Dhilebiwe ni Lukaji
9 Nuwindo, Yesu wawithana anamahara aye kumi nabiili wavaha kopolo ni owedha wowawigarana ademoniyu, ni dhovulumusana dhiredda. 2 Ni waruma wihina yalaleye Omwene wa Mulugu ni wavulumusa athu, 3 ni wawaddela egihina: “Kamuthukule ethu mulenddoni mweenyu, newene mukogodho, newene thumba na dhoojha, newene pawu, newene korowa,* newene malaya oode.* 4 Mbwenye nyumba si nyumba munaafiyinyu, mukarati venvo ofiyedha omaruwa. 5 Mburo bu mburo muhunakeliwinyu, mwakumaga sidadi yeyo mutate nthubi na manyalo eenyu wihina okale onamoona weewa.” 6 Numaruwa vevale, aliwa wambela walaleya athu muthenga dhapama, eviraga murudda ni murudda ni yavulumusaga aredda yaafwanyiwa dhipaddi dhaatedhene.
7 Vano Erodi* musadoro amurudda yoole, nuwiwa dhiwogiwaga dhithu dhaatedhene dhapadduwa oliye osimwela vanlubale, mwaha athu amodha yawoga yegihina Juwawu ohuvenyihiwa muukwani, 8 mbwenye amodha yawoga yegihina oyo di Eliyaji adhiile, wula amodha yawoga yegihina oyo namavuhulela mmodha akale avenyihiwe muukwani. 9 Erodi owoga egihina: “Juwawu miyo gihimugwadda musolo. Ki oyo giniwimi awogiwaga baani?” Mwaha wa yeyo omusayela wihina amoone.
10 Arumiwi ale nuhogolowa, omwaddela Yesu dhithu dhaatedhene yeriliwana. Vano aliwa omaruwa, odhowa mburo womaleya, wa epaddi ya sidadi yithaniwa Betizayida. 11 Mbwenye muthithi ole waathu nunona omuharaga. Oliye wawakela pamadhene ni wambela wawaddela wodhela Omwene wa Mulugu, ni aavulumusaga ale yahowela ovulumusiwa. 12 Mbwenye vati viribaga, anamahara aye kumi nabiili omwaddamela ni owoga yegihina: “Muwoge ni mwaaddele muthithi ola waathu wihina edhowe othemba ni murudda dhimodha dhowaddamela, wihina esayele mburo voogona ni ethu yoojha mwaha mburo yola nilihu kunakaliwa.” 13 Mbwenye Yesu wawaddela egihina: “Nyuwene mwavahe yoojha.” Aliwa omwakula yegihina: “Kaninna ethu, ninna pawu tanu ni oba biili baahi, obe iyo podi ndhowe nagule dhoojha dhowakwana athu aatene.” 14 Mwebaribarene yahikalavo alobwana owakwana 5000. Mbwenye Yesu wawaddela anamahara aye egihina: “Mwawaddele wihina kadda nikuru ekaratigivo athu 50.” 15 Aliwa werana yeyo vano waruma athu aatene okarati. 16 Nuwindo, othukula pawu ndhe tanu ni oba biili, osugwa odhulu ni olobela. Numala, ogwaddanya wavahedha anamahara aye wihina anamahara aye egawele muthithi watene waathu. 17 Vano, muthithi waatene ojha ni orubala; nuddoddela pawu dhahanle odhaala muddanga 12.
18 Mudhidhi mmodhene agaalivo yeka alobelaga, anamahara aye omwaddamela, vano oliye wakoha egihina: “Muthithi waathu onubuwela wihina miyo gili aani?” 19 Aliwa omwakula yegihina: “Juwawu Namabaddiza; athu amodha eni muli Eliyaji; teto amodha enihina muli namavuhulela mmodha akale avenyihiwe muukwani.” 20 Nuwindo, oliye wakoha egihina: “Ki nyu munihina miyo gili aani?” Peduru wakula egihina: “Nyu muli Kiristu a Mulugu.” 21 Mudhidhi mmodhaya ethapanyaga, Yesu wakongomedha anamahara aye wihina ehimwaddele muthu mmodhaya, 22 oliye owoga egihina: “Mwaana Muthu aneere wonihiwa goyi enlubale, akooddiwe ni anamaholela, anddimuwa aanamakutha ni anamaleba, eera ndo apiwe vano labo nanatharu avenyihiwe muukwani.”
23 Nuwindo, Yesu wawaddela anamahara aye egihina: “Ole anafuna okala namahara aaga iikodde ni athukule ntxikwa naye na goyi,* ni agiharege malabo aamatene. 24 Mwaha ole anafuna ovulusa egumaye* aneere oyelela mbwenye ole anayelele egumaye mwaha wa miyo aneere ovulusa. 25 Mwebaribarene muthu anapuravo ddi ayelela egumaye mwaha ojhavo elabo, atolosiwa obe ayelela egumaye? 26 Mwaha muthu yoole anaagikalele manyazo vamodha ni madhu aaga, Mwaana Muthu aneere omukalela manyazo aadhaaga munthithimihoni naye, na Ababe ni angero oweela. 27 Mbwenye miyo ginowuwaddelani ebaribari: Ehikalawo amodha eli vevala ehinalawihe okwa ehinabihe woona Omwene wa Mulugu.”
