Dhilebiwe ni Matewuji
19 Yesu nuumala owoga dhithu ndha, odhowa oGalileya, murudda dhaali mmanddileni* woJudeya, kobela emodha ya muhinjhe woJordawu. 2 Nuwindo muthithi waathu omuhara ni oliye wavulumusa wewule.
3 Afarizewu amodha omwaddamela wihina emwehe, ni omukoha yegihina: “Enowenyeya mulobwana omwalana ni mwariye mwaha werana ethu-siithu?” 4 Oliye wawakula egihina: “Nyu kamunilerigi wihina ole aapadduse athu omambelelowene ahimpaddusa mulobwana ni muhiyana, 5 ni owoga egihina: ‘Bumwahaya mulobwana aneere wahiya ababe ni amaye wihina akale ni mwariye vano aabilene ekale mwiili mmodha’?* 6 Bumwahaya kinakala athu abiili mbwenye mwiili mmodha baahi. Mowindala yeele amagile Mulugu, muthu katapule.” 7 Vano omukoha yegihina: “Mwahaya bwaddi Moyizeji adhe arumege wihina mulobwana afunaga oomwalana ni mwariye, anvahe pethe vano amurume adhowege?” 8 Oliye wawakula egihina: “Moyizeji aarumendhe muselu ola woomwalana mwaha wowumma murima weenyu, mbwenye omambelelowene kadhaali ndo. 9 Miyo ginowuwaddelani wihina muthu yoole anaamwalane ni mwariye wula ahiraruwile vano anodhowa omutela muhiyana mmodhaya, ohukuma mba.”*
10 Vano anamaharaye owoga yegihina: “Otelanawa wahakalege ndo yafwanelele ohutelawene.” 11 Oliye wawakula egihina: “Kahiyo athu aatene enawakwaneliha madhu yaala mbwenye athu yaale evahiwe gari yeela. 12 Ehikalawo athu ehinatela mwaha ebaliwe ndo, mbwenye amodha athu banongile ni ehikalawo athu ehinatela mwaha wOmwene wodhulu. Ole ananda okala ndo akale ndo.”
13 Athu amodha wadhana anamwani wihina aatapulele nlada ni alobelele, mbwenye anamahara aye wasumulula. 14 Vano Yesu owoga egihina: “Kaahiyeni anamwani ayo edhe wa miyo, mwaha Omwene wodhulu bwaathu ninga yaala.” 15 Oliye watapulela nlada ahima ale, nuwindo ovenyavo.
16 Vano muthu dhaala omwaddamela ni omukoha egihina: “Namahudhiha, gerena ethu baani yapama wihina gaakele egumi yohimala?” 17 Oliye omwakula egihina: “Mwahaya bwaddi ogagikoha wodhela ele eli yapama? Muthu mmodha baahi dili apama. Mbwenye we akala onofuna okanna egumi yohimala, wawiwelelege malamulo a Mulugu malabo aamatene.” 18 Oliye omukoha egihina: “Malamulo baani?” Yesu omwakula: “Kumpe muthu, kukume mba, kuwiye, kuvahe onamoona wowoota, 19 waarihe ababo ni amawo, ni omudhivele mwanddamanaawo ninga onidhiveliwe.” 20 Vano muzombwe ole omwakula egihina: “Ginowakwaneliha dhaatedhene dhendho, ki vano enagihalela ddi?” 21 Yesu omwaddela egihina: “Wafunaga okala owaakwanela* odhowe, wagulihe dhoreela dhawo, korowadha wavahe aliba ohawa, windo we onere okanna dhoreela odhulu, wamala odhe okale namahara aaga.” 22 Muzombwe ole nuwawiwa madhu yayo, omaruwa odhowaga oowukuwene mwaha ahithabwa oreela. 23 Vano Yesu wawaddela anamaharaye egihina: “Miyo ginowuwaddelani ebaribari enere orusa vanlubale muthu ooreela ovolowa Mumweneni wodhulu. 24 Ginowenjhedhedhave gegihina, enere okweya kamelu ovolowa ponyongo ya singano ohiya muthu ooreela ovolowa Mumweneni mwa Mulugu.”
25 Anamahara aye nuwawiwa madhu yaala otikina vanlubale ni owoga yegihina: “Mwebaribarene anavuluwe baani?” 26 Yesu wasugwa pamadhene aliwa ni owoga egihina: “Moonelo waathu eyo kinenyeya, mbwenye wa Mulugu, dhithu dhaatedhene dhinowenyeya.”
27 Peduru omwakula egihina: “Kasugwani! Iyo nihimala ohiya dhithu dhaatedhene wuharagani, yowakela yehu enakale ddi?” 28 Yesu wawaddela egihina: “Miyo ginowuroromelihani gegi: Malabo dhinawomihedhiwe dhithu dhaatedhene vano Mwaana Muthu* akarati vampaddoni vaye vowaara, nyu mugihanre munere okaratela mpaddo 12 dhothonga wihina mwatorihe mahimo 12 aamwaana Ezarayeli. 29 Aatene yaale enahiye nyumba dhewa, addibiliwa, arogoliwa, abaabiwa, ammiwa, aniwa obe mundda dhewa mwaha wa ndina naaga, enere wakela okunamo teto vadhuluva yakele egumi yohimala.
30 “Mbwenye athu owinjhiva eli oobajha enaakale oogomihedha, teto oogomihedha enaakale oobajha.