivahiwe akavalo ayo dhili omulomoni ni omwilani, eneriha sowihina mwiila dhewa dhinakala ninga nowa teto dhihikanna muru ni enolabihedha mwiila dhewa wihina yaporosena athu.
20 Mbwenye athu amodha yaali yahinapiwe ni mulili ndha, kithwaruwile ni mabasa yapanriwa ni mada ewa; kiselele wawebedha ademoniyu, dhikwamuthu dha woru, kobere, parata, mabwe ni dha tabwa dhihinoona, dhihiniwa newene dhihinanda weedda. 21 Aliwa kithwaruwile waapa athu, newene webedha dhithu dhamasenga, oraruwa,* newene ombava wewa.