Aamulebeliye Timotiyu
3 Madhu ala beebaribari: akala muthu onowilibihedha wihina akale namaholela, anowasayela mabasa apama. 2 Mowindo, namaholelaya kakale muthu anawogiwana obure, akanne muhiyana mmodha baahi, anone opimelela dhithu dhinamudhivela, akanne mubuwelo wapama, egeredhege dhithudha mwa makalelo apama, anone wawakela aleddo ni anone ohudhiha. 3 Kakale mulezeli newene oowali, mbwenye akale ookweya ni ahinakangana ni muthu. Kathabwege odhiveliwa korowa. 4 Anone weddiha pamadhene murala waye teto anaayeya emwiwelelege ni murima waamutene. 5 (Mwaha akala mulobwana kananda weddiha pamadhene murala waye, anaande aavi weddiha mulogo wa Mulugu?) 6 Kakale muthu abaddiziwe ovanene,* wihina ahithabwege withukula teto atorihiwe ni makalelo mamodhave atorihiwe Ddiyabo. 7 Ohiya eyo, awogiwege pama ni athu oode, wihina anaatotiwe manyazo indo amorele mmurakoni mwa Ddiyabo.
8 Emodhave, adhaari ookavihera ekale oororomeleya, kiyootege, kithabwege omung’wa vinyu newene kiyaparege mabasa ejheehaga oliviwa. 9 Epareele pamadhene dhoviteya dhootaleleya ni nroromelo vamodha ni mubuwelo wapama.
10 Teto erajhihe openddiwa wihina yooniwe akala enofwanelela waakela mutholo oyo, yamala podi olabihedhiwaga ninga adhaari ookavihera.
11 Emodhave, ahiyana ekale oororomeleya, kikale owaaba, enone opimelela dhithu dhinaadhivela ni ekale oororomeleya mwa dhaatedhene.
12 Mudhaari ookavihera akanne muhiyana mmodha baahi, aholelege pamadhene murala waye vamodha ni anaayeya. 13 Mwaha alobwana enaapara pama mabasa a Mulugu enowogiwa pama teto aliwa podi owoga nuhanganyedha nroromelo enniwana ni Kiristu Yesu.
14 Naarive miyo gijhehaga ogumana ni we mohilegela, ginowulebela dhithu ndha 15 wihina, akala ginere olegela odha, weeddege mwamakalelo ooleleya ni emudhi ya Mulugu, oli mulogo wa Mulugu ookalawo, ntxikwa ni obareleya webaribari. 16 Mwebaribarene, kannanganyedha wihina yoviteya yotaleleya yomuthithimihana Mulugu si yinlubale: ‘Oliye ohoneyihiwa epaddi yomwiilini, ohooniwa okala owoogowa epaddi yomuzimuni, ohooniwa ni angero, ohulaleyiwa wa athu a malogo, ohurumedhiwa mwilaboni ni ohakeliwa odhulu ni nthithimiho.’