Ovuhulela wa Juwawu
18 Nuwindo, miyo omoona mungero akitaga odhulu ni owedha winlubale, teto elabo yavati yowaara mwaha wa nthithimiho naye. 2 Oliye okuwa ni ndhu nakopolo egihina: “Ohumotha, ohumotha Babiloniya munddimuwa, vano oliye nyumba yaademoniyu teto muzimu dhotakala vamodha ni balame dhotakala ni dhonyakavala dhiniipita mwemmo! 3 Mwaha oliye ohalezeliha malogo maatene ni vinyu a efunelo yaye yowawerana mararuwo,* mamwene a velaboni yavati ehiraruwa nuliye teto aliba malondda eelabo yavati ehireela mwaha dhithu dhokwima muhiyana oyo anugeliye ahinna manyazo.”
4 Vano miyo wiwa ndhu nimodha nadhela odhulu negihina: “Akala nyu kamunafuna othukula nibili na dhoothega dhaaye teto mwahifunaga waakela mulili dhimodhave anafuniye waakela, mukumemo. 5 Mwaha dhoothega dhaye dhihinjhiva ni dhihifiya odhulu, teto Mulugu aneere omutoriha mwaha wa dhithu dhohogowa eeriliyena. 6 Mmuhogolosele kunyawunya, mmuhogolosele okunamo dhithu dhaatedhene dhabure awereliye amodha; kopo mwegeredhiye yong’wa yaye, muhelemo yong’wa yoowawa wihina mmung’wihe. 7 Woona wihina oliye onowithithimiha ni onowugela dhoreela ahinna manyazo, bumwahaya mmoonihe goyi ni mmunlihe. Mwaha onowoga mmurimani mwaye egihina: ‘Miyo gili musano, kagili maamukwele newene kagidha gunla.’ 8 Bumwahaya mulili dhaye wili okwa, wunla ni dala dhinanfwanye labo nimodhave teto oliye aneere opahiwa vamoothoni, mwaha Yehova* Mulugu yoyo anafuna omutoriha dakopolo.
9 “Vano mamwene amwilaboni yararuwa* nuliye wula egaanaga dhoreela uugeliye ahinna manyazo, yamoona agapahiwe wula mwiisi othuwelaga, eneere otomola kutho ni eneere wukutha vathimarimani emunlelaga. 10 Aliwa eneere wiimela woolapela yovaga goyi anafuniye woonihiwa ewogaga yegihina: ‘Uwii, uwii, luwani enlubale Babiloniya, we waali luwani yooliba, yandeyile addi mudhidhi mmodha baahi ofiya otorihiwa wawo!’
11 “Ohiya eyo, aliba malondda amwilaboni eneere omunlela ni eneere wikubanyedha mwaha okwa waye, woona wi kaawo muthu anagulege malondda ewa aatene, 12 hee, kawo muthu anaagulege malondda ewa a woru, a parata, a mabwe athima, a peerola, a linyu yapama, dhowara dhojerimela, dhowara dhoterenya ni dhoofiila vanlubale; dhithu dhaatedhene dhinasasanyiwa ni tabwa dhoonukwela ni dhithu dhaatedhene dhinasasanyiwa ni meeno a thebo,* a tabwa dhathima, a muthove, a mujhila, ni dha marmore; 13 ohiya eyo, kaneela, dhithu dhoonukwela dhinakuma oIndiya, insensu, makura oonukwela, olibanu, vinyu, makura oolivera, othu wothepethepeya, tirigu, ng’ombe, mambila, akavalo, karo dhoburuliwa, adhaari ni dhigumi dhaathu. 14 Hee, Babiloniya, dhithu dhapama wafunesiiwe dhihuthawa teto dhoreela dhawo dhaatedhene ni nthithimiho wanniwena nihimala orimela newene athu kinadha yoonaga.
15 “Anameeddiha malondda yaguliha dhithu ndha, yafiyedhile oreela mwaha waye, eneere wimela wolapelawene yovaga goyi anafuniye woonihiwa ni eneere otomola kutho wula yikubanyedhaga, 16 ni ewogaga yegihina: ‘Uwii, uwii, luwani enlubale, we wahiwara linyu yojajala, guwo dhojerimela ni dhoofiila, wahiwara dhithu dha woru, mabwe athima ni peerola, 17 mwaha dhoreela dhowinjhiva aanniyena dhigujhuliwe mudhidhi mmodhave!’
“Teto kapitawu di kapitawu anamuhoolela baruku, muthu di muthu aneedda muniya, athu enalaba mbarukuni ni athu aatene eneedda muniya yaweeddihaga malondda eneere wiimela wolapelawene 18 teto yamoona agapahiwe wula mwiisi othuwelaga, eneere wikubanyedha yegihina: ‘Luwani baani enaligana ni luwani yeela enlubale?’ 19 Aliwa eneere wiivokedha nthubi vamuru ni eneere okuwa yunlaga wula yikubanyedhaga yegihina: ‘Uwii, uwii luwani enlubale, mwaha wa dhoreela dha luwani yeela, aatene yaale yanna abarku ewa muniya ehireela, ki yandeyile addi mudhidhi mmodha baahi ogujhuliwa yaatene!’
20 “Agalalani nyu munakala elabo yodhulu ni nyuwa muli oweela, arumiwi ni anamavuhulela mwaha Mulugu ohumutoriha wodhela dhithu uwereliyeni!”
21 Nuwindo mungero akopolo ovenyiha nibwe naligana ni nsilo ninlubale, ovokedha muniya ni owoga egihina: “Mowindala ninga nibwe nna nnavokiwa mowaguva, Babiloniya luwani enlubale, aneere ovokedhiwa vati ni kanadha ooneyaga. 22 Mwa we Babiloniya, kawinadha mwiweyaga jhibo dha anamiba yawobaga abangwe ewa, newene muthu arumihaga jhibo, oobaga falawuta ni oobaga palaza; kamunadha mukala newene meesili mmodha anonne osasanya ethu-siithu ni kamunadha mwiweyaga nsilo nrumaga. 23 Mwa we kamunadha mooneyaga waara wa lampada, newene kamunadha mujhiwaga mathanga aanamatelana, mwaha anameeddiha malondda awo yaali athu anlubale mwilaboni teto ohaleketha athu amwilaboni ni dhowera dhawo dha masenga. 24 Hee, luwani yeela nihifwanyiwamo nikame na anamavuhulela, na athu oweela ni naathu aatene epiwe elabo yavati.”