Ovuhulela wa Juwawu

15 Gahoona odhulu yintelelo emodhaya yinlubale ni yootikiniha: angero 7 eganna mulili 7. Mulili ndha sogomihedha, mwaha dhavira, owali wa Mulugu onere omala.

2 Nuwindo, miyo woona ethu yakala ninga niya ya viduru egataganyihedhiwe ni mootho, ale emugonjhihile mwanenyama owoopiha, ekwamuthu yaye ni nummero na ndina naye, egimenle osogolo wa niya ele ya viduru ni egaaparele abangwe a Mulugu. 3 Aliwa yowiba jhibo ya Moyizeji mudhaari a Mulugu ni jhibo ya Mwana Nimbila yegihina:

“Manlubale ni ootikiniha bimabasinyu, Yehova* Mulugu, Akopolo Dhaatedhene. Dhowogowa ni dhebaribari sidila dhenyu, Mwene amukalakala. 4 Yehova,* baani ahinuwoovani? Baani ahinaathithimihe ndina nenyu? Nyu baahi dili oororomeleya. Malogo aatene eneere odha yukokoreleni vamentoni veenyu, mwaha aliwa ehanona malamulo eenyu owogowa.”

5 Numala, miyo omoona ddammwa oonamona agafuguliwe odhulu, 6 vano angero ale 7 yanna mulili 7, okuma mburo wotaleleya wa mutempulu, egawanre dhowara dhotxena ni dhojerimela, vathimarimaniva egimagilena guwo dha woru. 7 Nuwindo, mungero mmodha wa angero ale annayi, wavahedhela angero ale 7 mapusulano 7 a woru mugadhanle owali wa Mulugu, anakalawo ni mukalakala. 8 Mburo wotaleleya odhaala mwiisi mwaha wa nthithimiho na Mulugu ni mwaha wa kopolo dhaye, teto kaawo muthu aanda ovolowa mburo ole wotaleleya ofiyedha angero ale 7 omariha mulili 7 dhaali mmapusulanoni.