Dhilebiwe ni Lukaji
20 Malabo yaale, Yesu aahudhihaga athu mutempulu ni alaleyaga muthenga dhapama, anddimuwa aanamakutha, anamaleba ni anamaholela odha 2 aliwa omukoha yegihina: “Kanaddele, oneerana dhithu ndha ni kopolo dhawani? Ki uvahile owedha baani?” 3 Yesu wawakula egihina: “Ni miyowa ginere wukohani ethu emodha ni nyuwa mugakule: 4 Obaddiziwa wa Juwawu waadhele odhulu obe waathu?” 5 Mbwenye aliwa wambela onong’ona vikaleliwa yegihina: “Nera: ‘Wodhulu’ oliye anere onikoha: ‘Kito muhunamurumedhela ddi oliye?’ 6 Mbwenye neera: ‘Onakuma waathu’, muthithi ola waathu oli vevala ononipwesa ni mabwe mwaha enamoona Juwawu ninga namavuhulela.” 7 Nuwindo, aliwa omwakula yegi kiyanonne wadheliwa. 8 Vano Yesu wawakula egihina: “Ni miyoya kaginuwaddelani muthu anagivaha owedha wowerana dhithu ndha.”
9 Nuwindo oliye wambela wawaddela nladdaniho athu ale yaali vevale egihina: “Ahikalawo mulobwana dhaala aalile munddaye wa uva, vano mundda ole ohiya mmadani mwa anamalima, omaga olenddo odhowa elabo emodha omalawo malabo owinjhivene. 10 Nufiya mudhidhi wohadda omuruma mudharaaye wihina agumane ni anamalima ale wi envahe dhowima vang’ono. Nuwindo, anamalima ale omwihidda mudhaari ole omuukutha ni omuruma wihina adhowege ahithukunle ethu. 11 Mbwenye oliye omuruma mudhaari mmodha. Nuulaya aliwa omuukutha, omutota manyazo,* omuruma odhowaga yahinvahile ethu. 12 Oliye omuruma mudhaari anatharu; nuulaya aliwa omporosa ni omwigara. 13 Mwaha wa yeyo, muliba mundda ole wa uva owoga egihina: ‘Ki vano geere ddi? Ginere omuruma mwanaga ginamudhivelimi. Podi wera mwanaga ola enere omuriha.’ 14 Numoona mwaana ole, anamalima ale owoga vikaleliwa yegihina: ‘Anahalena munddaya diyola. Kabeni nimpe, nihalena dhithu dhaye.’ 15 Nuwindale aliwa omuhidda, onvokedha ode wa mundda ole wa uva, ompela wengo. Vano mwinnya a mundda ole wa uva, anaawerena ddi anamalima ale? 16 Ahogolowa anere wapa anamalima ale ni aavahe mundda ole wa uva athu amodha.”
Nuwawiwa madhu yala aliwa owoga yegihina: “Eyo newene kinaapadduwe!” 17 Mbwenye Yesu wasugwa pamadhene ni owoga egihina: “Madhu ala elebiwe vala enatapulela ddi: ‘Nibwe ameesili ekoddiliwa thi nibwe nathimana’?* 18 Muthu yole anamothele vanibweni vevala anere onyenyiwa. Teto yoyo anamotheliwe nibwe nna anere otatakanyeya.”
