Dhilebiwe ni Lukaji
17 Nuwindo oliye wawaddela anamahara aye egihina: “Kinenyeya ohukalawo mabwe ookwakwathusa. Mbwenye ginomukubanyedha muthu yoole anakwakwathuse athu amodha! 2 Yeere owomela muthu yoyo ahamageleliwe mukohi nibwe ninlubale indo avokedhiwa muniya, ohiya oliye omutheegiha mmodha waathu yaala ang’ono. 3 Pole-pole mwisugwerege. Akala ddibilo ohuthegela omusumulule, oliye athwaruwa omulevelele. 4 Naarive valabo uthegele dila tanu nabiili ni anohogolowa dila tanu nabiili egihina: ‘Miyo gihithwaruwa,’ omulevelele.”
5 Nuwindo arumiwi owoga nNabwiya yegihina: “Nenjhedhedheni nroromelo.” 6 Vano Nabwiya owoga egihina: Nyu mwahakanne nroromelo noyevela ninga thanga ya mostarda, mweere owoga ni muthanko ola wa amorela ooriba mwegihina: ‘Kadduleya* vala viliiwe wiwaale muniya!’ Ndo oliye eere wuwiwelelani.
7 “Baani wa nyu anamuhiya mudharaaye omundda alimaga obe aasamalelaga mambila aye, teto mudhaari ole ahogolowa Nabwiye awoga egihina: ‘Kaguvela vameza vala ojhe ethu-siithu’? 8 Ohiya werana ndo kanawoga egihina: ‘Kawara guwo dhimodha ogipiyele jantaaraga wammala ogigawele wihina gimujhe ni ging’we windo ni weya podi ojha ni ong’wa’? 9 Nerege aneere omutamalela mudharaaye mwaha werana ethu amurummiye wihina erena? 10 Nimakalelo mamodhave, mwamala werana dhithu dhaatedhene murumiwinyu muwoge mwegihina: ‘Nili adhaari ohufwanelela. Nenrena yeele yahoweleya wihina nerena.’”
11 Adhowaga oJeruzale oliye ovira oSamariya ni oGalileya. 12 Nufiya murudda dhaala, alobwana kumi yanna maranya odhowa ogumana nuliye, mbwenye aliwa wimela wolapelawene. 13 Vano aliwa omwithana ni ndhu nootama yegihina: “Yesu, Namahudhiha kaneddeleni thagaraga!” 14 Oliye nuwawoona wawaddela egihina: “Mudhowe mwagumane naanamakutha.” Emaruwagawene, ehinasuse aliwa ovulumuwa. 15 Mmodha nuwoona wihina ahivulumuwa, ohogolowa amuthithimihaga Mulugu ni ndhu nootama. 16 Mulobwana ole okokora vamentoni va Yesu amutamalelaga. Oliye aali musamaritano. 17 Yesu omwakula egihina: “Aliba maranya aatene ehivulumusiwa kahiyo? Kito atanu nennayi baavi? 18 Newene kaavo mmodha ahogolonwe wihina amuthithimihe Mulugu, ahili mulobwana ola a nlogo nimodha?” 19 Mowindo oliye omwaddela egihina: “Kavenya odhowege. Nroromelo nawo nihuvulumusa.”
20 Afarizewu omukoha yegihina: “Omwene wa Mulugu onadha alini?” Oliye wawakula egihina: “Omwene wa Mulugu kundha mwamakalelo owoneya, 21 newene athu kinawogege yegihina: ‘Kasugwani, ola oli vala!’ Obe: ‘Oli wule!’ Mbwenye munone wihina Omwene wa Mulugu oli vaari veenyu.”
22 Oliye wawaddela egihina: “Onere ofiya mudhidhi munafuneginyu woona labo na Mwaana Muthu, mbwenye kamunoone. 23 Mbwenye athu enerege owoga yegihina: ‘Kasugwani, ole ali wule!’ obe: ‘Ola ali vala!’ Kamuthamagelewo newene kamwahare. 24 Mowindala ninga dari eni yajerima odhulu yoneyaga dhipaddi dhaatedhene, labo na Mwaana Muthu nnakale ndo. 25 Voobajha oliye aneere woonihiwa goyi vanlubale teto nlogo nna nnere omukoodda. 26 Mowindala, ninga dhereya malabo a Nowe, malabo a Mwaana Muthu enakale ndala: 27 Athu yoojha, yong’wa, alobwana yootela ahiyana yooteliwa, ofiyedha labo Nowe ovolowa mmwanddeyani, vano mutokora odha ni watolosa aatene. 28 Nimakalelo mamodhave, ninga dhereya malabo a Loti: Athu yoojha, yoong’wa, yoogula, yooguliha yowala ni yomaga nyumba dhewa. 29 Vano labo Loti nuukuma oSodoma omora mootho odhulu ni enxofere watolosa aatene. 30 Enereye emodhave labo nenno Mwaana Muthu anafuniye woneyihiwa.
31 “Malabo yayo, muthu anaakale vadhulu va nyumba dhoobo dhaye dhigaali mba ahikite wihina athukulemo, nimakalelo mamodhave anaakale omundda ahihogolowele dhithu ahiyiliye mundduli. 32 Mmubuwele mwaadha Loti. 33 Ole anafuna ovulusa egumaye* aneere oyelela, mbwenye ole anaayelele egumaye, aneere ofwanya. 34 Miyo ginowuwaddelani gegihina: Emahiyu yeyo athu abiili enakale vakamani, mmodha aneere othukuliwa mmodha aneere ohiyiwa. 35 Ahiyana abiili enere ofwanyiwa vansiloni esilaga; mmodha aneere othukuliwa mmodha aneere ohiyiwa.” 36* —— 37 Mwaha wa yeyo aliwa omukoha yegihina: “Waani Nabwiya?” Oliye wawakula egihina: “Venvo vinaakale muruthu, fivenvo vinaatugumane apangwe.”