Ovuhulela wa Juwawu
7 Nuwindo, miyo wawona angero annayi egimenle makome mannayi eelabo, egahiddele pamadhene mapevo mannayi eelabo, wihina nihikalewo nipevo noobelege elabo, niya newene muthanko bu muthanko. 2 Vano miyo omoona mungero mmodhaya akuma epaddi yomadhelo nduwa agaparele selu ya Mulugu ookalawo, nuwindo oliye okuwa ni ndhu nootama awaaddelaga angero ale annayi yavahiwe kopolo wihina enonge elabo yavati nniya, oliye weera: 3 “Munaanonge elabo yavati, niya newene muthanko, ofiyedha iyo wapweha yintelelo* vakoveni adhaari a Mulugu.”
4 Nuwindo miyo wiiwa niwogiwaga nummero naathu yapwehiwe yintelelo vakoveni, yaali: 144 000 a mahimo aamatene aamwaana Ezarayeli:
5 Nihimo na Juda, athu yapwehiwe yintelelo vakoveni yaali 12 000;
nihimo na Rubeni, 12 000;
nihimo na Gadi, 12 000;
6 nihimo na Azeri, 12 000;
nihimo na Nafitali, 12 000;
nihimo na Manaseji, 12 000;
7 nihimo na Simiyawu, 12 000;
nihimo na Levi, 12 000;
nihimo na Izakari, 12 000;
8 nihimo na Zebulawu, 12 000;
nihimo na Juze, 12 000;
nihimo na Benjami, 12 000.
9 Nuumala, gahoona muthithi waathu wohukontareya, yaali a elabo yaatene, a malogo aamatene, a mahimo aamatene ni a dhiwogelo dhaatedhene, egimenle osogolo wa mpaddo ni osogolo wa Nimbila, egawanre dhowara dholapa dhotxena, egaahiddele makubari. 10 Aliwa yokuwa ni ndhu nootama yegihina: “Ovuluwa wehu onadhela wa Mulugu akiratile vampaddoni voomwene ni wa Nimbila.”
11 Angero aatene yaali owimelene ni yahirijha mpaddo waye woomwene, wa anamaholela ni wa angero ale annayi; aliwa okokora ni oworomela vati osogolo wa mpaddo woomwene vano omwebedha Mulugu 12 yegihina: “Amem! Ovuwa, nthithimiho, thotho, otamalela, nriho, owedha ni kopolo sa Mulugu ehu ni mukalakala. Amem.”
13 Mwaha wa yeyo, namaholela mmodha ogikoha egihina: “Alaya baani ewanre dhowara dholapa ni dhotxena, ki enadhela wuuvi?” 14 Miyo omwakula gegihina: “Nabwiya anonne di nyu.” Oliye wera: Ala baale enakuma muhoseyani winlubale; aliwa ehifula dhowara dhewa dholapa vano otxeniha munikameni mwa Nimbila. 15 Bumwahaya edhe yimelege osogolo wa mpaddo wa Mulugu, ni enomparela mabasa ootaleleya mutana ni mahiyu mutempulu mwaaye; Ole akiratile vampaddoni voomwene aneere wakunela ni musasaaye.* 16 Kidha ekannaga dala newene nthona; teto kinoonege goyi mwaha wa nduwa ni oviha, 17 Mwaha Nimbila nili vaari va mpaddo woomwene, nnerege wakukula ni nnere wathukulela vatxelani na manjhe eegumi. Teto Mulugu aneere wavuda mitoridhiwa dhaatedhene mwintoni mwewa.