19 Vano anamaleba ni anddimuwa aanamakutha osayelaga makalelo wihina emwihidde mudhidhi yoole mwaha yahinona wihina musibe ole awogile awubuwelaga aliwene. Mbwenye yowawova athu yalivo. 20 Vano nuwona dhithu eeriyena aliwa waruma athu yagunliwa moviteya wihina ekalege ninga athu owogowa,* wihina emukone ni madhu aye, yindo yampeleke waanamathonga ni mmadani mwanddimuwa a musadoro. 21 Vano aliwa omukoha yegihina: “Namahudhiha, nihinona wi dhithu munawoginyu ni munahudhihinyu sebaribari, ni kamunasayela wahagalasa athu, mbwenye munahudhiha dila ya Mulugu mowiwanana ni ebaribari: 22 Munoonamo aavi enowenyeya omuliva Sezare musoko obe naari?” 23 Mbwenye Yesu nunona obure wewa, wawaddela egihina: 24 “Kagoniheni korowa modha ya denariyu.* Oliye wakoha egihina: Kove ela ni madhu ala elebiwe vala bawani?” Aliwa omwakula yegihina: “Ya Sezare.” 25 Oliye wawaddela egihina: “Akala siyeyo, mmulive Sezare ele eli ya Sezare, mbwenye mmulive Mulugu ele eli ya Mulugu.” 26 Nimakalelo yaala awakunliye aliwa kiyandile omukona vaari vaathu yaale mbwenye aliwa otikina ni yowakula yaye ni kuukanna yowoga.
27 Mudhidhi yoole yahikalawo asadusewu amodha yawoga wihina kawili ovenyihiwa muukwani, omwaddamela Yesu ni omukoha yegihina: 28 “Namahudhiha, Moyizeji ahileba egihina: ‘Muthu akwa ahimwihiyile mwaana ddibileya amutele mamukweleya wihina nihimo nne na ddibile nnakwele.’ 29 Epadduwe sowihina, yahikalawo addibila 7. Oobajha otela, mbwenye okwa ahimwihiyile mwaana 30 opadduwa emodhave ni anabiili 31 ni anathaaruya omutela muhiyana yola. Wereya emodhave ni aatene yaala 7; aliwa okwa ehahiyile ahima. 32 Vano omakuthulowa muhiyanaya okwa. 33 Mowindala, wafiya mudhidhi wovenyihiwa anookwa, aatene yaala 7 mamuneya anakale aani? Mwaha aatene yahimutela.”
34 Yesu wawaddela egihina: “Ahima oomakuthulo wa dhithu dhaatedhene* enootela ni enooteliwa, 35 mbwenye athu enna oneeti wowakela egumi malabo yayo oosogolo obe ale enaavenyihiwe muukwani, kinaatelege newene kinaateliwege. 36 Ebaribariya sowi aliwa kinadha ekwaga mwaha eli ninga angero ni ahima a Mulugu, mwaha wokala ahima oovenyihiwa muukwani. 37 Mbwenye anookwa eneere ovenyihiwa muukwani mwaha Moyizeji ohuwoga agaali vanikupuni numwithana Yehova* egi, ‘Mulugu Aabaraawu, Mulugu a Izaki, Mulugu a Jako.’ 38 Oliye kahiyo Mulugu aanookwa mbwenye aathu ookalawo, mwaha vamentoni vaye athu aatene ekwile ehikalawo.” 39 Anamaleba amodha omwakula yegihina: “Namahudhiha nyu muhuwoga pama.” 40 Mwaha wa yeyo aliwa kiyandile omukoha newene ethu emodha.
41 Nuwindo oliye wakoha egihina: “Mwahaya bwaddi mugawoga wi Kiristu mwaana a Davidi? 42 Mwaha mwinnyene Davidi ohuwoga mu livuru na Salmo egihina: ‘Yehova* owoga nNabwiya aaga egihina: “Okarati moono waaga woojha, 43 ofiyedha miyo wapweha amwiddani awo vati va manyalo awo.’” 44 Kito akala Davidi anamwithana Nabwiya, dhinandeya addi oliye okala mwanaye?”
45 Wula muthithi watene onvuruwanaga oliye wawaddela anamahara aye egihina: 46 “Pole-pole ni anamaleba, enadhiveliwa wawara malaya oolapa ni enadhiveliwa olojheliwa yakala vamerkado* ni enadhiveliwa okarati mburo dhobajha* dha musinagoga ni mburo dhathima yakala vamathangani, 47 aliwa enowaherula amaamukwele, teto othabwawa enowawerana malobelo oolapa. Aliwa enere otorihiwa mwa makalelo oopiha mbani.”