28 Nuuvira malabo matanu namararu agawonge madhu ala oliye omuthukula Peduru, Juwawu ni Tiyago, waadhowana omwangoni wihina alobele. 29 Wula alobelaga kove yaye osadduwa, dhowara dhaye okala dhotxena ni wambela ojerimela. 30 Nuwindo, okumelela alobwana abiili; Moyizeji ni Eliyaji, wambela othapanya nuliye. 31 Alobwana ale yadhile ni nthithimiho wambela owoga wodhela omaruwa ni dhithu aakwanihedhiye oJeruzale. 32 Peduru naale yaali vamodha nuliye yahimala ogonjhihiwa ni kove, mbwenye nurulumuwa woona nthithimiho na Yesu ni nthithimiho naalobwana abiili egimenle nuliye. 33 Alobwana ale emaruwaga mburo vaaliye, Peduru owoga ni Yesu egihina: “Namahudhiha, yeere owomela nahakalege vevala. Nnere wamaga addammwa araru mmodha eenyu, mmodha a Moyizeji, mmodha a Eliyaji.” Mbwenye oliye konelamo ethu awogiye. 34 Awogagave odha murabo, wakunela. Vano murabo ole nuwakunela, aliwa wambela woova. 35 Nuwindo, okuma ndhu mmuraboni nawoga negihina: “Ola di Mwanaga gimusakunlimi. Munvuruwanege.” 36 Mudhidhi yoole egiwale ndhu nna, Yesu okalavo yekaye. Mbwenye aliwa omaala, malabo yaale, kiyamwaddenle muthu newene ethu modha yoniliwa.
37 Labo noharela aliwa nuukita omwangoni, muthithi munlubale waathu odhowa ogumana ni oliye. 38 Vano mulobwana mmodha aali vaari va muthithi yoole okuwa ni ndhu nootaama egihina: “Namahudhiha, ginowulobani kamusugweni mwanaga, ginna mmodha yola baahi. 39 Onodha muzimu wabure omuhidda, ndo okuwa vanlubale, vano muzimu oyo wabure onvokedha vati, oliye wambela okuma nipweru owanoni; wamala omooniha goyi muzimu ola onomuhiya, mbwenye ogamanle omporosa. 40 Gihaloba anamahara enyu wihina yigare muzimu ola wabure mbwenye aliwa kiyandile.” 41 Yesu wakula egihina: “Nyu nlogo nohukanna nroromelo ni nabure, ginaakale ni nyu ofiyedha alini, ginuvilelenani ofiyedha alini? Kamudhena vala mwanawoya.” 42 Vano muzombwe ole amwaddamelaga Yesu muzimu ole wabure ommothihedha vati ni otalatala vanlubale. Mbwenye Yesu osumulula muzimu ole wabure ni onvulumusa muzombwe ole, nuwindo wavahedha ababe. 43 Mwaha wa yeyo athu aatene otikina ni kopolo dhinlubale dha Mulugu.
Wula athu aatene etikinaga dhithu dhaatedhene eeriyena oliye owoga ni anamahara aye egihina: 44 “Mwaavuruwane pamadhene madhu ala ni munaaddiwale: Mwaana Muthu aneere opelekiwa mmadani mwaathu.” 45 Mbwenye aliwa kiyonelemo ethu awogiliye. Mwaha eyo yaali ethu yoviteya vamentoni vewa wihina yahonelemo, ni yowoova omukoha wodhela madhu aawogiliye.
46 Nuwindo, aliwa wambela okangana vikaleliwa wihina emunone baani munlubaleya. 47 Yesu nunona ethu yubuweliwa mmurimani mwewa, oliye omuthukula mwaana ompweha nikukuru 48 ni owoga egihina: “Anamwakela mmodha wa anamwani yaala ni ndina naaga, anogakela nimiyoya, teto ole anagakela, anomwakela Nuleya agirumile. Mwaha ole ali ninga mwaana vaari veenyu di munlubaleya.”
49 Nuwindo, Juwawu omwaddela egihina: “Namahudhiha, nihimoona muthu dhaala awigaraga ademoniyu alabihedhaga ndina nenyu vano iyo oxixa ommaaliha mwaha oliye keeddesa ni iyo.” 50 Mbwenye Yesu omwakula egihina: “Kamuxixe ommaaliha, mwaha muthu yoole ahinaniharahara ali epaddi yehu.”
51 Waddamelaga* mudhidhi wihina ahogoloseliwe odhulu Yesu oliba murima odhowa oJeruzale. 52 Oliye waruma athu osogolo waye wihina edhowe murudda wasamaritanu wi yegeredhe ni emwakele aafiyaga. 53 Mbwenye asamaritanu kiyamwakenle mwaha oliye adhowa oJeruzale. 54 Vano anamahara aye Tiyago ni Juwawu nuwoona ndo, aliwa owoga yegihina: “Nabwiya, munafuna wihina nlobe mootho odhulu waatolose?” 55 Oliye orugunuwa ni wasumulula. 56 Nuwindo aliwa odhowa murudda mmodha.
57 Vano, egaali mudila yeeddaga mulobwana dhaala owoga egihina: “Nabwiyani, mburo-bu-mburo munayeginyu miyo gineerege wuharani.” 58 Vano Yesu omwakula egihina: “Akwadde ehikanna mburo vokala teto balame dhihikanna dhithunjhi dhewa vinakaliwa, mbwenye Mwaana Muthu kanna mburo voogona.” 59 Nuwindo, oliye omwaddela mmodha egihina: “Okale namahara aaga.” Mulobwana ole omwakula egihina: “Nabwiyani, gijheheni gaabihe waavita ababa.” 60 Nuwindo, Yesu omwaddela egihina: “Wahiye anookwa evitanege* anookwave, mbwenye we odhowe waalaleye Omwene wa Mulugu.” 61 Voharela muthu mmodha owoga egihina: “Nabwiya, miyo ginafuna guharegeni, mbwenye gijheheni gaabihe wapaganya amudhaga.” 62 Vano, Yesu omwakula egihina: “Kaawo muthu ani aalimaga asugwaga mundduli anafwanelela Omwene wa Mulugu.”