Alebeliye Akudda Romanu
16 Ginafuna wihina mmunone murogolihu Febi, anakavihera* mulogo wo Senkreya, 2 wihina mmwaakele mwa Nabwiya ni makalelo apama enoneyiha wi muli oweela ni munvahe nikavihero nnahoweleya, mwaha wi oliye ohawakihedha addibila owinjhiva teto ni miyowa ohugaakihedha.
3 Mwaavahedhele malojhelo aaga Priska ni Akila, akwaaga ammabasani mwa Kiristu Yesu, 4 elevile egumi yewa* mwaha wa miyo,* ohiya mwaha wa miyeneve baahi, mbwenye mwaha wa mulogo dhaatedhene dha malogo, bumwahaya nnowatamalela vanlubale. 5 Malojhelo mamodha mwaavahedhele mulogo onatugumana vaade vewa. Malojhelo mukwaaga ginamudhivelimi Epeneto, ali namulibu oobajha a yowima ya Kiristu eelabo yoAziya. 6 Munvahedhele malojhelo aaga Mariya, upareleni mabasa nuuviheya. 7 Mwaavahedhele malojhelo aaga Androniku ni Juniya, eli amudhaaga ni akwaaga amukambura yayo arumiwi yaanonniwa pamadhene ni eli mwimodhani ni Kiristu obajha kale ogipitha miyo.
8 Munvahedhele malojhelo aaga Ampliyatu, ginamudhivelimi mwa Nabwiya. 9 Munvahedhele malojhelo aaga, Urbanu, anaapara mabasa a Kiristu vamodha nihiyo, malojhelo mamodha mwanvahedhele mukwaaga ginamudhivelimi Estaki. 10 Munvahedhele malojhelo aaga Apeleji, arumedhiwe ni Kiristu. Malojhelo mamodha mwaavahedhele athu enakala vaade va Aristobulu. 11 Munvahedhele malojhelo aaga, Erodiyawu, mmudhaaga. Malojhelo mamodha mwaavahedhele athu enakala vaade va Narsizu yayo eli mwa Nabwiya. 12 Mwaavahedhele malojhelo aaga Tirifena ni Tirifoza, ahiyana enaapara mabasa a Nabwiya nuuviheya. Malojhelo mamodha mwanvahedhele murogola nnamudhivelihu Persidi, nuliyeya anowapara mabasa a Nabwiya nuuviheya. 13 Munvahedhele malojhelo aaga Rufu, asakuliwe mwa Nabwiya, ni amayeya, yayo ginawithanimi Aamma. 14 Munvahedhele malojhelo aaga Asinkiritu, Felegonti, Ermeji, Patrobaji, Ermaji vamodha ni addibila aatene eli vamodha naliwa. 15 Mwaavahedhele malojhelo aaga Filologo ni Juliya, Nerewu ni murogoliyeya, ni Olimpaji vamodha naaddibila aatene oweela enakala vamodha naliwa. 16 Mulojhelanege mmodha ni mukwaye ni beju yoweela. Mulogo dhaatedhene dha Kiristu dhihuvahedhelani malojhelo.
17 Addibila, vano ginowukongomedhani wihina mukale pasope ni athu yaale enatatamula ohiwanana ni enaakwakwathusa athu amodha eviriganihaga dhithu muhudherinyu; mwaarabele athu yayo. 18 Mwaha athu ninga yayo, kahiyo adhaari a Kiristu, Nabwiya ehu, mbwenye adhaari a dhofuna dhewa, mwaha aliwa enowaleketha athu oolodhowa murima ni madhu oofewa ni ooleketha. 19 Wiwelela weenyu ohunoniwa ni athu aatene, bumwahaya miyo ginohagalala mwaha wa nyu. Mbwenye ginafuna wihina mukanne thotho wodhela ele eli yapama, mbwenye mwahikanne nibili wodhela ele eli yabure. 20 Mulugu anavaha murenddele vohilegela aneere omunyenya Saddana vati va manyalo eenyu. Opama wohinifwanelela wa Nabwiya ehu Yesu, okale ni nyu.
21 Mukwaaga Timotiyu ginalabimina vamodha ni amudhaga, Lusiyu, Jazawu ni Sosipaturu enowuvahedhelani malojhelo.
22 Miyo Tersiyu alebile karta nna, ginowuvahedhani malojhelo mwa Nabwiya.
23 Gayu agakenle vaade vaye ni mulogo watene, ehuvahedhani malojhelo. Erastu muliba osamalela korowa dha musidadi ni ddibileya Kwartu, ehuvahedhelani malojhelo. 24* ——
25 Muthenga ginalaleyimi ni muthenga ginavuwihimi wodhela Yesu Kiristu onere wukaviherani okala txithi. Muthenga ndha dhapama dhinowiwanana ni dhoviteya dhootaleleya dha Mulugu dhendho aavitiliye obajha kale. 26 Mbwenye vano yoviteya eyo ehimala woneyihiwa. Teto wodhela Dholebela dhaanamavuhulela, athu a malogo aatene ehinona yoviteya eyo yotaleleya. Eyo enowiwanana ni nlamulo na Mulugu anakalawo malabo aamatene. Efunelo yaye sowihina malogo aamatene emuroromelege ni emwiwelelege Oliye. 27 Mulugu ali athotho wapitha athu aatene, athithimihiwege ni mukalakala wodhela Yesu Kiristu. Amem!