Aalebeliye Akudda Gaalata
3 Akudda Gaalata, mukalele ddi ataduwa! Ulekethileni baani, kamutapuleliwemo pamadhene makalelo Yesu Kiristu apiwiye vantxikwani na goyi? 2 Akala ethu ginafunimi wukohani:* Wihina mwakele muzimu wotxena, mwakenle mwaha wa mabasa a nlamulo obe mwaha wa nroromelo mwiwalinyu? 3 Gerege mweere othabwana otaduwaya? Vobajhavene nyu moweedda mowiwanana ni muzimu wotxena, vano munafuna muharege mubuwelo waathu?* 4 Goyi ele yaatene moonilinyu, moonele ebewene? Gihikanna ebaribari wihina kamoonele ebewene! 5 Mowindo, ole anuvahani muzimu wotxena ni anawerana mabasa ootikiniha vaari veenyu, aneerana eyo mwaha nyu wahara malamulo enawogiiwa, obe mwaha wororomela muthenga dhapama mwiwalinyu? 6 Simodhave yampadduwele Abaraawu: oliye “omuroromela Yehova,* bumwahaya Mulugu adhe amonege Abaraawu ninga muthu owogowa.”
7 Mwebaribarene, nyu muhunona wihina ale enithaniwa ahima Aabaraawu, baale enna nroromelo. 8 Epaddi dhaala ya Yolebela, enawoga wihina weere ofiya mudhidhi Mulugu aawonegiye athu amalogo mamodha ninga owogowa wodhela nroromelo, ohiya eyo, yahiwoga mutaneene muthenga dhapama wodhela Abaraawu yegi: “Mwaha wawo, malogo maatene enere oreelihiwa.” 9 Ni makalelo yayo, ale enna nroromelo binareelihiwa vamodha ni Abaraawu, anna nroromelo.
10 Aatene yaale enaaroromela mabasa a nlamulo, ehimala wulumeliwa, mwaha dholebela dhinawoga dheegi: “Owulumeliwa di muthu yoole ahinahara dhithu dhaatedhene dhilebiwe muroluni ya Nlamulo.”* 11 Ohiya eyo, enowoneya pamadhene wi kaawo muthu anadha akala owogowa vamentoni va Mulugu wodhela mabasa a nlamulo, mbwenye muthu owogowa aneere okalawo mwaha wa nroromelo naye. 12 Mowindo, Nlamulo kannadhela mwaha wa nroromelo. Mbwenye “muthu yoole anerana dhithu ndha aneere ofwanya egumi.” 13 Kiristu ohunigula anobolaga wulumeliwa wehu mwaha wa Nlamulo ni ohipweha vamburoni veehu ninga dholebela dhinawogiwa dheegi: “Owulumeliwa di muthu yoole akomeliwe vantxikwani.” 14 Eyo epadduwe wihina athu amalogo yawakele mareeliho Aabaraawu wodhela Kiristu Yesu, ni makalelo yaala naakele muzimu wotxena Mulugu apaganyiliye ovaha wodhela nroromelo nehu.
15 Addibila, ginawoga mowiwanana ni dhithu dhinereya naathu: woona wi neriwana nipangano, naarive agaalivo muthu mmodha baahi, kaawo muthu anabibiddela newene anenjhedhedhavo. 16 Mwaha aaroromelihiwe mpaganyo di Abaraawu ni odhuulu* waye. Bumwahaya Dholebela kadhinawoga dhegihina “odhuulu waye waatene” ekalaga ninga enawagana athu owinjhiva. Ohiya eyo, Dholebela dinawoga dheegi “odhuulu* waye” dhimwagagana muthu mmodha baahi ali Kiristu. 17 Teto ginowogave gegi: “Nlamulo nikumelele dhigavinre yaka 430, kannabibiddela nipangano Mulugu eriliyena kale ofiyedha obibiddela mpaganyoya. 18 Bumwahaya, akala nvaho aapaganyiwe Abaraawu waadhele mwaha wa nlamulo kuwaali mpaganyo; mbwenye Mulugu ohunvaha nuupama waye wodhela mpaganyo aamuroromelihiye.
19 Ki mwahaya bwaddi ndhe nikalegewo Nlamulo? Nihivahiwa Nlamulo wihina nonihege dhoothega ofiyedha odha ole aapaganyiwe.* Mpaganyo ola waawogiwe naangero, wodhela mmadani mwa namafihedha. 20 Mowindo, simodhave erilena Mulugu eragana mpaganyo ola kaamuhowele muthu onfihedha, oliye aalivo yeka. 21 Nerege Nlamulo nnoovanya mpaganyo dha Mulugu? Newene! Mwaha nahakalewo nlamulo nnanda ovaha egumi, mwebaribarene woogowa wadheele mwaha wa nlamulo. 22 Mbwenye Madhu a Mulugu ehipeleka dhithu dhaatedhene wihina dhilamuliwege ni yoothega. Nimakalelo yayo ale enna nroromelo eneere wakela mpaganyo eroromelihiwe athu aatene enamuroromela Yesu Kiristu.
23 Mowindala, nihinambele okanna nroromelo ni Kiristu, nasugweriwa ni nlamulo teto needdihiwa ni nlamulo nenno wula nijheehaga nroromelo nafuna woneyihiwa ni Mulugu. 24 Vano Nlamulo okala namakavihera* ehu ninthukulelaga wa Kiristu wihina noniwege ninga athu owoogowa wodhela nroromelo. 25 Mbwenye vano ninnihuna nroromelo ni Kiristu kannahowela weddihiwa nnamakavihera.
26 Mwebaribarene nyu aatene muli ahima a Mulugu wodhela nroromelo munninyuna ni Kiristu Yesu. 27 Mwaha aatene nyu mbaddiziwe mwa Kiristu, munoligana ni Kiristu. 28 Kaawo muJudewu newene muGerego, kawo mudhaari newene muthu ootapuwa, kawo mulobwana newene muhiyana; mwaha aatene nyu muli mwimodhani ni Kiristu Yesu. 29 Ohiya eyo, akala nyu muli a Kiristu mwebaribarene muli odhuulu* wa Abaraawu ni nyunwa munere wakela mpaganyo mmodhave aaroromelihiwe Abaraawu.