Karta Nanabili na Peduru
1 Miyo Simawu Peduru, mudhaari ni murumiwi a Yesu Kiristu, ginulebelani nyu munna nroromelo nathima ninga nehu, wodhela wogowa wa Mulugu ehu ni Nvulusi ehu Yesu Kiristu wihina:
2 Mwenjhedhedhiwe opama wohinifwanelela ni murenddele wodhela enonelo yeebaribari ya Mulugu ni Yesu Nabwiya ehu, 3 alabihedhaga kopolo dhaye, Mulugu ohunivaha dhithu dhaatedhene wihina nikanne egumi ni omulabela Mulugu wodhela enonelo yeebaribari ya Ole anithanile wodhela nthithimiho ni opama waye. 4 Wodhela dhithu dhendho, oliye ohunivaha mpaganyo dhathima ni dhinlubale, wihina wodhela mpaganyo ndha nihiyoya nikanne nthithimiho nimodhave Mulugu anniyena, mwaha iyo othawa dhithu dhabure dhamwilaboni dhendho dhinakumelela mwaha wa munigwa wabure.
5 Bumwahaya, mwerena dhaatedhene munandinyu wihina vadhulu va nroromelo nenyu mwenjhedhedhevo dhikalelo dhapama; vano dhikalelo dhapama ndho mwenjhedhedhevo, enonelo; 6 enonelo eyo, onona wihiha; onona wihiha ngo, ovilela; teto ovilela ngo, omulabela Mulugu; 7 omulabela Mulugu, wadhivela addibila; wadhivela addibila ngo, mwenjhedhedhevo wadhivela athu aatene. 8 Mwakanna dhikalelo dhendha dhaatedhene ni mwahiya wihina dhunnuwe, dhinere wukaviherani wihina mwahiridhe obe ovaha dhowima mwa dhithu dhaatedhene munerinyuna mowiwanana ni enonelo yeebaribari ya Nabwiya Yesu Kiristu.
9 Mwaha muthu yoole ahinna dhikalelo ndha, muliba ohoona ni onowafuga mento wihina ahoonege waara, teto ohudduwala wihina dhoothega dhaye dhakale dhihimala otxenihiwa. 10 Mwaha wa yeyo addibila, mukale ooviheya ni mparele pamadhene withaniwa ni yosakula yenyu, mwadidela werana dhithu ndha, kamunayelele newene vang’ono. 11 Ni makalelo yaala, munere ofuguleliwa dila wihina mwakele nthithimiho Mumweneni wa mukalakala wa Nabwiya ni Nvulusi ehu Yesu Kiristu.
12 Bumwahaya nguwubusedhani dhithu ndha mudhidhi waatene, naarive muganonne ni mugaali txithi mwibaribarini. 13 Mbwenye, naarive ngaali muddammwani muna,* ginowoona wi sapama wuvenyihani wodhela wuwubusedhani, 14 ginawoga ndo, mwaha gihinona wihina egumaaga* kinaalegele ninga Nabwiya ehu Yesu Kiristu agaddeliye. 15 Malabo maatene gineerege wilibihedha wihina miyo gadhowa, muhale mubuwelaga yekinyu dhithu ndha.
16 Wihina nande wuwaddelani odha wa Nabwiya ehu Yesu Kiristu ni kopolo dhaye, kaniharile thalako dhowoota dhikumelele ni malango mbwenye iyo nihifiyedha owoga wodhela nthithimiho naye mwaha naali anamoona ni nihoona ni mento ehu. 17 Mwaha Mulugu, Baabi ohunvuwiha ni ohumuthithimiha mudhidhi aawogaga madhu ala owihina: “Ola di Mwanaga ginamudhivelimi ni ginamurumedhimi.” 18 Mwebaribarene, iyo nihawiiwa madhu ala yakuma odhulu mudhidhi nigaali vamodha nuliye mwango woweela.
19 Bumwahaya kannanganyedha wihina madhu aanamavuhulela enere wakwanela, teto nyu munoweriha pama wapwasedha wavuruwana madhu ayo, eli ninga lampada nnamoneya vayiihini, (ofiyedha vati osa ni nikorotxa okuma), mmurimani mweenyu. 20 Ohiya eyo, nyu muhunona pamadhene wihina kawo yovuhulela enawoga Dholebela enadhela mmubuweloni mwa muthu. 21 Mwaha kawo yovuhulela ekumile ni efunelo ya muthu, mbwenye athu ayo yawoga mubuwelo wadhela wa Mulugu, esogoleliwaga ni muzimu wotxena.